🔴 [M] San Pedro Bautista, San Pablo Miki ug mga kauban, mga martir

PAGBASA GIKAN SA BASAHON NI SIRAC

Sir. 47:2-11

Maingon nga ang pinili nga bahin sa tambok sa halad sa panaghiusa gilain alang sa Ginoo, mao usab si David nga gipili gikan sa mga Israelita. Nakigdula siya sa mga liyon ug sa mga oso ingon nga kini mga nati nga karnero ug gagmayng mga kanding. Sa gamay pa siya, nakapatay siya ug usa ka higante aron pagluwas sa iyang katawhan. Nagbutang siyag bato diha sa iyang saplong, ug gitumong niya ug gitapos niya ang pagpanghambog ni Goliat. Nag-ampo siya sa Ginoo, ang Labing Halangdon, ug gihatagan siyag kusog aron makapatay niadtong bantog nga sundalo, aron ang mga nasod magbaton ug pagtahod alang sa gahom sa iyang katawhan. Ang katawhan nagpasidungog kaniya tungod sa pagpatay sa iyang napulo ka libo ug sa gipurongpurongan na siya nga hari, gidayeg siya nila tungod kay pinili siya sa Ginoo. Gipuo niya ang tanan niyang mga kaaway ug gidugmok niya sa dayon ang mga Filistihanon aron dili na gayod sila mahimo nga usa ka hulga. Sa tanang mga butang nga gihimo ni David, nagpasalamat siya ug nagdayeg sa Balaan nga Ginoo, ang Labing Halangdon. Gihigugma niya ang iyang Magbubuhat ug nag-awit siya sa mga pagdayeg ngadto Kaniya sa tibuok niyang kasingkasing. Nagbutang siyag mag-aawit diha sa altar aron maghatag ug matahom nga honi. Gihikay niya ang mga panahon nga pangilin sa tibuok tuig ug naghimo niini nga mga dagkong higayon; ang Templo milanog sa mga pagdayeg sa Ginoo sa tibuok adlaw. Ang Ginoo mipasaylo sa sala ni David ug nagtukod sa iyang gahom hangtod sa kahangtoran. Naghimo siyag usa ka kasabotan uban kaniya nga siya ug ang iyang kaliwat maghari nga masanagon sa tibuok Israel.

SALMO RESPONSORYO

Ps. 18:31, 47, 50, 51

R. Daygon ang Dios nga akong manluluwas.

Ang paagi sa Dios dili masayop, ang saad sa Ginoo gisulayan sa kalayo; siya usa ka taming sa tanan nga nagadangop kaniya. (R)

Mabuhi ang Ginoo! Ug Daygon ang akong bato! Ibayaw unta ang Dios nga akong Manluluwas. Busa isangyaw ko ikaw, O Ginoo, diha sa kanasuran, ug awitan ko ang pagdayeg sa imong ngalan. (R)

Ikaw nga naghatag og dagkong mga kadaugan sa imong Hari ug maluluy-on ka sa imong gidihogan, kang David ug sa iyang kaliwat sa kahangturan. (R)

BERSO SA DILI PA ANG EBANGHELYO

Lk. 8:15

Aleluya! Ang binhi nga nahulog sa maayong yuta mao kadtong nakadungog sa mensahe ug midawat ug mituman niini, ug magpadayon hangtod nga mamunga sila. Aleluya!

PAGBASA SA SANTOS NGA EBANGHELYO SUMALA NI SAN MARKOS

Mk. 6:14-29

Si Hari Herodes nakadungog niining tanan, kay nasangyaw na man sa tanang dapit ang kabantog ni Jesus. May mga tawo nga miingon, "Nabanhaw si Juan nga Magbubunyag! Mao kini ang hinungdan nga nahimo niya ang mga milagro." May miingon usab nga siya mao si Elias. Apan ang uban miingon, "Propeta siya sama sa mga bantogang propeta sa karaang panahon." Sa pagkadungog ni Herodes sa gibuhat ni Jesus, siya miingon, "Siya mao si Juan nga Magbubunyag nga akong gipapunggotan, apan nabanhaw." Si Herodes mismo mao ang nagpadakop, nagpagapos, ug nagpabilanggo kang Juan. Gihimo niya kini tungod kang Herodias nga iyang gipangasawa, bisan kon si Herodias asawa ni Felipe nga iyang igsuon. Kay si Juan god nagpunay mag sulti kang Herodes, "Dili matarong nga makigpuyo ka sa asawa sa imong igsuon." Tungod niini, nagdumot si Herodias kang Juan ug naninguha pagpatay kaniya, apan wala siya makahimo niini kay wala man siya tugoti ni Herodes. Nahadlok si Herodes kang Juan kay nasayod man siya nga si Juan maayo ug balaan nga tawo, busa iya siyang gipanalipdan. Gusto si Herodes mamati kaniya bisan tuod masamok ang iyang hunahuna inigkabati niya sa tanan nga isulti ni Juan. Sa katapusan nakahigayon ra gayod si Herodias! Nahitabo kadto sa sumad sa adlawng natawhan ni Herodes. Niadtong higayona nagkombira si Herodes ug gidapit niya ang tanang kadagkoan sa kagamhanan, ingon man ang mga pangulo sa kasundalohan, ug ang mga inilang molupyo sa Galilea. Ang anak nga babaye ni Herodias misulod ug misayaw ug nakapahimuot siya ni Herodes ug sa iyang mga bisita. Busa ang hari miingon sa dalagita, "Unsa may imong gusto? Ihatag ko kanimo bisag unsay imong pangayoon." Nakasaad pa gani siya uban ang pagpanumpa nga nag-ingon, "ihatag ko kanimo ang tanan nga imong pangayoon bisan pag ang katunga sa akong gingharian." Busa migula ang dalagita ug nangutana sa iyang inahan, "Unsa may akong pangayoon?" "Ang ulo ni Juan," mitubag ang inahan. Ang dalagita midali pagbalik ngadto sa hari ug miingon, "Ihatag kanako karon dayon ang ulo ni Juan diha sa bandihado." Nakapasubo kini pag-ayo sa hari, apan wala siya makabalibad tungod sa iyang gipanumpa atubangan sa tanan niyang mga bisita. Busa dihadiha nagsugo siyag usa ka sundalo nga punggotan sa ulo si Juan. Milakaw ang sundalo ug miadto sa bilanggoan ug gipunggotan si Juan. Unya gidala niya ang ulo nga gibutang sa bandihado ug gihatag ngadto sa dalagita, ug gihatag usab kini sa dalagita ngadto sa iyang inahan. Sa pagkadungog sa mga tinun-an ni Juan mahitungod niini, miadto sila ug gikuha nila ang iyang Iawas ug gilubong.