PAGBASA GIKAN SA IKADUHANG BASAHON NI SAMUEL
2 Sm. 24:2, 9-17
Busa giingnan ni David si Joab ug ang mga kasundalohan nga uban kaniya, "Adtoa ninyo ang tanang banay sa Israel, gikan sa Dan ngadto sa Berseba, ug ipha ang mga tawo aron masayran ko ang gidaghanon sa mga tawo." Unya gisultihan ni Joab ang hari sa gidaghanon sa mga tawo: may walo ka gatos ka libo ka himsog nga lalaki didto sa Israel nga angay mahimong sundalo. ug lima ka gatos ka libo didto sa Juda. Apan. nagbasol si David human niya maihap ang katawhan. Ug giingnan ni David ang Ginoo, "Nakasala ako tungod sa akong gibuhat. Apan pasayloa ako, O Ginoo, sa akong sala." Sa pagmata ni David sa pagkabuntag, gisultihan sa Ginoo ang propeta nga si Gad nga mananagna ni David, "Ingna si David, 'Kini ang giingon sa Ginoo: tulo ka butang ang gitanyag ko kanimo; pagpilig usa niini, ug buhaton ko ang imong mapili'" Busa miadto si Gad kang David, "Padad-an ko bag tulo ka tuig nga gutom ug tulo ka bulan nga magtagotago ka sa imong mga kaaway samtang maglutos sila kanimo, o buot ka ba nga may kamatay sa tibuok nasud sulod sa tulo ka adlaw? Hunhunaa kini pag-ayo ug sultihi ako sa itubag ko sa nagsugo kanako." Mitubag si David kang Gad, "Dako ang akong kaguol; maayo pa nga silutan ta sa Ginoo, kay maluluy-on man siya pag-ayo kay sa silotan kita sa tawo." Busa gipadad-an sa Ginoo og kamatay ang Israel, gikan sa buntag hangtod sa pagkagabii, ug kapitoan ka libo ka tawo ang namatay sulod sa tibuok nasod. Ug sa pagtuy-od sa anghel sa iyang kamut ngadto sa Jerusalem aron paglaglag niini, nagbasol ang Ginoo sa kadaut nga nahimo, ug miingon siya sa anghel nga gitugyanan sa paglaglag sa mga tawo, "Husto na!" Didto ang anghel sa Ginoo sa ginikanan ni Arauna, ang Jebusilanon. Unya miingon si David sa Ginoo, sa pagtan-aw niya sa anghel nga mipatay sa mga tawo, "Nakasala ako, apan walay labot kining ubang Israelita. Naghangyo ako nga ako ug akong banay lamang ang siloti."
ANG PULONG SA GINOO.
SALAMAT SA DIOS.
SALMO RESPONSORYO
Ps. 32:1-2, 5, 6, 7
R. Ginoo, pasayloa ang sayop nga akong nahimo.
Bulahan siya kansang kalapasan gikuha, kansang sala gitabonan. Bulahan ang tawo nga wala pasanginlig sala sa Ginoo, diha sa kansang espiritu walay kadautan. (R)
Unya akong giila ang akong sala atubangan kanimo, ang akong kasaypanan wala nako taboni. Miingon ako "Ikompisal ko ang akong mga kalapasan sa Ginoo," ug imong gikuha ang kasaypanan sa akong sala. (R)
Tungod niini ang tanang tawo nga nagatuo nag-ampo kanimo sa panahon sa kagul-anan. Bisan lawom nga mga tubig mobaha, dili sila makaabot kanako. (R)
Ikaw ang akong salipdanan; sa kagul-anan imo akong ampingan; sa malipayon nga mga singgit sa kaluwasan imo ako nga libotan. (R)
BERSO SA DILI PA ANG EBANGHELYO
Jn. 10:27
Aleluya! Ang akong mga karnero namati sa akong tingog, nag-ingon ang Ginoo; nakaila ako kanila ug nagsunod sila kanako. Aleluya!
PAGBASA SA SANTOS NGA EBANGHELYO SUMALA NI SAN MARKOS
Mk. 6:1-6
Si Jesus mibiya niadtong dapita ug mipauli sa Nazaret nga iyang lungsod, ug mikuyog kaniya ang iyang mga tinun-an. Sa adlawng igpapahulay miadto siya sa sinagoga ug nagtudlo sa mga tawo. Daghan ang mga tawo didto, ug sa ilang pagkadungog kaniya, nahibulong silang tanan. Busa nangutana sila, "Diin man niya hikat-oni kining tanan? Unsa mang matanga sa kaalam kining nabatonan niya? Ug giunsa man niya paghimog mga milagro? Dili ba siya mao man ang panday nga anak ni Maria, ug igsoon nila ni Santiago, ni Jose, ni Judas, ug ni Simon? Dili ba ang iyang mga igsoong babaye ania man dinhi nagpuyo?" Tungod niini wala sila motuo kaniya. Ug miingon si Jesus kanila, "Ang propeta gitahod sa tanang dapit gawas sa iyang kaugalingong lungsod, sa iyang mga kadugo ug sa iyang banay." Wala siya makahimog milagro didto gawas sa pagtapion sa iyang mga kamot niadtong pipila ka masakiton ug naayo sila. Natingala siya pag-ayo nga wala sila motuo. Unya miadto si Jesus sa tanang kasikbit nga balangay ug nagtudlo sa mga tawo.
ANG EBANGHELYO SA GINOO.
DAYGON IKAW, O KRISTO.
