⚪ [F] Ang Paghalad sa atong Ginoo didto sa Templo

PAGBASA GIKAN SA BASAHON NI PROPETA MALAQUIAS

MaI. 3:1-4

Miingon ang Ginoo nga Labing Gamhanan, "Ipadala ko ang akong sinugo pag-andam sa dalan nga akong agian. Unya sa kalit moadto sa iyang Templo ang Ginoo nga inyong gipaabot. Ang sinugo nga inyong gipangandoy moanhi ug magsangyaw sa akong kasabotan." Apan kinsay molahutay sa adlaw pag-abot niya? Kinsa may makaharong inigpadayag na niya? Sama siya sa kalayo nga nagputli sa puthaw, ug sama sa isog nga sabon. Moanhi siya sa paghukom sama sa magputli sa plata. Hinloan niya ang mga pari ingon sa pagputli sa plata ug bulawan. Unya maghalad sila sa Ginoo sa husto nga matang sa mga halad. Unya ang mga halad nga dad-on sa katawhan sa Juda ug sa Jerusalem ngadto sa Ginoo makapahimuot na kaniya sama kaniadto.

SALMO RESPONSORYO

Ps. 24:7, 8, 9, 10

R. Kinsa kining Hari sa Himaya? Ang Ginoo mao siya.

Alsaha, O mga ganghaan ang inyong marko: pataas kamo, mga karaang pultahan, aron mosulod ang hari sa himaya. (R)

Kinsa kining hari sa himaya? Ang Ginoo, makusganon ug gamhanan, ang Ginoo, gamhanan sa gubat. (R)

Alsaha, O mga ganghaan ang inyong marko; pataas kamo mga karaang pultahan, aron mosulod ang hari sa himaya. (R)

PAGBASA GIKAN SA SULAT NGADTO SA MGA HEBREO

Heb. 2:14-18

Sanglit ang mga anak nakaambit man sa unod ug dugo sa mga ginikanan, si Jesus usab nahimong sama kanila aron paglaglag sa Yawa nga may gahum sa pagpatay. Sa maong paagi giluwas niya ang tanan nga naulipon sa tibuok nilang kinabuhi tungod sa ilang kahadlok sa kamatayon. Kay tin-aw nga dili ang mga anghel ang iyang gitabangan, kondili ang mga kaliwat ni Abraham. Nagpasabot kini nga kinahanglan mahimo siyang sama sa iyang mga igsuon sa tanang paagi aron mahimo siyang matinumanon ug maloloy-on nga Pangulong Pari sa iyang pag-alagad sa Dios, aron mapasaylo ang mga sala sa katawhan. Ug tungod kay nag-antos man siya ug gitintal, makatabang usab siya kanila nga gitintal.

BERSO SA DILI PA ANG EBANGHELYO

Lk. 2:32

Aleluya! Usa ka kahayag nga magpadayag sa imong dalan ngadto sa mga dili Judio, ug maghatag sa himaya ngadto sa imong katawhan, ang Israel. Aleluya!

PAGBASA SA SANTOS NGA EBANGHELYO SUMALA NI SAN LUKAS

Lk. 2:22-40 (TINAAS)

Miabot ang panahon nga si Jose ug Maria magtuman sa seremonyas sa paghinlo sumala sa gisugo sa Balaod ni Moises. Busa gidala nila ang bata ngadto sa Jerusalem aron ihalad nila sa Ginoo. Mao kini ang nasulat sa balaod sa Ginoo: "Ang tanang panganay'ng lalaki kinahanglang ihalad ngadto sa Ginoo." Miadto usab sila aron paghalad sumala sa gisugo sa balaod sa Ginoo: usa ka paris nga tukmo o duha ka kuyabog nga salampati. Niining panahona may tawo nga nagpuyo sa Jerusalem nga ginganla'g Simeon. Maayo siyang tawo ug mahadlokon sa Dios, ug nagpaabot sa kaluwasan sa Israel. Nag-uban kaniya ang Espiritu Santo, ug gipasaligan siya sa Espiritu Santo nga dili siya mamatay hangtod makita niya ang Mesiyas nga gisaad sa Ginoo. Minandoan sa Espiritu, misulod si Simeon sa Templo. Sa gidala na si Jesus sa iyang mga ginikanan ngadto sa Templo aron didto ilang himoon kaniya ang gisugo sa Balaod, gikugos ni Simeon ang bata ug nagpasalamat siya sa Dios: "Karon, Ginoo, kay imo na mang gituman ang imong saad, itugot na nga ang imong sulugoon mohalin nga malinawon. Kay sa kaugalingon kong mga mata nakita ko ang imong kaluwasan, nga imong giandam atubangan sa tanang katawhan: Usa ka kahayag nga magpadayag sa imong dalan ngadto sa mga dili Judio, ug maghatag sa himaya ngadto sa imong katawhan, ang Israel." Nahibulong ang amahan ug ang inahan sa bata sa pagkadungog nila sa mga butang nga gisulti ni Simeon bahin kaniya. Unya nanalangin si Simeon kanila ug miingon kang Maria nga inahan sa bata, "Kining bataa gipili sa Dios alang sa kalaglagan ug kaluwasan sa daghang mga tawo sa Israel; mahimo siyang ilhanan gikan sa Dios nga supakon sa daghang mga tawo, ug tungod niini madayag ang ilang mga tinagoang hunahuna. Ug ang kaguol, sama sa usa ka hait nga espada, molagbas sa imong kaugalingong kasingkasing." Didtoy usa ka babaye nga propeta nga ginganla'g Ana, anak ni Panuel, sa banay ni Aser. Usa siya ka babayeng tigulang na nga minyo sukad sa pito ka tuig, ug unya nabalo sulod sa ikawalo'ag-upat na ka tuig. Wala gayod siya mobiya sa Templo; adlaw ug gabii nagsimba siya sa Dios, nagpuasa ug nag-ampo. Niadto gayong taknaa miabot siya ug nagpasalamat sa Dios, ug misulti bahin sa bata ngadto sa tanan nga nagpaabot nga ang Dios motubos sa Jerusalem. Tapos matuman ni Jose ug Maria ang tanang gisugo sa balaod sa Ginoo, mipauli sila sa Galilea, ngadto sa Nazaret, ang ilang lungsod nga gipuy-an. Ug mitubo ang bata ug nahimong kusgan; napuno siya sa kinaadman, ug ang panalangin sa Dios diha kaniya.

PAGBASA SA SANTOS NGA EBANGHELYO SUMALA NI SAN LUKAS

Lk. 2:22-32 (MINUBO)

Miabot ang panahon nga si Jose ug Maria magtuman sa seremonyas sa paghinlo sumala sa gisugo sa Balaod ni Moises. Busa gidala nila ang bata ngadto sa Jerusalem aron ihalad nila sa Ginoo. Mao kini ang nasulat sa balaod sa Ginoo: "Ang tanang panganay'ng lalaki kinahanglang ihalad ngadto sa Ginoo." Miadto usab sila aron paghalad sumala sa gisugo sa balaod sa Ginoo: usa ka paris nga tukmo o duha ka kuyabog nga salampati. Niining panahona may tawo nga nagpuyo sa Jerusalem nga ginganla'g Simeon. Maayo siyang tawo ug mahadlokon sa Dios, ug nagpaabot sa kaluwasan sa Israel. Nag-uban kaniya ang Espiritu Santo, ug gipasaligan siya sa Espiritu Santo nga dili siya mamatay hangtod makita niya ang Mesiyas nga gisaad sa Ginoo. Minandoan sa Espiritu, misulod si Simeon sa Templo. Sa gidala na si Jesus sa iyang mga ginikanan ngadto sa Templo aron didto ilang himoon kaniya ang gisugo sa Balaod, gikugos ni Simeon ang bata ug nagpasalamat siya sa Dios: "Karon, Ginoo, kay imo na mang gituman ang imong saad, itugot na nga ang imong sulugoon mohalin nga malinawon. Kay sa kaugalingon kong mga mata nakita ko ang imong kaluwasan, nga imong giandam atubangan sa tanang katawhan: Usa ka kahayag nga magpadayag sa imong dalan ngadto sa mga dili Judio, ug maghatag sa himaya ngadto sa imong katawhan, ang Israel."