PAGBASA GIKAN SA IKADUHANG BASAHON NI SAMUEL
2 Sm. 12:1-7, 10-17
Unya gipadala sa Ginoo si Natan ngadto kang David. Miadto siya kaniya ug giingnan niya si David, "May duha ka tawo nga miadto sa usa ka siyudad, dato ang usa ug ang usa kabos. Daghan kaayog mga hayopan ang dato, apan ang kabos wala gayoy lain gawas sa usa ka bayeng karnero nga iyang napalit. Ug giamoma niya kini; mitubo kini uban kaniya ug sa iyang anak, ug nagkan-anan kini sa iyang mumho ug nag-imnanan sa iyang imnanan. lya kining kugoskugoson sama sa iyang anak. Usa ka adlaw niana, may bisita nga miabot sa balay sa dato, ug wala siyay gusto nga mokuha gikan sa iyang kahayopan aron iyang ihawon alang sa bisita, ug maoy iyang giihaw ang bayeng karnero sa kabos aron ikadalit niya sa iyang bisita." Unya nasuko pag-ayo si David, ug giingnan niya si Natan, "Ipanumpa ko sa ngalan sa Ginoo, nga ang tawo nga nagbuhat niini angay'ng patyon. Kinahanglang ulian niya ang tag-iya ug upat ka buok karnero kay wala siyay kaluoy." Giingnan ni Natan si David, "Ikaw mao ang tawo. Ug ania ang Dios sa Israel, 'Gidihogan ko ikaw aron maghari sa Israel, ug giluwas ko ikaw sa kamot ni Saul.'" "Busa dili mobiya ang espada sa imong balay, kay imo man akong gitamay, ug giilog mo ang asawa ni Uria." Kini ang giingon sa Ginoo, 'Patunghaon ko batok kanimo ang dautan gikan sa imong banay; ug sa atubangan mo kuhaon ko ang imong mga asawa, ug ihatag ko sila sa imong silingan, ug siya modulog sa imong mga asawa bisag adlaw'ng dako. Imo kining gibuhat sa tago, apan buhaton ko kini atubangan sa tibuok Israel ug sa adlaw'ng dako." Miingon si David kang Natan, "Nakasala ako sa Ginoo." Ug giingnan ni Natan si David, "Gipasaylo usab sa Ginoo ang imong sala ug dili ka niya patyon. Apan kay pinaagi niining buhata imo mang gipasipad-an ang Ginoo, mamatay ang bata nga natawo kanimo." Unya mipauli si Natan sa ila. Gihatagan sa Ginoo ug grabing sakit ang anak ni David sa asawa ni Uria. Busa si David nagpakiluoy sa Dios tungod sa bata; ug nagpuasa si David, ug mihigda siya sa yuta tibuok gabii. Ang mga kadagkoan miadto kaniya; apan midumili siya, ug wala siya mokaon uban kanila.
ANG PULONG SA GINOO.
SALAMAT SA DIOS.
SALMO RESPONSORYO
Ps. 51:12-13, 14-15, 16-17
R. Linisa ang akong kasingkasing, O Dios.
Usa ka malinis nga kasingkasing gamaa dinhi kanako, O Dios, ug usa ka makanunayong espiritu bag-oha sulod kanako. Ayaw ako isalikway sa imong atubangan, ug ayaw kuhaa gikan kanako ang imong balaang espiritu. (R)
Ibalik kanako ang kasadya sa imong kaluwasan, ug padayona dinhi kanako ang mauyonong espiritu, tudloan ko ang malapason sa imong dalan ug ang mga makasasala mamalik kanimo. (R)
Luwasa ako sa dugo nga makasasala, O Dios, akong manluluwas nga Dios; unya magsaysay ang akong dila sa imong katarong. O Ginoo, abliha ang akong mga ngabil, ug ang akong baba magsangyaw sa imong kadayganan. (R)
PAGBASA SA SANTOS NGA EBANGHELYO SUMALA NI SAN MARKOS
Mk. 4-35-41
Sa pagkagabii niadtong adlawa, giingnan ni Jesus ang iyang mga tinun-an, "Manabok kita sa lanaw." Busa gibiyaan nila ang panon sa katawhan ug ang mga tinun-an misakay sa sakayan nga gisakyan ni Jesus, ug siya gidala nila. May ubang mga sakayan usab didto. Unya mihuros ang kusog nga hangin ug hisabwan ang sakayan sa balod ug hapit mapuno sa tubig ang sakayan. Apan natulog si Jesus nga nag-unlan didto dapit sa ulin. Gipukaw siya sa mga tinun-an nga nag-ingon, "Magtutudlo, wala ka ba mabalaka nga hapit na man kita malunod?" Mibangon si Jesus ug iyang gipahunong ang hangin, ug ang mga balod iyang giingnan, "Hunong!" Ug mihunong ang hangin ug mibanos ang kalinaw. Unya miingon si Jesus kanila, "Nganong nalisang man kamo? Wala ba kamoy pagsalig?" Apan nalisang sila ug nagpangutan-anay, "Kinsa man kining tawhana nga bisan gani ang hangin ug ang mga balod motuman man kaniya?"
ANG EBANGHELYO SA GINOO.
DAYGON IKAW, O KRISTO.
