PAGBASA GIKAN SA IKADUHANG BASAHON NI SAMUEL
2 Sm. 7:18-19, 24-29
Unya miadto si David sa Tolda nga Tagboanan. Milingkod siya didto aron mag-ampo. Miingon siya, "Kinsa man ako, Ginoong Dios? Unsa man ang akong banay nga hangtod karon nag-uban ka man kanako? Apan alang kanimo diyotay ra kini, O Ginoong Dios; Naghisgot ka usab mahitungod sa banay sa imong suluguon kaniadto pa gayod, ug gipakita mo ako sa umaabot kong mga kaliwat, O Ginoong Dios?" Gihimo mo ang Israel nga maimong nasod hangtod sa hangtod, ug ikaw, O Ginoo, mahimo nga ilang Dios. "Ug karon, O Ginoong Dios, tumana kanunay ang imong gisaad sa imong suluguon ug sa iyang banay, ug pasidunggan nila kanunay ang imong ngalan, ug moingon sila, 'Ang Ginoo nga Labing Gamhanan mao ang Dios sa Israel,' ug tukoron sa atubangan mo ang banay sa imong suluguon nga si David. Kay ikaw, O Ginoo nga Labing Gamhanan, mipahayag man niini sa imong suluguon sa pag-ingon, 'Himoon kong hari ang imong kaliwat, busa nangahas ang imong sulugoon sa paghimo niining pag-ampo kanimo, "Ug karon, O Ginoong Dios, matuod ang imong gisulti, ug nakasaad ka niining butang nga maayo sa imong sulugoon. Busa ikahimuot unta nimo ang pagpanalangin sa kaliwatan sa imong sulugoon, aron molungtad kini hangtod sa hangtod; kay ikaw, O Ginoong Dios, nakasaad man niini, ug tungod sa imong panalangin mabulahan hangtod sa hangtod ang kaliwatan sa imong sulugoon."
ANG PULONG SA GINOO.
SALAMAT SA DIOS.
SALMO RESPONSORYO
Ps. 132:1-2, 3-5, 11, 12, 13-14
R. Ang Dios maghatag kaniya sa trono ni David iyang Amahan.
Hinumdomi, O Ginoo, si David ug ang tanan niyang kabalaka; giunsa niya pagpanumpa sa Ginoo, pagsaad sa Gamhanan ni Jacob. (R)
"Dili ako mosulod sa balay nga akong gipuy-an ni mohigda sa higdaanan diin ako magkatulganan; dili ko patagpilawon ang akong mga mata ni papahulayon ko ang akong tabontabon hangtod kapangitaan ko og luna ang akong Ginoo, usa ka puloy-anan alang sa Gamhanan ni Jacob. (R)
Ang Ginoo nanumpa kang David, usa ka malig-ong saad nga dili niya bakwion: palingkuron ko sa imong trono, palingkuron ko sa imong trono ang imong kaugalingong anak. (R)
Kon ang imong mga anak mag-amping sa akong kasabutan ug sa mga kasugoan nga akong itudlo kanila. Ang ila usab nga mga anak hangtod sa kahangturan molingkod sa imong trono. (R)
Kay ang Ginoo nagpili sa Sion; gipalabi siya alang sa iyang puloy-anan. "Kay ang Sion maoy akong pahulayanan sa kahangturan; diha kaniya magpuyo ako, kay gipalabi ko siya." (R)
PAGBASA SA SANTOS NGA EBANGHELYO SUMALA NI SAN MARKOS
Mk. 4:21-25
Si Jesus miingon ngadto sa katawhan: "Mahitabo ba god nga may tawo nga magdagkot og suga aron lamang tagoan sa ilalom sa gantangan o sa ilalom sa katre? Dili ba iya kining ibutang sa tungtonganan? Walay tinagoan nga dili mabutyag, ug walay gililong nga dili madayag. Kon duna kamoy dalunggan, pamati kamo!" Ug si Jesus miingon usab kanila, "Matngoni ninyo ang inyong madungog. Ang mga lagda nga inyong gamiton sa paghukom sa uban gamiton usab sa Dios sa paghukom kaninyo apan labaw pa kahigpit. Ang tawo nga may iya nang daan hatagan pa gayod, apan ang walay iya, bisan ang diyotay nga anaa kaniya, kuhaon pa."
ANG EBANGHELYO SA GINOO.
DAYGON IKAW, O KRISTO.
