⚪ [M] Santo Tomas de Aquino, pari ug doktor sa Simbahan

PAGBASA GIKAN SA IKADUHANG BASAHON NI SAMUEL

2 Sm. 7:4-17

Apan niadtong gabhiona gisultihan si Natan sa Ginoo, "Ingna ang akong alagad nga si David, 'Kini ang gisulti sa Ginoo: Buhatan ba ako nimog balay nga akong kapuy-an? Wala ako makapuyog balay sukad madala ko gikan sa Ehipto ang katawhan sa Israel hangtod karong adlawa; nagbalhinbalhin ako pagpuyo diha sa mga tolda. Sa tanang dapit nga ako nag-uban sa katawhan sa Israel, nakasulti ba ako bisag usa na lang ka pulong ngadto sa mga maghuhukom sa Israel nga akong gisugo sa pagbantay sa akong katawhan, ang mga Israelita? Nag-ingon ba ako, "Nganong wala man ako ninyo buhatig balay nga sidro?" Busa karon sultihi ang akong suluguon nga si David, 'Kini ang giingon sa Ginoo nga Labing Gamhanan: Gikuha ko ikaw sa pasibsibanan, gikan sa imong pagkamagbalantay sa karnero, aron paghimo kanimong hari sa akong katawhan, ang mga Israelita. Nag-uban ako kanimo sa tanang dapit nga imong giadtoan, ug gibuntog ko ang tanan mong kaaway; ug himuon kong bantogan ang imong ngalan, ingon sa mga ngalan sa mga bantogang tawo sa kalibutan. Hatagan kog luna ang akong katawhan, ang mga Israelita, ug papuy-on ko sila didto aron makabaton silag ilang kaugalingong yuta. Dili na sila samokon sa mga tawong mapintas ingon kaniadto, sukad sa panahon nga nagtudio akog mga maghuhukom alang sa akong katawhan, ug dili ko na ikaw ipasamok sa tanan mong mga kaaway. Dugang pa niana, ako nag-ingon nga hatagan ko ikaw'g mga kaliwat. Ug inigkamatay mo, ilubong ka tupad sa imong mga katigulangan ug himuon kong hari ang usa sa imong mga anak ug lig-onon ko ang iyang gingharian. Siya ang ang magtukod ug usa ka templo alang sa akong ngalan ug palungtaron ko ang trono sa iyang ginharian hangtod sa kahangturan. Ako maiyang amahan, ug siya maakong anak. Kon makasala siya, kastigohon ko siya ingon sa buhaton sa usa ka amahan ngadto sa iyang anak. Higugmaon ko gihapon siya sa gugma kong walay paglubad, dili sama sa gibuhat ko kang Saul. Ug palungtaron ko ang imong banay ug gingharian hangtod sa hangtod." Gisulti kini ni Natan kang David sumala sa panan-awon nga iyang nakita.

SALMO RESPONSORYO

Ps. 89:4-5, 27-28, 29

R. Hangtod sa kahangturan ampingan ko ang akong gugma alang kaniya.

Naghimo akog kasabutan sa akong pinili nanumpa ako kang David akong suluguon; sa kahangturan lig-onon ko ang imong kaliwat ug pabarogon ko ang imong trono hangtod sa tanang kaliwatan. (R)

Sa kahangturan ampingan ko ang akong kaluoy kaniya ug ang akong kasabutan uban kaniya mubarog nga malig-on himoon ko nga ang iyang kaliwat molungtad sa kahangturan ug ang iyang trono sama sa adlaw sa mga langit. (R)

Hangtod sa kahangturan padayonon ko ang akong kaluoy alang kaniya ug ang akong pagpakigsabot kaniya magabarog nga malig-on. (R)

PAGBASA SA SANTOS NGA EBANGHELYO SUMALA NI SAN MARKOS

Mk. 4:1-20

Usa ka higayon niana si Jesus nanudlo didto sa daplin sa Lanaw sa Galilea. Hilabihan kadaghan sa mga tawo nga mialirong kaniya ug tungod niini misakay si Jesus sa usa ka sakayan ug milingkod samtang ang katawhan nagbarog didto sa lapyahan. Nagtudlo siya kanila sa daghang mga butang pinaagi sa mga sambingay. Kini usa sa iyang gitudlo kanila: "Pamati kamo! May usa ka tawo nga miadto sa uma aron pagpugas. Samtang nagsabod siya, may mga binhi nga nahulog sa daplin sa agianan, ug miabot ang mga langgam ug gipanuka kini. Ang ubang binhi nahulog sa yuta nga batoon, ug tungod kay mabaw ra man ang yuta niini, dali ra kining miturok. Apan sa dihang nainitan na kini pag-ayo sa adlaw, nalawos kini; ug kay wala man makagamot pag-ayo, nalaya. Ang ubang binhi nahulog sa dapit sa mga sampinit. Unya mitubo ang mga sampinit ug milumos sa mga tanom. Tungod niini wala sila makapanguhay. Apan may mga binhi nga nahulog sa maayong yuta, ug miturok, mitubo, ug nanguhay. May nanguhay og tagkatloan, ang uban tagkan uman, ug ang uban taggatos." Ug unya miingon si Jesus, "Kon duna kamoy dalunggan, pamati kamo!" Sa nag-inusara na si Jesus, pipila niadtong nakabati sa iyang pagpanudlo miduol kaniya uban sa napulog-duha ka tinun-an, ug mihangyo kaniya paghatag og katin awan niadtong mga sambingay. Si Jesus mitubag, "Gipadayag na sa Dios kaninyo ang mga tinago sa iyang Gingharian. Apan alang sa uban ang kamatuoran gipadayag pinaagi sa mga sambingay aron, 'Bisan pa silag magtan-aw dili sila makakita, ug bisag mamati sila dili sila makasabot, kay tingali unyag mamalik sila sa Dios ug pasayloon niya sila." Unya nangutana si Jesus kanila, "Wala ba kamo makasabot sa sambingay? Nan unsaon man ninyo pagkasabot sa ubang sambingay? Ang gisabod sa magpupugas mao ang mensahe sa Dios. Usahay ang mensahe mahulog sa agianan; kining mga tawhana makadungog niini, apan sa pagkadungog nila niini, moabot si Satanas ug mosakmit sa mensahe nga gipugas diha kanila. Ang ubang tawo sama sa mga binhi nga mahulog sa yutang batoon. Sa pagkadungog nila sa mensahe, modawat dayon sila niini sa dakong kahinangop. Apan dili kini makagamot diha kanila, busa dili sila mopadayon. Tungod niini, pag-abot sa mga kalisdanan ug mga paglutos tungod sa mensahe, mobiya sila dayon. Ang uban usab nga mga tawo sama sa binhi nga gipugas sa dapit sa mga sampinit. Mao kini sila ang makadungog sa mensahe, apan ang mga kabalaka niining kinabuhia, ang gugma sa bahandi, ug ang nagkalainlaing matang sa mga pangandoy moawong ug molumos sa mensahe, busa dili sila makapamunga. Apan ang ubang mga tawo sama sa mga binhi nga gipugas sa maayong yuta. Makadungog sila sa mensahe, modawat niini, ug mamunga: ang uban tagkatloan, ang uban tagkan-uman, ug ang uban taggatos."