PAGBASA GIKAN SA IKADUHANG BASAHON NI SAMUEL
2 Sm. 6:12-15, 17-19
Ug giingnan nila si Hari David, "Gipanalanginan sa Ginoo ang banay ni Obededom ug ang tanan nga iyaha tungod sa Sudlanan sa Kasabutan sa Dios." Busa miadto si David ug gikuha niya ang Sudlanan sa Kasabutan sa Dios gikan sa balay ni Obededom ug gidala kini ngadto sa iyang siyudad, ug sila malipayon kaayo. Sa dihang nakalakaw nag unom ka lakang ang nagdala sa Sudlanan sa Kasabutan sa Ginoo gihalad ni David ang usa ka turo ug usa ka nating baka nga tambok. Ug misayaw si David taman sa ginhawa atubangan sa Ginoo. Nagtapis si David ug panapton nga lino. Busa gidala ni David ug sa mga Israelita ang Sudlanan sa Kasabutan sa Ginoo inubanan sa mga singgit ug tingog sa trumpeta. Gidala nila ang Sudlanan sa Kasabutan sa Ginoo, sulod sa Tolda nga gibuhat ni David alang gayod niini. Gihalad ni David ang mga halad-sinunog ug mga halad sa pakigdait atubangan sa Ginoo. Ug sa pagkahuman ni David ug halad sa mga halad nga gisunog ug sa mga halad sa pakigdait, gipanalanginan niya ang mga tawo sa ngalan sa Ginoo nga Labing Gamhanan, ug gihatagan niyag pan, karne, ug torta nga may pasas ang tanang Israelita. Unya namauli sa ila ang tanang mga tawo.
ANG PULONG SA GINOO.
SALAMAT SA DIOS.
SALMO RESPONSORYO
Ps. 24:7, 8, 9, 10
R. Kinsa kining Hari sa Himaya? Mao siya ang Ginoo.
Alsaha, O mga ganghaan ang inyong marko; pataas kamo, mga karaang pultahan, aron mosulod ang hari sa himaya. (R)
Kinsa kining hari sa himaya? Ang Ginoo, makusganon ug gamhanan, ang Ginoo, gamhanan sa gubat. (R)
Alsaha, O mga ganghaan ang inyong marko; pataas kamo mga karaang pultahan, aron mosulod ang hari sa himaya. (R)
PAGBASA SA SANTOS NGA EBANGHELYO SUMALA NI SAN MARKOS
Mk. 3:31-35
Miabot ang inahan ug ang mga igsuong lalaki ni Jesus. Didto sila sa gawas sa balay ug nagpasugo nga buot sila makigkita kaniya. Usa ka pundok sa mga tawo naglingkod libot kang Jesus, ug miingon sila kaniya, "Ang imong inahan ug mga igsuon atua sa gawas ug buot sila makigkita kanimo." Si Jesus mitubag, "Kinsa ba ang akong inahan ug mga igsuon?" Unya mitan-aw si Jesus sa mga tawo nga nag-alirong kaniya ug miingon, "Ania ang akong inahan ug mga igsuon. Kay ang nagtuman sa bisan unsa nga gisugo sa Dios kaniya maoy akong mga igsuon ug akong inahan."
ANG EBANGHELYO SA GINOO.
DAYGON IKAW, O KRISTO.
