🟢 Ikatulong Domingo sa Tuig

PAGBASA GIKAN SA BASAHON NI PROPETA ISAIAS

Is. 8:23-9:3

Sa miaging panahon gipakaulawan niya ang Zabulon ug ang Neftali, apan sa umaabot nga mga adlaw himoon niyang nindot ang agianan latas sa dagat, ang yuta unahan sa Jordan, ang Galilea nga gipuy-an sa mga langyaw. Ang katawhan nga kaniadto naglakaw sa kangitngit nakakitag dakong kahayag; ang nagpuyo sa mangiob nga dapit gisidlakan na sa kahayag. Gipadaghan mo ang molupyo sa nasod, Ginoo, nagmaya sila diha sa imong atubangan; sama sa pagmaya sa mga tawo inigkating-ani ug ingon nga maglipay ang mga tawo inigbahinbahin nila sa ilang inilog. Kay gigupok mo sama sa nahitabo sa Midian ang yugo nga iyang gisangon ug ang karga nga iyang gipas-an ug ang garoti sa nagdaugdaog kaniya.

SALMO RESPONSORYO

Ps. 27:1, 4, 13-14

R. Ang Ginoo mao ang akong kahayag ug akong kaluwasan.

Ang Ginoo mao ang akong kahayag ug akong kaluwasan; kinsa may akong kahadlokan? Ang Ginoo mao ang dalangpanan sa akong kinabuhi; kinsa pa may akong kalisangan? (R)

Usa ka butang akong gipangayo sa Ginoo; kini ang akong gipangita: ang pagpuyo diha sa balay sa Ginoo sa tanang mga adlaw sa akong kinabuhi, aron makasud-ong ako sa kahiligugma-on sa Ginoo ug makapalandong sa iyang templo. (R)

Nagatoo ako nga makakita ako sa kaayo sa Ginoo diha sa yuta sa mga buhi. Paabuta ang Ginoo uban sa kaisog; pagmalig-on sa kasingkasing ug paabuta ang Ginoo. (R)

PAGBASA GIKAN SA UNANG SULAT NI SAN PABLO NGADTO SA TAGA-CORINTO

1 Cor. 1:10-13, 17

Mga igsuon, sa ngalan sa atong Ginoong Jesukristo, naghangyo ako kaninyo nga uyonan ninyong tanan ang inyong gisulti aron walay pagkabahin-bahin diha kaninyo. Paghiusa gayod kamo diha sa usa ka hunahuna ug tumong. Kay gibalitaan ako sa pipila ka sakop sa panimalay ni Cloe nga kamo nagbingkilbingkil. Ang buot kong ipasabot mao nga nagkalainlain ang gisulti sa usag-usa kaninyo. Ang usa moingon, "Dapig ako ni Pablo"; ang usa usab moingon, "Dapig ako ni Apolo"; ug may nag-ingon, "Dapig ako ni Pedro"; ug adunay nag-ingon, "Dapig ako ni Kristo." Nabahinbahin ba diay si Kristo? Si Pablo ba diay ang gilansang sa krus tungod kaninyo? Gibunyagan ba kamo sa ngalan ni Pablo? Si Kristo wala magpadala kanako aron ako mamunyag, kondili aron magsangyaw sa Maayong Balita, dili ginamit ang mga pulong nga lisod sabton, aron dili mawagtang ang gahom sa kamatayon ni Kristo didto sa krus.

PAGBASA SA SANTOS NGA EBANGHELYO SUMALA NI SAN MATEO

Mt. 4:12-23 (TINAAS)

Sa pagkadungog ni Jesus nga gibilanggo si Juan, miadto siya sa Galilea. Mibiya siya sa Nazaret ug didto puyo sa Capernaum, usa ka lungsod nga daplin sa lanaw sa Galilea, sa kayutaan sa Zabulon ug Neftali. Sa ingon natuman ang gisulti ni Propeta Isaias: "Yuta sa Zabulon ug yuta sa Neftali, agianan padulong sa dagat, tabok sa Jordan, Galilea sa mga dili Judio! Ang mga tawo nga nagpuyo sa kangitngit nakakitag dakong kahayag! Kanila nga nagpuyo sa mangitngit nga yuta sa kamatayon modan-ag ang kahayag!" Sukad niadto si Jesus nagwali nga nag-ingon, "Hinulsoli ang inyong mga sala, kay hapit na maghari ang Dios!" Samtang naglakaw si Jesus daplin sa Lanaw sa Galilea, nakita niya ang duha ka magsoon nga mananagat, si Simon (nga ginganlag Pedro) ug si Andres nga iyang igsuon, nga namukot. Si Jesus miingon kanila, "Kuyog kamo kanako ug tudloan ko kamo sa pagpanagat og mga tawo." Dihadiha gibiyaan nila ang ilang mga pukot ug mikuyog kaniya. Mipadayon siya paglakaw ug nakita niya ang laing duha ka magsoon, si Santiago ug si Juan nga mga anak ni Sebedeo. Didto sila sa ilang sakayan uban sa ilang amahan, nagpuna sila sa ilang mga pukot. Gitawag sila ni Jesus, ug dihadiha gibiyaan nila ang ilang sakayan ug ang ilang amahan, ug mikuyog sila kaniya. Si Jesus misuroy sa tibuok Galilea ug nagtudlo sulod sa ilang mga sinagoga, ug nagwali sa Maayong Balita bahin sa paghari sa Dios, ug nag-ayo sa mga masakiton.

PAGBASA SA SANTOS NGA EBANGHELYO SUMALA NI SAN MATEO

Mt. 4:12-17 (MINUBO)

Sa pagkadungog ni Jesus nga gibilanggo si Juan, miadto siya sa Galilea. Mibiya siya sa Nazaret ug didto puyo sa Capernaum, usa ka lungsod nga daplin sa lanaw sa Galilea, sa kayutaan sa Zabulon ug Neftali. Sa ingon natuman ang gisulti ni Propeta Isaias: "Yuta sa Zabulon ug yuta sa Neftali, agianan padulong sa dagat, tabok sa Jordan, Galilea sa mga dili Judio! Ang mga tawo nga nagpuyo sa kangitngit nakakitag dakong kahayag! Kanila nga nagpuyo sa mangitngit nga yuta sa kamatayon modan-ag ang kahayag!" Sukad niadto si Jesus nagwali nga nag-ingon, "Hinulsoli ang inyong mga sala, kay hapit na maghari ang Dios!"