PAGBASA GIKAN SA IKADUHANG BASAHON NI SAMUEL
2 Sm. 1:1-4, 11-12, 19, 23-27
Sa patay na si Saul mipauli si David sa Siklag human niya malaglag ang mga Amalekanhon, ug didto nagpabilin siyag duha ka adlaw. Sa ikatulo ka adlaw miabot ang usa ka tawo gikan sa kampo ni Saul. Gigisi niya ang iyang bisti ug gibutangag lapok ang iyang ulo aron pagpakita sa iyang kasub-anan. Mihapa siya sa atubangan ni David agig pagtahod. Gipangutana siya ni David, "Diin ka man gikan?" Mitubag siya, "Mieskapo ako gikan sa kampo sa mga Israelita." "Suginli ako sa nahitabo," miingon si David. Mitubag siya, "Nanibog sa natad sa panggubatan ang mga sundalo, ug daghan ang nangapukan ug nangamatay lakip si Saul ug ang iyang anak nga si Jonatan. Unya gigisi ni David ang iyang bisti. Gigisi usab sa iyang mga sakop ang ilang bisti. Nagbangotan sila-ug nanghilak ug nagpuasa hangtod sa pagkagabii tungod kang Saul ug kang Jonatan nga iyang anak ug sa mga tawo sa Ginoo ug alang sa banay sa Israel, kay sila nangamatay man sa gubat. Ang pangulo mo, O Israel, gipatay didto sa imong kabungtoran! Nangapukan ang mga bayani! "Si Saul ug si Jonatan naghigugmaay ug angay'ng higugmaon! Wala sila magkabulag sa kinabuhi ug sa kamatayon; mas tulin silang molupad kay sa mga agila ug mas kusgan kay sa mga liyon." "Mga babaye sa Israel, hilaki ninyo si Saul, nga naghatag kaninyog bisting pula, ug mibutang ug mga dayandayan nga bulawan sa inyong sinina." "Nganong nangapukan man ang mga bayani didto sa panggubatan? Namatay si Jonatan ibabaw sa kabungtoran." "Naguol ako pag-ayo kanimo, igsuon kong Jonatan gimahal ko ikaw! Ug ang gugma mo kanako labaw pa sa gugma sa babaye." "Nganong nangapukan man ang mga bayani ug nahibilin sa panggubatan ang ilang mga hinagiban sa gubat?"
ANG PULONG SA GINOO.
SALAMAT SA DIOS.
SALMO RESPONSORYO
Ps. 80:2-3, 5-7
R. Pakitaa kami sa imong nawong, O Ginoo, ug mangaluwas kami.
O Magbalantay sa Israel, pamati, O giya sa panon ni Jose! Gikan sa imong trono ibabaw sa kerubin, padan-ag, atubangan ni Efraim, Benjamin ug Manasis. Pukawa ang imong gahom, ug umari ka aron pagluwas kanamo. (R)
O Ginoo sa kagahuman, hangtod kanus-a mosilaob ka sa kapungot samtang nagaampo ang imong katawhan? Gipakaon mo sila sa pan sa mga luha ug gitagaan mo sila og mga luha aron ilang imnon. Gibiyaan mo kami aron awayan sa among mga kasilinganan ug nagabugalbugal kanamo ang among mga kaaway. (R)
PAGBASA SA SANTOS NGA EBANGHELYO SUMALA NI SAN MARKOS
Mk. 3:20-21
Unya mipauli si Jesus sa ila ug nagkatigom na usab didto ang dakong panon sa katawhan ug tungod niini, si Jesus ug ang iyang mga tinun-an wala na gani higayon sa pagpangaon. Sa pagkasayod niini sa iyang mga kabanay, nangadto sila aron pagkuha kaniya kay ang mga tawo nag-ingon man nga nabuang siya.
ANG EBANGHELYO SA GINOO.
DAYGON IKAW, O KRISTO.
