🟢 Biyernes sa Ikaduhang Semana sa Tuig

PAGBASA GIKAN SA UNANG BASAHONNI SAMUEL

1 Sm. 24:3-21

Unya miadto si Saul sa mga toril sa karnero nga duol sa agianan diin may langob ug misulod siya niini tungod sa sugo sa lawas. Ning higayona si David ug ang iyang mga tawo naglingkod sulod sa kinasuokan sa langob. Giingnan si David sa iyang mga tawo, "Ania na ang higayon nga giingon sa Ginoo kanimo nga itugyan niya kanimo ang imong kaaway ug ikaw nay maantigo kaniya." Unya mitindog si David ug sa hilom gitabasan niya ang bisti ni Saul. Apan human kini mabuhat ni David, nagbasol siya. Giingnan niya ang iyang mga tawo, "Dili buot ang Ginoo nga patyon ko ang akong agalon kay pinili man siya sa Ginoo." Pinaagi niini, nadani ni David ang iyang mga tawo sa dili pagpatay kang Saul. Unya mitindog si Saul ug mibiya sa langob ug mipadayon sa iyang lakaw. Unya migula usab si David sa langob, ug gitawag niya si Saul, "Agalon kong hari!" Ug sa paglingi ni Saul sa iyang luyo, miyukbo si David, ug miingon kang Saul, "Nganong nagpadani ka man sa mga sugyot sa mga tawo nga nag-ingon nga dautan akog tuyo kanimo? Karon nasayran mo na gayod nga gitugyan ka na sa Ginoo kanako ug pipila sa akong mga sakop nagsugyot kanako sa pagpatay kanimo, apan wala ko ikaw patya kay dili ako makaako pagpatay sa akong agalon kay pinili ka man sa Ginoo. Tan-awa, Kamahalan, kining tinabas nga akong gigunitan aron masayod ka nga wala akoy tinguha sa pagbudhi kanimo; gikan kini sa imong sidsid. Wala ako makasala kanimo, apan nagtinguha ka sa pagpatay kanako. Ang Ginoo maoy maghukom kanato; siya maoy maantigong manimalos apan dili ko gayod bakyawon ang akong kamot batok kanimo. Sumala sa karaang sanglitanan, 'Ang tawong dautan magbuhat og dautan;' ug busa dili ko ikaw pasipad-an. Kinsa may gipangita ug gigukod sa hari sa Israel? Usa ba ka patay nga iro o pulgas? Ang Ginoo ray maghukom kanato; siya ang manalipod ug magluwas kanako gikan kanimo." Human makasulti si David niini, si Saul miingon, "Ikaw ba kana, David, anak ko?" Ug mihilak si Saul. Miingon siya kang David, "Mas matarong ka pa kay kanako, kay gibaslan mo mag maayo ang akong pagkadautan. Gipakita mo ang imong kaayo kanako kay wala mo man ako patya bisag gitugyan ako sa Ginoo kanimo. Mahitabo ba god nga ang usa ka tawo nga makahigayon pagpatay sa iyang kaaway dili mopatay kaniya? Gantihan ka unta sa Ginoo sa kaayo nga gipakita mo kanako niining adlawa. Karon nasayod ako nga ikaw mahimo gayong hari, ug nga ang gingharian sa Israel malig-on ubos sa imong pagdumala. Busa ipanumpa kanako sa ngalan sa Ginoo nga dili mo pamatyon ang akong mga kaliwat ug dili wagtangon ang akong ngalan gikan sa banay sa akong amahan."

SALMO RESPONSORYO

Ps. 57:2, 3-4, 6, 11

R. Kaloy-i ako, O Dios, kaloy-i ako.

Kaloy-i ako, O Dios, kaloy-i ako, kay kanimo nagadangop ako. Diha sa landong sa imong mga pako nagadangop ako, hangtod nga molabay ang kadaot. (R)

Magsangpit ako sa Dios ang Labing Halangdon sa Dios nga naghimo kanakog kaayohan, magpadala unta siya gikan sa langit ug magluwas kanato; iya unta himoong salawayon sila nga nagayatak kanako; magdala unta ang Dios sa iyang kaluoy ug sa iyang pagkamatinud-anon. (R)

Ibayaw ko unta labaw sa kalangitan, O Dios; labaw sa tibuok kalibutan ang imong himaya. Kay ang imong kaluoy miabot hangtod sa kalangitan, ug ang imong kamatinud-anon hangtod sa kapanganoran. (R)

PAGBASA SA SANTOS NGA EBANGHELYO SUMALA NI SAN MARKOS

Mk. 3:13-19

Unya mitungas si Jesus sa bungtod ug gitawag niya ang mga tawo nga buot niyang pilion. Nanuol sila kaniya, ug nagpili siyag napulog-duha nga iyang gitawag og mga apostoles. Miingon siya kanila, "Gipili ko kamo aron makig-uban kanako ug ipadala ko kamo aron pagwali, ug makabaton kamog gahom sa pag-abog sa mga yawa." Mao kini sila ang napulog-duha nga iyang gipili: si Simon (ginganlan ni Jesus og Pedro); si Santiago ug si Juan, mga anak ni Sebedeo (ginganlan sila ni Jesus ug Boanerges, nga sa ato pa, "Mga Anak sa Dalugdog"); si Andres, si Felipe, si Bartolome, si Mateo, si Tomas, si Santiago nga anak ni Alfeo, si Tadeo, si Simon nga patriyota, ug si Judas Iscariote, nga nagbudhi kaniya.