PAGBASA GIKAN SA UNANG BASAHON NI SAMUEL
1 Sm. 18:6-9; 19:1-7
Usa ka adlaw niana, samtang namauli si David ug si Saul gikan nga nakiggubat sa mga Filistihanon,. gisugat sila sa kababayen-an gikan sa mga siyudad sa Israel; nag-awit ug nagsayaw sila dinuyogan sa mga tambor ug uban pang mga tulonggon. Ug sa ilang panaglipay, nag-awit sila. "Linibo ang napatay ni Saul, apan tinagpulo ka libo ang napatay ni David." Tungod niini nasuko pag-ayo si Saul ug siya miingon, "Nganong nag-ingon man sila nga tinagpulo ka libo ang napatay ni David, samtang linibo lamang ang akong napatay? Dili madugay panag-iyahon na niya kining akong gingharian." Ug sukad niadtong adlawa gibantayan ni Saul si David. Unya gisugo ni Saul si Jonatan nga iyang anak ug ang tanan niyang mga suluguon sa pagpatay kang David. Apan si Jonatan nagmahal pag-ayo kang David. Ug gisultihan ni Jonatan si David, "Ang akong amahan buot mopatay kanimo; busa pagmatngon ug tago ugma sa buntag. Unya muadto ako sa uma diin ka magtago ug makigsulti ako sa akong amahan didto mahitungod kanimo. Kon aduna akoy masayran pahibaw-on ko ikaw." Ug gidayeg pag-ayo ni Jonatan si David atubangan sa iyang amahan ug giingnan niya, "Nganong gusto nimong patyon ang imong alagad nga si David nga wala man siya makasala kanimo ug maayo man ang iyang pag-alagad kanimo? Gisugal niya ang iyang kinabuhi aron pagpatay kang Goliat ug gipadaog sa Ginoo ang Israel. Nakita mo kini ug nalipay ka, busa ngano man nga imong patyon siya nga wala man unta siya makasala kanimo?" Namati si Saul kang Jonatan, ug iyang gipanumpa sa Ginoo nga dili niya patyon si David. Gitawag ni Jonatan si David ug gisuginlan niya niining tanan. Ug gidala ni Jonatan si David ngadto kang Saul, ug didto siya nag-alagad na usab kang Saul.
ANG PULONG SA GINOO.
SALAMAT SA DIOS.
SALMO RESPONSORYO
Ps. 56:2-3, 9-10, 10-11, 12-13
R. Sa Dios nagasalig ako; dili ako malisang.
Kaloy-i ako, O Dios, kay giyatakan ako sa mga tawo; sa tanang adlaw nakigbisog sila batok kanako. Giyatakan ako sa akong mga kaaway sa tibuok adlaw; Oo, daghan ang makig-away kanako. (R)
Ang akong paglakaw-lakaw imong giihap ang akong mga luha gitigom sa imong sudlanan; wala ba sila itali sa imong basahon? Unya manibog ang akong mga kaaway. Kon ako magsangpit na kanimo. (R)
Karon sayod ako nga ang Dios uban diha kanako. Sa Dios, kansang saad nagapasigarbo ako, sa Dios nagasalig ako sa walay kahadlok; unsay mahimo sa tawo batok kanako. (R)
Nabugkosan ako, O Dios, sa mga panaad ngadto kanimo; tumanon ko ang imong mga halad sa pasalamat. Kay giluwas mo ako sa kamatayon, ang ako usab nga mga tiil, sa pagkalukapa; aron maglakaw ako atubangan sa Dios diha sa kahayag sa mga buhi. (R)
PAGBASA SA SANTOS NGA EBANGHELYO SUMALA NI SAN MARKOS
Mk. 3:7-12
Si Jesus ug ang iyang mga tinun-an nangadto sa Lanaw sa Galilea, ug gisunod siya sa usa ka dakong panon sa mga tawo. Kining mga tawhana naggikan sa Galilea, sa Judea, sa Jerusalem, sa mga dapit nga sakop sa Edumea ingon man sa tabok sa Jordan, ug sa kasikbit nga mga dapit sa siyudad sa Tiro ug sa Sidon. Nangadto sila kang Jesus kay nakadungog man sila sa mga butang nga iyang gibuhat. Hilabihan kadaghan ang mga tawo ug tungod niini si Jesus nagsugo sa iyang mga tinun-an sa pag-andam og sakayan alang kaniya, aron dili siya mapiit sa mga tawo. Daghang mga tawo ang iyang giayo ug ang tanan nga may balatian nag-ilogay pagduol aron makahikap kaniya. Sa dihang nakit-an si Jesus sa mga tawong giyawaan, nanghapa sila sa iyang atubangan ug naninggit, "Ikaw mao ang Anak sa Dios!" Apan gipahimangnoan pag-ayo ni Jesus ang mga yawa nga dili sila manugilon kon kinsa siya.
ANG EBANGHELYO SA GINOO.
DAYGON IKAW, O KRISTO.
