PAGBASA GIKAN SA UNANG BASAHON NI SAMUEL
1 Sm. 17:32, 33, 37, 40-51
Si Saul giingnan ni David, "Dili ka angay mabalaka kay kining imong suluguon maoy moasdang niining Filistihanon." Ug si David giingnan ni Saul, "Dili ka takos nga makig-away nianang Filistihanon kay bata ka pa, samtang siya anad na sa gubat sukad pa sa iyang pagkabatan-on." Ug midugang si David, "Giluwas ako sa Ginoo gikan sa kuko ug baba sa mga liyon ug sa mga oso, ug luwason usab ako niya gikan niining Filistihanon." Miingon si Saul kang David, "Lakaw ug panalipdan ka unta sa Ginoo!" Unya gikuha niya ang iyang sungkod, ug nagpili siyag lima ka buok batong hamis didto sa suba, ug iya kining gisulod sa iyang puntil. Dala ang iyang lambuyog, miduol siya kang Goliat. Mitagbo usab kang David si Goliat, ug ang tigdala sa iyang kasangkapan sa gubat nag-una kaniya. Sa pagkakita ni Goliat kang David, nakaminos siya kang David kay batan-on pa man si David ug pulapulag aping ug guwapo. Unya iyang giingnan si David, "Iro ba ako nga imo lamang hadlokon og bunal?" Ug gitunglo niya si David sa ngalan sa iyang mga dios. Miingon siya, "Duol kanako kay ipakaon ko sa mga langgam ug sa mga mananap ang imong unod." Unya giingnan ni David si Goliat, "Miduol ka kanako dala ang imong espada ug bangkaw, apan ako makigsangka kanimo sa ngalan sa Ginoo nga Labing Gamhanan, ang Dios sa kasundalohan sa Israel nga imong gipasipalahan. Niining adlawa itugyan ka kanako sa Ginoo ug patyon ko ikaw ug punggotan sa imong ulo; ipakaon ko sa mga langgam ug sa ihalas nga mga mananap ang mga patay'ng lawas sa kasundalohan sa mga Filistihanon aron ang tibuok kalibutan masayod nga may Dios sa Israel, ug aron ang tanan nga nagkatigom karon dinhi masayod nga ang Ginoo magluwas dili sa espada ug sa bangkaw, kay ang Ginoo maoy makig-away ug itugyan ka niya sa among kamot." Unya si Goliat midasdas kang David ug si David usab midali pagsugat kaniya. Mikuot si David ug bato sa iyang puntil ug gibutang niya kini sa iyang lambuyog ug gipanting niya ug naigo sa agtang si Goliat; nalubong sa iyang agtang ang bato ug nalukapa siya. Busa pinaagi sa lambuyog nabuntog ug gipatay ni David si Goliat; si David walay dalang espada. Unya midagan si David ngadto kang Goliat ug gilunggoan niya sa ulo si Goliat ginamit ang espada ni Goliat. Sa pagkakita sa mga Filistihanon nga patay na ang ilang sinaligan, nanagan sila.
ANG PULONG SA GINOO.
SALAMAT SA DIOS.
SALMO RESPONSORYO
Ps. 144:1, 2, 9-10
R. Daygon ang Ginoo, ang akong Bato.
Daygon unta ang Ginoo, akong Bato, nga nagabansay sa akong mga kamot alang sa away sa akong mga tudlo alang sa gubat. (R)
Ang akong dalangpanan ug akong kota, akong malig-ong salipdanan, akong manluluwas, ang akong taming nga akong gisaligan, nga nagabadlong sa katawhan ubos kanako. (R)
O Dios, awitan ko ikaw og bag-ong awit; sa lira nga may napulo ka koldas. Awitan ko ang imong pagdayeg, kanimo nga nagahatag og kadaugan sa mga hari; ug nagaluwas kang David, imong sulugoon. (R)
PAGBASA SA SANTOS NGA EBANGHELYO SUMALA NI SAN MARKOS
Mk. 3:1-6
Unya mibalik si Jesus sa sinagoga ug didtoy tawo nga kuyos og kamot. May mga tawo usab didto nga naniid pag-ayo kon ayohon ba ni Jesus ang tawo sa Adlaw'ng Igpapahulay aron aduna silay ikasumbong batok kaniya. Si Jesus miingon sa tawo nga kuyos og kamot, "Duol ngari sa atubangan." Unya iyang gipangutana ang mga tawo, "Unsa bay gitugot sa atong Balaod nga angay buhaton sa Adlaw'ng Igpapahulay? Ang pagtabang ba o ang pagdaot? Ang pagluwas ba sa kinabuhi sa tawo o ang pagpatay?" Apan wala sila motubag. Tungod niini naglagot si Jesus samtang nagtan-aw kanila, apan nasubo usab siya tungod sa ilang pagkasayop ug pagkagahig ulo. Unya iyang giingnan ang tawo, "Ituy-od ang imong kamot." Gituy-od sa tawo ang iyang kamot ug naayo kini. Busa nanggula sa sinagoga ang mga Pariseo ug nakigkita dayon sa mga sakop sa pundok ni Herodes, ug ilang gilaraw ang pagpatay kang Jesus.
ANG EBANGHELYO SA GINOO.
DAYGON IKAW, O KRISTO.
