🟢 Martes sa Ikaduhang Semana sa Tuig

PAGBASA GIKAN SA UNANG BASAHON NI SAMUEL

1 Sm. 16:1-13

Ang Ginoo nangutana kang Samuel, "Magsigi ka ba lamang ug subo tungod sa akong pagsalikway kang Saul ingon nga hari sa Israel? Pun-ag lana ang imong sudlanan nga sungay, ug lakaw ngadto kang Isai nga taga-Betlehem, kay gipili kong hari ang usa sa iyang mga anak." Si Samuel miingon, "Unsaon ko man pag-adto? Kon hisayran kini ni Saul, patyon niya ako." Apan giingnan siya sa Ginoo, "Pagdala ug nating baka ug kon pangutan-on ka, ingna, 'Ania ako aron paghalad og mananap nga sunogon alang sa Ginoo! Ug dapita si Isai sa pagtambong sa paghalad, kay didto sultihan ko ikaw sa angay mong buhaton; ug dihogi ang tawo nga akong itudlo ingon nga hari." Gituman ni Samuel ang gisugo kaniya sa Ginoo, ug miadto siya sa Betlehem. Gisugat siya sa mga kadagkoan sa siyudad ug nagkurog sila ug miingon kaniya, "Kalinaw bay imong tuyo kanamo?" Miingon siya, "Oo, ania ako aron paghalad og mananap nga sunogon alang sa Ginoo. Hinloi ninyo ang inyong kaugalingon, ug tambong kamo sa paghalad." ad." Unya gipanalanginan niya si Isai ug ang iyang mga anak, ug gidapit niya sila pagtambong sa paghalad. Sa pag-abot gayod nila, si Samuel nakakita sa anak ni Isai nga si Eliab ug nagtuo siya nga ang pinili sa Ginoo mao ang diha sa iyang atubangan. Apan ang Ginoo miingon kang Samuel, "Ayaw pagtan-aw sa iyang panagway ni sa iyang gitas-on kay dili siya maoy akong napilian; ang Ginoo dili sama sa tawo nga ang gitan-aw mao ang panagway ug dili ang kasingkasing." Unya gitawag ni Isai ang iyang anak nga si Abinadab, ug iyang gipalabay atubangan ni Samuel. Si Samuel miingon, "Dili usab siya maoy napili sa Ginoo." Unya gipalabay ni Isai atubangan ni Samuel si Sama ug miingon gihapon si Samuel, "Dili siya maoy napili sa Ginoo." Ug gipalabay ni Isai atubangan ni Samuel ang pito niya ka anak ug si Samuel miingon, "Dili kini sila maoy napili sa Ginoo." Unya giingnan ni Samuel si Isai, "Ania ba dinhi ang tanan mong anak?" Si Isai mitubag, "Wala dinhi ang kamanghoran; nagbantay siya sa mga karnero." Giingnan ni Samuel si Isai, "Ipakuha siya, kay dili kita maghalad hangtod nga muabot siya." Busa gipakuha ni Isai ang kamanghoran. Pulapula siyag nawong, nindot siyag mata, ug guwapo. Miingon ang Ginoo kang Samuel, "Hala, dihogi siya kay mao kini siya ang akong napili." Unya gikuha ni Samuel ang sungay nga gisudlag lana, ug iyang gidihogan si David atubangan sa iyang mga igsuon; ug mikunsad kang David ang espiritu sa Ginoo ug nagpabilin kini kaniya sukad niadtong adlawa. Unya miadto si Samuel sa Rama.

SALMO RESPONSORYO

Ps. 89:20, 21-22, 27-28

R. Hikaplagan ko si David, akong suluguon.

Misulti ikaw kaniadto diha sa usa ka talan-awon; ug sa mga nagtuo kanimo miingon ikaw: "Sa usa ka hawod akong gibutang ang usa ka purongpurong sa katawhan akong gibutang ang usa ka batan-on." (R)

Hikaplagan ko si David akong suluguon; sa akong balaan nga lana gidihogan ko siya, aron ang akong kamot sa kanunay maanaa uban kaniya ug ang akong bukton maghimo kaniyang makusganon. (R)

Moingon siya kanako, "Ikaw ang akong Amahan akong Dios, ang Bato, ang akong Manunubos," ug himuon ko siya nga panganay ang labaw sa mga hari sa yuta. (R)

PAGBASA SA SANTOS NGA EBANGHELYO SUMALA NI SAN MARKOS

Mk. 2:23-28

Usa niana ka Adlaw'ng Igpapahulay, nahiagi si Jesus ug ang iyang mga tinun-an sa kaumahan sa trigo. Samtang naglakaw sila, ang iyang mga tinun-an nangutlog mga uhay sa trigo. Busa ang mga Pariseo miingon kang Jesus, "Tan-awa ra, supak sa atong Balaod kining gibuhat sa imong mga tinun-an sa Adlaw'ng Igpapahulay!" Si Jesus mitubag, "Wala ba kamo makabasa sa gibuhat ni David sa dihang gigutom siya ug ang iyang mga kauban? Misulod siya sa balay sa Dios ug mikaon sa pan nga gihalad sa Dios. Kini nahitabo sa panahon nga si Abiatar mao ang Pangulong Pari. Sumala sa atong Balaod, ang mga pari lamang maoy makakaon niining pan nga hinalad, apan si David mikaon niini ug iya pa ganing gipakaon ang iyang mga kauban." Ug unya miingon si Jesus, "Ang Adlaw'ng Igpapahulay gibuhat alang sa kaayohan sa tawo, apan wala buhata ang tawo alang sa Adlaw'ng Igpapahulay. Busa ang anak sa Tawo maoy magbuot sa angay buhaton bisan sa Adlaw'ng Igpapahulay."