PAGBASA GIKAN SA UNANG BASAHON NI SAMUEL
1 Sm. 15:16-23
Miingon si Samuel kang Saul, "Igo na! Sultihan ko ikaw sa giingon kanako sa Ginoo kagabii." Ug miingon si Saul, "Sigi, sultihi ako." Ug miingon si Samuel, "Bisag miila ka sa imong kaiwit, gipili ka sa Ginoo ingon nga hari sa mga banay sa Israel. Gisugo ka sa Ginoo pagpatay sa mga makasasala nga mao ang mga Amalekanhon. Apan nganong wala mo man tumana ang sugo sa Ginoo? Nganong nagpahimulos ka man hinoon sa mga butang nga gipamiyaan sa mga kaaway, ug sa ingon gibuhat mo ang dautan sa atubangan sa Ginoo?" Mitubag si Saul kang Samuel, "Gituman ko ang sugo sa Ginoo ug nabihag ko si Agag, ang hari sa mga Amalekanhon, ug gipamatay ko ang mga Amalekanhon. Apan ang akong mga sakop nanguha sa mga butang sa kaaway aron ihalad sa Ginoo nga imong Dios dinhi sa Gilgal. Gikuha nila ang mga karnero, mga baka, ug ang labing maayong mga butang nga angay unta laglagon." Si Samuel miingon, "Mas kahimut-an ba sa Ginoo ang mga gasa ug ang mga halad-mananap nga sunogon kay sa pagtuman sa iyang kabubut-on? Timan-i nga ang pagsugot mas maayo pa kay sa halad-mananap nga sunogon, ug ang pagtuman sa pulong sa Ginoo kay sa tambok sa karnero. Ang pagkamasupilon sama ra sa sala sa pagdiwata, ug ang pagkagahig ulo sama sa sala sa pagsimbag diosdios. Kay gisalikway mo man ang kabubut-on sa Ginoo, gihukasan ka niya sa imong pagkahari."
ANG PULONG SA GINOO.
SALAMAT SA DIOS.
SALMO RESPONSORYO
Ps. 50:8-9, 16-17, 21, 23
R. Sa matarong akong ipakita ang makaluluwas nga gahom sa Dios.
Dili tungod sa imong mga sakripisyo gibadlong ko ikaw, kay ang imong mga halad anaa sa akong atubangan kanunay. Wala ako magkuha og toro gikan sa imong balay, ni mga kanding gikan sa imong panon. (R)
Nganong gibungat mo man ang akong mga kasugoan, ug giangkon sa imong baba ang akong kasabutan, bisan kon gidumtan mo ang pagpanton ug gilabog mo ang akong mga pulong diha sa imong luyo? (R)
Sa pagbuhat nimo niining mga butanga, magpakabungol ba lamang ako? O naghunahuna ka ba nga sama ako kanimo? Badlongon ko ikaw diha sa pagpahinumdom ko kanila sa imong atubangan. Ang magahalad og pagdayeg agig sakripisyo gahimaya kanako ug kaniya nga nagalakaw sa matarong akong ipakita ang kaluwasan sa Dios. (R)
PAGBASA SA SANTOS NGA EBANGHELYO SUMALA NI SAN MARKOS
Mk. 2:18-22
Usa ka higayon niana, nagpuasa ang mga sumusunod ni Juan nga Magbubunyag ug ang sa mga Pariseo. Ug may pipila ka mga tawo nga miadto kang Jesus ug nangutana kaniya, "Nganong nagpuasa man ang mga tinun-an ni Juan nga Magbubunyag ug ang sa mga Pariseo apan ang imoha wala?" Mitubag si Jesus, "Magpuasa ba diay ang mga dinapit sa kombira sa kasal samtang ang pamanhonon uban pa kanila? Dili gayod! Apan kon kuhaon na ang pamanhonon, anha pa sila magpuasa." "Walay mogamit og bag-ong panapton aron itapak sa gisi sa daang bisti. Kay kon buhaton niya kini, ang bag-ong panapton makagisi sa daang bisti, ug molabi pa kadako ang gisi. Ug walay magsulod og bag-ong bino diha sa daang sudlanan nga panit, tungod kay ang bag-ong bino makagisi sa daang sudlanan, ug unya madaot ang sudlanan ug mausik ang bino. Busa kinahanglan bag-ong panit ang gamiton alang sa bag-ong bino!"
ANG EBANGHELYO SA GINOO.
DAYGON IKAW, O KRISTO.
