PAGBASA GIKAN SA UNANG BASAHON NI SAMUEL
1 Sm. 9:1-4, 17-19; 10:1
May taga-Benjamin nga ginganlag Kis nga anak ni Abiel ug apo ni Seror. Si Seror anak ni Bekorat nga kaliwat ni Apia. Dato kaayo si Kis. May anak siya nga ginganlag Saul, batan-on ug guwapo. Sa Israel walay makalabaw kaniya sa kaguwapo. Sa gitas-on siyay labing taas kay ang uban taga-abaga man lamang niya. Usa ka adlaw niana, nawala ang mga asno ni Kis nga amahan ni Saul. Busa giingnan ni Kis si Saul, "Pauban og suluguon ug pangitaa ang mga asno." Miagi sila sa kabukiran sa Efraim ug sa yuta sa Salisa, apan wala nila hikaplagi ang mga asno. Unya miadto sila sa yuta sa Saalim, apan wala gihapon nila hikit-i didto. Unya gilukop nilag suroy ang yuta sa Benjamin, apan wala gayod nila hikaplagi ang mga asno. Sa pagkakita ni Samuel kang Saul, giingnan siya sa Ginoo, "Mao kining tawhana ang giingon ko kanimo nga maghari sa akong katawhan." Unya miduol si Saul kang Samuel didto sa ganghaan ug miingon kaniya, "Tudlo-i ako sa balay sa mananagna." Mitubag si Samuel kang Saul, "Ako ang mananagna. Pag-una kanako ngadto sa bungtod kay karong adlawa makigsalo ako kanimo, ug sa pagkabuntag palakton ko ikaw ug suginlan sa tanan nga anaa sa imong hunahuna. Unya mikuha si Samuel og usa ka diyotay'ng tibod nga lana ug gibubo niya kini sa ulo ni Saul, ug gihagkan niya siya ug giingnan, "Gidihogan ka sa Ginoo aron mahimo kang pangulo sa iyang katawhan, ang Israel. Maghari ka sa katawhan sa Ginoo ug luwason mo sila sa mga kaaway nga naglibot kanila. Ug mao kini ang timaan nga ang Ginoo maoy nagdihog kanimo ug naghimo kanimong pangulo sa iyang katawhan."
ANG PULONG SA GINOO.
SALAMAT SA DIOS.
SALMO RESPONSORYO
Ps. 21:2-3, 4-5, 6-7
R. Ang Ginoo, ang imong kusog naghatag og kalipay sa Hari.
O Ginoo, sa imong kusog ang hari nalipay; sa imong kadaugan nagsadya siya pag-ayo! Gihatagan mo siya sa gipangandoy sa iyang kasingkasing, wala mo siya did-i sa tinguha sa iyang mga ngabil. (R)
Kay gidawat mo siya uban sa daghang panalangin, gibutangan mo ang iyang ulo og purongpurong sa lubos nga bulawan. Nangayo siya kanimo sa kinabuhi; gihatagan mo siya sa hataas nga mga adlaw hangtod sa kahangturan. (R)
Dako ang iyang himaya diha sa imong kadaugan; kahalangdon ug kasanag imong gitoga kaniya. Kay imo siyang gihimo nga usa ka panalangin sa kahangturan, gilipay mo siya sa kalipay sa imong atubangan. (R)
PAGBASA SA SANTOS NGA EBANGHELYO SUMALA NI SAN MARKOS
Mk. 2:13-17
Si Jesus mibalik na usab sa daplin sa Lanaw sa Galilea. Ug may panon sa katawhan nga midugok kaniya ug gitudloan niya sila. Unya, samtang naglakaw siya, nakita niya ang usa ka kobrador sa buhis nga si Levi, anak ni Alfeo, naglingkod didto sa iyang opisina. Miingon si Jesus kaniya, "Sunod kanako." Ug mitindog si Levi ug misunod kaniya. Wala madugay mikaon si Jesus didto sa balay ni Levi. Dihay daghang mga kobrador sa buhis ug mga makasasala nga misunod kang Jesus, ug pipila kanila nakigsalo kaniya ug sa iyang mga tinun-an. Sa maong dapit may mga magtutudlo sa Balaod nga mga Pariseo, ug nakakita sila kang Jesus nga nakigsalo niining mga kobrador sa buhis ug sa mga makasasala. Busa nangutana sila sa mga tinun-an ni Jesus, "Nganong nakigsalo man siya sa mga kobrador sa buhis ug sa mga makasasala?" Nakadungog si Jesus kanila ug mitubag, "Wala magkinahanglan og mananambal ang mga tawo nga maayog lawas, kondili ang mga masakiton lamang. Wala ako moanhi sa pagdapit sa mga matarong, kondili sa mga makasasala."
ANG EBANGHELYO SA GINOO.
DAYGON IKAW, O KRISTO.
