🟢 Biyernes sa Unang Semana sa Tuig

PAGBASA GIKAN SA UNANG BASAHON NI SAMUEL

1 Sm. 8:4-7, 10-22

Usa ka adlaw niana, nagtigom ang mga kadagkoan sa Israel. Unya nangadto sila kang Samuel didto sa Rama, ug giingnan nila siya, "Tigulang ka na ug ang imong mga anak wala magsunod sa imong mga lakang, busa pagtudlog hari nga magmando kanamo sama sa gibuhat sa ubang mga nasod." Nakapasubo kang Samuel ang ilang pagpangayog hari, ug nag-ampo siya sa Ginoo. Ang Ginoo miingon kaniya, "Tumana ang tanan nga gihangyo sa katawhan kanimo kay dili ka maoy gisalikway nila, kondili ako kay dili man sila buot nga ako maoy maghari kanila. Busa gipahayag ni Samuel ang tanan nga giingon sa Ginoo ngadto sa mga tawo nga nangayo kaniyag hari. Giingnan niya sila, "Mao kini ang buhaton sa hari nga magmando kaninyo: kuhaon niya ang inyong mga anak nga lalaki ug himuon niya sila nga tigmaniho sa iyang mga karwahe ug mga sundalo nga magkabayo, ug mag-una sila sa iyang mga karwahe. Magtudio siyag mga komandante sa linibo ka sundalo ug sa tagkalim-an, ug ang uban magdaro ug mag-ani sa iyang kaumahan. Ang uban himuon niyang tiggama sa mga galamiton sa gubat ug sa mga kahimanan sa iyang mga karwhe. Ang inyong mga anak nga babaye himuon niyang mga kusinera ug mga panadera ug tiggama sa mga pahumot. Unya kuhaon niya ang labing maayo sa inyong mga kaumahan, mga parasan ug kaolibohan ug ihatag niya kini sa iyang mga opisyal. Kuhaon pa gayod niya ang usa sa napulo ka bahin sa inyong trigo ug bino ug ihatag niya kini sa iyang mga opisyal. Unya kuhaon niya ang inyong mga suluguon ug ang labing tambok sa inyong kahayopan ug gamiton niya sa pagtrabaho. Kuhaon niya ang ikapulo sa inyong kahayopan ug kamo iyang ulipnon. Ug niadtong mga adlawa manghilak kamo tungod sa hari nga inyong gipangayo; apan dili kamo kaloy-an sa Ginoo." Apan ang katawhan wala mamati kang Samuel ug sila miingon kaniya, "Gusto kamig hari aron mahisama kami sa ubang mga nasod. Gusto kamig hari nga magmando ug mangulo kanamo sa panggubatan." Human mabati ni Samuel ang giingon sa katawhan, gisugilon niya sa Ginoo kining tanan. µg ang Ginoo miingon kang Samuel, "Tumana ang ilang hangyo ug hatagi silag hari." Unya giingnan ni Samuel ang katawhan sa Israel, "Pamauli na kamo sa inyong siyudad."

SALMO RESPONSORYO

Ps. 89:16-17, 18-19

R. Sa kanunay awiton ko ang kaayo sa Ginoo.

Bulahan ang lungsod nga nakaila sa masadya nga singgit; diha sa kahayag sa imong nawong, O Ginoo nagalakat sila. Sa imong ngalan nagasadya sila sa tibuok adlaw, ug pinaagi sa imong katarong gibayaw sila. (R)

Kay ikaw ang kasanag sa ilang kusog, ug tungod sa imong kaluoy gibayaw ang among gahom. Kay ang Ginoo mao ang among taming, ug iyaha sa Balaan sa Israel, ang among hari. (R)

PAGBASA SA SANTOS NGA EBANGHELYO SUMALA NI SAN MARKOS

Mk. 2:1-12

Paglabay sa pipila ka adlaw mipauli si Jesus sa Capernaum, ug gidungog nga siya diha na sa ila. Busa nanugok ang daghan kaayong mga tawo ug tungod niini wala nay luna sa balay nga ilang kasudlan, bisan gani diha duol sa pultahan. Samtang si Jesus nagwali sa Maayong Balita, may nangabot nga nagdalag usa ka paralitiko nga giyayongan og upat ka tawo. Tungod sa kadaghan sa mga tawo, wala sila makaduol kang Jesus. Busa giukab nila ang usa ka bahin sa atop sa tungod gayod ni Jesus, ug ilang gitunton ang paralitiko nga naghigda sa iyang higdaanan. Nakita ni Jesus nga dako kaayo ang ilang pagtuo kaniya, busa miingon siya sa paralitiko, "Anak, gipasaylo na ang imong mga sala." May pipila ka mga magtutudlo sa Balaod nga naglingkod didto, ug nakaingon sa ilang kaugalingon, "Nganong nangahas man siya pagpasipala sa Dios? Walay tawo nga makapasaylog sala, kondili ang Dios lamang!" Apan nasabot dayon ni Jesus ang ilang gihunahuna, busa miingon siya kanila, "Nganong naghunahuna man kamo sa ingon? Hain may masayon: ang pag-ingon ba ngadto sa paralitiko, 'Ang imong mga sala gipasaylo na,' o ang pag-ingon, 'Bangon, dad-a ang imong gihigdaan ug lakaw'? Karon, ipaila ko kaninyo nga ang Anak sa Tawo adunay gahom dinhi sa yuta sa pagpasaylog sala." Busa miingon siya sa paralitiko, "Bangon, dad-a ang imong gihigdaan ug pauli sa inyo!" Samtang nagtan-aw silang tanan, mibangon ang paralitiko, gialsa niya ang iyang gihigdaan, ug midali paglakaw. Hilabihan ang katingala sa mga tawo ug gidayeg nila ang Dios. Sila miingon, "Sukad masukad karon pa kita makakitag hitabo nga sama niini!"