PAGBASA GIKAN SA UNANG BASAHON NI SAMUEL
1 Sm. 1:9-20
Usa ka adlaw niana, tapos sila makakaon didto sa Silo, mitindog si Ana. Si Eli, ang pari, naglingkod duol sa haligi sa ganghaan sa templo sa Ginoo. Labing guola ni Ana ug nag-ampo siya sa Ginoo, ug naghilak pag-ayo. Nanaad siya ug miingon, "O Ginoo nga Labing Gamhanan, kon tagdon mo ang kasubo sa imong suluguon, ug hinumdoman mo ako ug hatagan mo akog anak nga lalaki, ihalad ko siya kanimo aron mag-alagad siya kanimo sa tibuok niyang kinabuhi, ug dili ko gayod siya patupihan." Ug samtang siya nag-ampo sa Ginoo, gipanid-an ni Eli ang baba ni Ana. Nag-ampo si Ana sa hilom. Ang mga ngabil lamang niya nagkibot-kibot ug wala mabati ang iyang tingog, busa nagtuo si Eli nga hubog si Ana. Ug giingnan niya siya, "Kanus-a ka man huwasi sa imong kahubog? Ayaw na pag-inom." Apan si Ana mitubag, "Dili ako hubog, apan may gikagul-an ako pag-ayo; wala ako makainom og bino o isog nga ilimnon, kondili nakigsulti ako sa Ginoo tungod sa akong kaguol. Ayaw isipa nga dautang babaye ang imong alagad, kay nagpahungaw lamang ako sa akong kabalaka ug kasubo." Unya mitubag si Eli, "Ayaw na kaguol; hatagan ka unta sa Dios sa Israel sa imong gihangyo kaniya." Ug miingon siya, "Hinaut unta nga kahimut-an mo kining imong suluguon." Unya milakaw si Ana ug mikaon, ug wala na siya magsubo. Unya mibangon sila sayo sa buntag ug misimba sa Ginoo; ug namauli sila sa ilang balay didto sa Rama. Nakighilawas si Elcana kang Ana ug ang Ginoo naluoy kang Ana, Sa pag-abot sa hustong panahon, nanamkon siya ug nanganak og lalaki nga ginganlan niyag Samuel, kay kining bataa iya mang pinangayo sa Ginoo.
ANG PULONG SA GINOO.
SALAMAT SA DIOS.
SALMO RESPONSORYO
1 Sm. 2:1, 4, 5, 6-7, 8
R. Ang akong kasingkasing, nalipay diha sa Ginoo nga akong Manunubos.
Ang akong kasingkasing nalipay diha sa Ginoo, ang akong gahom gibayaw diha sa akong Dios. Akong gibuntog ang akong mga kaaway; nalipay ako sa akong kadaugan. (R)
Ang mga pana sa gamhanan nangabali samtang ang mahuyang nagabakos og kusog. Ang mga busog nagpasuhol og pan samtang ang mga gutom nabuhon sa inagaw. Ang landay nga asawa nanganak og pito ka anak samtang ang inahan sa daghan nangamingaw. (R)
Ang Ginoo nga patay ug nagahatag sa kinabuhi; nagabanlod siya ngadto sa kahiladman; ug nagabanhaw siya pag-usab. Ang Ginoo, nagahimo sa kabos ug nagahimo sa dato, siya nagahimo pagpaubos, ug siya usab ang nagabayaw. (R)
Iyang gibangon ang hangol gikan sa abog; gikan sa basurahan iyang giisa ang kabos, aron pagpalingkod kanila uban sa mga hamili ug paghimo og mahimayaong trono sa ilang kabilin. (R)
PAGBASA SA SANTOS NGA EBANGHELYO SUMALA NI SAN MARKOS
Mk. 1:21-28
Unya miabot sila sa lungsod sa Capernaum, ug sa pagkasunod nga Adlaw'ng Igpapahulay misulod si Jesus sa sinagoga ug nagtudlo. Ang mga tawo nga nakabati kaniya natingala sa iyang tinudloan, kay may gahom man siya sa iyang pagtudlo, ug dili sama sa mga magtutudlo sa Balaod. Unya may tawo nga giyawaan nga misulod sa sinagoga ug misinggit, "Unsay imong tuyo kanamo, Jesus nga Nazaretnon? Mianhi ka ba aron paglaglag kanamo? Nakaila ako nga ikaw mao ang Balaang Sinugo sa Dios!" Apan gibadlong ni Jesus ang yawa, "Hilom, ug gula nianang tawhana!" Gipakurog sa yawa ang tawo, unya misinggit og kusog ang yawa ug migula. Hilabihang kahibulong sa mga tawo nagpangutan-anay sila, "Unsa ba kini? Bag-ong pagtulon-an? Kining tawhana adunay gahom sa pagsugo sa mga yawa, ug sila motuman ra ba gayod kaniya!" Busa ang balita mahitungod kang Jesus daling mikaylap sa tanang dapit sa Galilea.
ANG EBANGHELYO SA GINOO.
DAYGON IKAW, O KRISTO.
