PAGBASA GIKAN SA UNANG BASAHON NI SAMUEL
1 Sm. 1:1-8
May tawo nga taga-Rama sa kabungtoran sa Efraim. Ang ngalan niya si Elcana, anak ni Jeroham, nga anak ni Elihu. Si Elihu anak ni Tohu nga anak ni Sup nga taga-Efraim. Si Elcana adunay duha ka asawa: Si Ana ug si Fenena. May mga anak si Fenena apan si Ana wala. Matag tuig mag-adtoan si Elcana sa Silo aron pagsimba ug paghalad ug mananap nga sunogon ngadto sa Ginoo nga Labing Gamhanan. Didto mag-alagad ingon nga mga pari ang duha ka anak ni Eli nga si Opni ug si Pinehas. Inighalad ni Elcana ug mga mananap nga sunogon, hatagan niyag usa ka bahin si Fenena ug tagsa usab ka bahin ang mga anak niya, apan bisag mas gihigugma niya si Ana hatagan lamang niyag usa ka bahin, kay wala man siya hatagi sa Ginoo ug anak. Tungod niini kanunay biaybiayon ni Fenena si Ana. Bugalbugalan siya ni Fenena matag higayon nga siya moadto sa balay sa Dios. Busa si Ana maghilak ug dili mukaon. Ug si Elcana, ang iyang bana, muingon kaniya, "Ana, nganong naghilak ka man ug dili ka man mokaon? Unsa may imong nagul-an? Dili ba diay mas bililhon pa ako alang kanimo kay sa napulo ka anak nga lalaki?"
ANG PULONG SA GINOO.
SALAMAT SA DIOS.
SALMO RESPONSORYO
Ps. 116:12-13, 14, 17, 18-19
R. Kanimo, O Ginoo, maghalad ako og sakripisyo sa pagdayeg.
Unsaon nako pagbalos ang Ginoo tungod sa tanang kaayohan nga iyang gibuhat kanako? Imnon ko ang kopa sa kaluwasan, ug sangpiton ko ang ngalan sa Ginoo. (R)
Tumanon ko ang akong mga panaad sa Ginoo sa atubangan sa tibuok niyang lungsod. Bililhon sa mga mata sa Ginoo ang kamatayon sa mga nagmakanunayon kaniya. O Ginoo, ako ang imong suluguon, ang anak sa imong alagad nga babaye; imong gilugti ang akong mga talikala. Kanimo akong ihalad ang sakripisyo sa pasalamat ug sangpiton ko ang ngalan sa Ginoo. (R)
Tumanon ko ang akong mga panaad sa Ginoo sa atubangan sa tibuok niyang lungsod. Diha sa kahawanan sa balay sa Ginoo, diha sa imong kataliwad-an, O Jerusalem. (R)
PAGBASA SA SANTOS NGA EBANGHELYO SUMALA NI SAN MARKOS
Mk. 1:14-20
Sa dihang nabilanggo na si Juan, miadto si Jesus sa Galilea ug nagsangyaw sa Maayong Balita sa Dios. Miingon siya, "Miabot na gayod ang panahon nga maghari na ang Dios! Busa hinulsoli ug biya-i ang inyong mga sala ug tuohi ninyo ang Maayong Balita!" Samtang naglakaw si Jesus sa daplin sa Lanaw sa Galilea, nakita niya ang duha ka mananagat, si Simon ug ang iyang igsuon nga si Andres, nga namukot. Unya si Jesus miingon kanila, "Kuyog kamo kanako ug tudloan ko kamo sa pagpanagat og mga tawo." Dihadiha gibiyaan nila ang ilang mga pukot ug mikuyog kaniya. Mipadayon si Jesus sa unahan ug nakita niya ang laing duha ka magsuon, si Santiago ug si Juan, mga anak ni Sebedeo. Didto sila sa ilang sakayan nag-andam sa ilang mga pukot. Sa pagkakita ni Jesus kanila, gidapit niya sila sa pagsunod kaniya. Busa gibiyaan nila ang ilang amahan didto sa sakayan uban sa mga sinuholan, ug mikuyog sila kang Jesus.
ANG EBANGHELYO SA GINOO.
DAYGON IKAW, O KRISTO.
