PAGBASA GIKAN SA BASAHON NI PROPETA ISAIAS
Is. 42:1-4, 6-7
Ang Ginoo miingon, "Tan-awa ang akong alagad, nga akong gitabangan, akong pinili, ug gikahimut-an nako pag-ayo; gihatagan ko siyag gahom, hatagan niyag hustisya ang kanasuran. Dili siya mosinggit ni motuwaw ni maghimo siyag masabang pakigpulong sa kadalanan; maluluy-on siya sa mga huyang, ug matinabangon sa mga timawa; ipatuman gayod niya ang hustisya. Dili gayod siya molunga ni maluya hangtod nga mapatunhay niya ang hustisya dinhi sa kalibutan; ug ang kapuloan magpaabot sa iyang balaod." "Ako, ang Ginoo, nagtawag kanimo aron labanan mo ang katarong, pinaagi kanimo maghimo akog kasabutan uban sa tanang katawhan ug himoon ko ikaw'ng kahayag sa kanasuran, aron pagpabuka sa mata sa mga buta ug pagpagawas sa mga binilanggo sa mangitngit nga bilanggoan."
ANG PULONG SA GINOO.
SALAMAT SA DIOS.
SALMO RESPONSORYO
Ps. 29:1-2, 3-4, 9-10
R. Bendisyonan sa Ginoo og kalinaw ang iyang lungsod.
Hatagi ang Ginoo, kamong mga anak sa Dios, hatagi ang Ginoo sa himaya ug pagdayeg. Hatagi ang Ginoo sa himaya nga angay sa iyang ngalan; simbaha ang Ginoo diha sa balaan nga sapot. (R)
Ang tingog sa Ginoo anaa ibabaw sa katubigan, ang Ginoo, ibabaw sa halapad nga katubigan. Ang tingog sa Ginoo gamhanan; harianon ang tingog sa Ginoo. (R)
Nagadalugdog ang Dios sa himaya, ug diha sa iyang templo ang tanan nagaingon "Himaya!" Ang Ginoo naglingkod sa trono ibabaw sa baha; ang Ginoo naglingkod sa trono nga hari sa kahangturan. (R)
PAGBASA GIKAN SA BUHAT SA MGA APOSTOLES
Acts 10:34-38
Si Pedro miingon, "Karon naila ko na nga ang Dios walay pinalabi. Ang mahadlokon kaniya ug nagbuhat sa matarong iyang dawaton sa walay pagsapayan sa bulok sa iyang panit. Nasayod kamo nga gipadala niya ngadto sa katawhan sa Israel ang mensahe sa Maayong Balita sa pakigdait pinaagi kang JesuKristo nga mao ang Ginoo sa tanan. Nasayod kamo mahitungod kang Jesus nga Nazaretnon nga gibuboan sa Dios sa gahom sa Espiritu Santo, Miadto siya sa tanang dapit ug giayo niya ang tanang giyawaan, kay ang Dios diha man kaniya.
ANG PULONG SA GINOO.
SALAMAT SA DIOS.
PAGBASA SA SANTOS NGA EBANGHELYO SUMALA NI SAN MATEO
Mt. 3:13-17
Unya miadto si Jesus sa Jordan gikan sa Galilea, aron magpabunyag ni Juan. Apan dili unta mobunyag kaniya si Juan. Siya miingon, "Ako ang angay mong bunyagan, apan nganong ako na man hinoon ang magbunyag kanimo?" Apan gitubag siya ni Jesus, "Pasagdi lang nga mahitabo kini, kay niining paagiha makatuman kita sa tanan nga gisugo sa Dios." Busa miuyon si Juan. Sa pagkahuman gayod og bunyag kang Jesus, mihaw-as siya sa tubig. Unya naabli ang langit ug nakita niya ang Espiritu sa Dios nga mikunsad daw salampati ug mitugdon kaniya. Ug unya may tingog gikan sa langit nga nag-ingon, "Kini mao ang pinangga kong Anak nga nakalipay kanako pag-ayo."
ANG EBANGHELYO SA GINOO.
DAYGON IKAW, O KRISTO.
