⚪ Sabado human sa Epipaniya

PAGBASA GIKAN SA UNANG SULAT NI SAN JUAN

1 Jn. 5:14-21

Ug makasalig kita sa Dios nga bisan unsay atong pangayuon kaniya sumala sa iyang kabubut-on, patalinghugan gayod kita niya. Ug sanglit nasayod man kita nga mamati siya kanato, masiguro usab nato nga iya nang gihatag kanato ang atong gipangayo kaniya. Kon may makakita sa iyang isigkamagtutuo nga nakasala apan sala nga dili mosangpot sa kamatayon, kinahanglan mag-ampo siya sa Dios, ug hatagan sa Dios ug kinabuhi ang maong magtutuo. Kini alang lamang niadtong nakahimog sala nga dili ikamatay. Apan adunay sala nga musangpot gayod sa kamatayon, ug dili na kinahanglan nga mag-ampo pa kamo alang niini. Sala ang tanang buhat nga dili matarong, apan adunay sala nga dili musangpot sa kamatayon. Nasayod kita nga walay anak sa Dios nga magpadayon sa pagpakasala, kay manalipod man kaniya ang Anak sa Dios, ug ang Yawa dili gayod makahimo kaniyag dautan. Nasayod kita nga iya kita sa Dios ug nga naulipon sa Yawa ang tibuok kalibutan. Nasayod usab kita nga mianhi ang Anak sa Dios ug mihatag kanatog salabutan, aron makaila kita sa matuod nga Dios. Ang atong kinabuhi anaa sa matuod nga Dios-sa iyang Anak nga si Jesukristo. Siya ang matuod nga Dios ug ang kinabuhi nga walay katapusan. Mga anak, likayi ninyo ang mga diosdios!

SALMO RESPONSORYO

Ps. 149:1-2, 3-4, 5-6, 9

R. Ang Ginoo nalipay sa iyang lungsod.

Awiti ang Ginoo og usa ka bag-ong awit sa pagdayeg diha sa katilingban sa mga nagtuo kaniya. Papalipaya ang Israel diha sa iyang magbubuhat, pasadyaa ang mga anak sa Sion diha sa ilang hari. (R)

Padayega sila sa iyang ngalan diha sa sayaw sa pangilin, paawita sila og pagdayeg ngadto kaniya dinuyogan sa piyangpiyang ug alpa. Kay ang Ginoo nahigugma sa iyang lungsod, ug gidayanan niya ang mapaubsanon og kadaugan. (R)

Pasadyaa ang nagtuo kaniya diha sa himaya; paawita sila tungod sa kalipay diha sa ilang mga higdaanan; ang tag-as nga mga pagdayeg sa Dios maanaa sa ilang mga totonlan. Mao kini ang himaya sa tanan nga nagtuo kaniya. Aleluya. (R)

PAGBASA SA SANTOS NGA EBANGHELYO SUMALA NI SAN JUAN

Jn. 3:22-30

Human niini, si Jesus ug ang iyang mga tinun-an nangadto sa lalawigan sa Judea. Nagpabilin siya didtog pipila ka adlaw uban kanila ug namunyag siya. Namunyag usab si Juan didto sa Enon, dili layo sa Salim kay daghan mag tubig didto. Nangadto kaniya ang mga tawo ug sila gipamunyagan niya. (Niadtong higayona si Juan wala pa bilanggoa). May mga tinun-an ni Juan nga nakiglantugi sa usa ka Judio mahitungod sa seremonyas sa pagpanglinis. Busa miadto sila kang Juan ug miingon, "Magtutudlo, nahinumdom ka ba sa tawo nga uban kanimo didto sa tabok sa Jordan, nga imo ganing gihisgotan? Namunyag na siya karon ug nangadto kaniya ang tanan." Si Juan mitubag, "Walay tawo nga makahupot og bisan unsa gawas kon ihatag kini sa Dios kaniya. Kamo mismo maoy akong mga saksi nga ako miingon nga ako dili mao ang Mesiyas, apan gipadala ako pag-una kaniya. Ang pamanhonon mao ang tag-iya sa pangasaw-onon. Ang higala sa pamanhonon maghulat kaniya, ug malipay siya inigkabati niya sa tingog sa pamanhonon. Sa ingon niining paagiha mahingpit ang akong kalipay. Kinahanglan siya mouswag ug ako mous-os."