PAGBASA GIKAN SA BASAHON SA NUMEROS
Nm. 21:4-9
Gikan sa Bukid sa Hor namaybay sila sa Dagat sa Acaba, aron dili sila makalatas sa Edumea. Apan ang mga tawo gikabsag pailob samtang nagpanaw sila ug nagbagulbol sila batok sa Dios ug kang Moises. Nagkanayon sila, "Nganong gipatungas mo man kami gikan sa Ehipto nganhi ning kamingawan? Imo ba kaming pakamatyon dinhi sa gutom ug sa uhaw? Gipul-an na kami niining pagkaon nga walay lami." Unya ang Ginoo mipadala kanilag mga bitin nga malala ug gipamaak ang mga tawo, ug daghang mga tawo sa Israel ang namatay. Ug ang katawhan nanuol kang Moises ug miingon, "Nakasala kami kay nagbagulbol man kami batok sa Ginoo ug kanimo. Pag-ampo sa Ginoo nga iyang wagtangon ang mga bitin." Busa nag-ampo si Moises alang sa mga tawo. Ug giingnan si Moises sa Ginoo, "Paghimog bitin nga tumbaga, ug ibutang kini sa tumoy sa usa ka tukon; ug ang hipaakag bitin, kon makakita niini, dili mamatay." Busa nagbuhat si Moises og bitin nga tumbaga, ug gibutang kini niya sa tumoy sa usa ka tukon; ug kon ang hipaakag bitin motan-aw sa bitin nga tumbaga, dili siya mamatay.
ANG PULONG SA GINOO.
SALAMAT SA DIOS.
PAGBASA GIKAN SA SULAT NI SAN PABLO NGADTO SA TAGA-FILIPOS
Phil. 2:6-11
Angay'ng batonan ninyo ang hunahuna nga gibatonan ni Kristo Jesus nga mao kini: Diha niya kanunay ang kinaiya gayod sa Dios, apan wala siya maghunahuna pagpakigtupong sa Dios pinaagi sa kusog. Kondili sa iyang kaugalingong kabubut-on iya kining gibiyaan. Ug gisul-ob niya ang kinaiya sa usa ka sulugoon. Natawo siya sama kanato ug nakita siya ingon nga tawo; nagpaubos siya ug nagmasinugtanon hangtod sa kamatayon-ang iyang kamatayon sa krus. Tungod niini gituboy siya sa Dios ngadto sa kinatas-ang dapit sa kalangitan, ug gihatagan siyag ngalan nga labaw sa tanang ngalan. Busa mangluhod ang tanang binuhat, nga atua sa langit, sa yuta ug sa ilalom sa yuta; sa pagpasidungog sa ngalan ni Jesus. Ug ang tanan magsangyaw nga si Jesukristo mao ang Ginoo, alang sa himaya sa Dios nga Amahan.
ANG PULONG SA GINOO.
SALAMAT SA DIOS.
SALMO RESPONSORYO
Ps. 78:1-2, 34-35, 36-37, 38
R. Ayaw hikalimti ang mga buhat sa Ginoo.
Pamati-a, lungsod ko, ang akong pagtulon-an; ipaabong ang imong mga dunggan sa mga pulong sa akong baba. Ablihan ko ang akong baba diha sa sambingay, ibungat ko ang mga misteryo sa karaan. (R)
Bisan gipatay niya sila nangita sila kaniya, ug nangutana pag-usab bahin sa Dios. Nahinumdom sila nga ang Dios mao ang ilang Bato ug ang Labing Halangdong Dios mao ang ilang Manunubos. (R)
Apan ila siyang giulog-ulogan sa ilang mga baba ug gibakakan sa ilang mga dila. Bisan kon ang ilang mga kasingkasing nagbudhi kaniya, ni nagtuman sila sa iyang kasabutan. (R)
Apan bisan pa niana, sa iyang pagkamaluluy-on, iyang gipasaylo ang ilang sala ug wala sila laglaga; sa makadaghan iyang gibakwi ang iyang kasuko ug wala niya halinga ang iyang kapungot. (R)
PAGBASA SA SANTOS NGA EBANGHELYO SUMALA NI SAN JUAN
Jn. 3:13-17
Si Jesus miingon ngadto kang Nicodemus, "Wala pay nakasaka sa langit gawas niadtong nanaog gikan sa langit-ang Anak sa Tawo." "Ingon nga giisa ni Moises didto sa kamingawan ang bitin nga tumbaga nga gibutang og tukon, ang Anak sa Tawo kinahanglan nga iisa usab, aron ang tanan nga motuo kaniya makabaton og kinabuhing walay katapusan. Kay gihigugma pag-ayo sa Dios ang kalibutan ug tungod niini gihatag niya ang iyang Bugtong Anak, aron ang tanan nga motuo kaniya dili mamatay, kondili makabaton hinoon sa kinabuhing dayon. Kay wala ipadala sa Dios ang iyang Anak nganhi sa kalibutan aron pagsilot kondili aron pagluwas niini."
ANG EBANGHELYO SA GINOO.
DAYGON IKAW, O KRISTO.
