PAGBASA GIKAN SA UNANG SULAT NI SAN JUAN
1 Jn. 4:19-5:4
Gihigugma nato ang Dios kay una man siyang nahigugma kanato. Kon may moingon, "Nahigugma ako sa Dios," apan nagdumot sa iyang isigkatawo, bakakon siya; kay unsaon man niya paghigugma sa Dios nga wala niya makita kon wala siya mahigugma sa iyang isigkatawo nga makita niya? Ang gisugo ni Kristo kanato mao kini: ang nahigugma sa Dios kinahanglan mahigugma usab sa iyang isigkatawo. Ang nagtuo nga si Jesus mao ang Kristo, anak sa Dios; ug ang nahigugma sa usa ka amahan nahigugma usab sa iyang anak. Maila nato nga nahigugma kita sa mga anak sa Dios kon higugmaon nato ang Dios ug tumanon ang iyang mga sugo. Kay ang ilhanan nga gihigugma nato ang Dios mao nga gituman nato ang iyang mga sugo, ug dili lisod tumanon ang iyang mga sugo; kay ang tanang anak sa Dios makabuntog sa kalibutan, ug gidaog nato ang kalibutan pinaagi sa atong pagtuo.
ANG PULONG SA GINOO.
SALAMAT SA DIOS.
SALMO RESPONSORYO
Ps. 72:1-2, 14, 15, 17
R. Ginoo, ang tanang nasod sa yuta magsimba kanimo.
O Dios, togahi sa imong panghukom ang Hari ug sa imong katarong ang anak sa hari. Mandoan niya sa katarungan ang imong katawhan ug sa panghukom ang imong mga nag-antos nga ginsakpan. (R)
Sa limbong ug panglupig luwason niya ang kabos, ug mabililhon ang ilang dugo diha sa iyang atubangan. Hinaut unta nga pagaampoan sila sa walay hunong; sa tanang adlaw magdayeg sila kaniya. (R)
Daygon unta sa kanunay ang iyang ngalan; molungtad ingon sa adlaw ang iyang ngalan. Diha kaniya ang tanang kaliwat sa yuta pagapanalanginan; ang tanang mga nasod magsangyaw sa iyang kalipay. (R)
PAGBASA SA SANTOS NGA EBANGHELYO SUMALA NI SAN LUKAS
Lk. 4:14-22
Unya mipauli si Jesus sa Galilea, ug diha kaniya ang gahom sa Espiritu Santo. Mikaylap sa tibuok kayutaan ang balita mahitungod kaniya. Nagtudlo siya sulod sa ilang mga sinagoga ug gidayeg siya sa tanan. Unya miadto si Jesus sa Nazaret diin siya magdako, ug ingon sa naandan miadto siya sa sinagoga sa Adlaw nga Igpapahulay. Mitindog siya aron pagbasa sa Kasulatan, ug gitunolan siya sa basahon nga sinulat ni propeta Isaias. Gibukhad niya ang linukot nga basahon ug maoy iyang gibasa ang dapit diin nasulat kini, "Ang Espiritu sa Ginoo ania kanako. Gidihugan ako niya aron pagsangyaw sa Maayong Balita ngadto sa mga kabos, gipadala ako niya aron pagsangyaw sa kagawasan ngadto sa mga binihag, ug pagpahiuli sa panan-aw sa mga buta; pagpagawas sa mga dinaogdaog, ug pagpahibalo sa tuig nga ang Ginoo moluwas sa iyang katawhan!" Unya gilukot ni Jesus ang basahon, ug giuli ngadto sa piniyalan, ug milingkod siya. Mitutok kaniya ang tanan nga didto sa sinagoga. Unya miingon siya kanila, "Kining bahina sa Kasulatan natuman karong adlawa, ingon sa inyong nadungog nga gibasa." Nakadayeg kaniya silang tanan, ug nahibulong sa mga matahom pulong nga iyang gisulti. Miingon sila, "Dili ba kini siya ang anak ni Jose?"
ANG EBANGHELYO SA GINOO.
DAYGON IKAW, O KRISTO.
