PAGBASA GIKAN SA UNANG SULAT NI SAN JUAN
1 Jn. 4:11-18
Mga igsuon, kon ingon niini ang paghigugma sa Dios kanato, nan maghigugmaay kita. Wala pay tawo nga nakakita sa Dios; apan kon maghigumaay kita, magpuyo kanato ang Dios ug mahingpit dinhi kanato ang iyang gugma. Masiguro nato nga anaa kita sa Dios ug ania kanato ang Dios kay gihatag na man niya kanato ang iyang Espiritu. Nakita nato ug gisugilon sa uban nga gipadala sa Amahan ang iyang Anak aron pagluwas sa kalibutan. Ang magpahayag nga si Jesus mao ang Anak sa Dios, anaa sa Dios ug ang Dios anaa kaniya. Ug nasayod kita ug nagtuo nga gihigugma kita sa Dios. Ang Dios gugma ug ang nagkinabuhi subay sa gugma anaa sa Dios ug ang Dios anaa kaniya. Gihingpit dinhi kanato ang gugma aron unya sa Adlaw sa Paghukom mahingpit ang atong pagsalig, kay ang kinabuhi nato dinhi sa kalibutan sama man sa kinabuhi ni Kristo. Walay kahadlok diha sa gugma; ang gugmang hingpit magwagtang sa tanang kahadlok. Busa kon mahadlok gihapon ang tawo, wala pa mahingpit ang iyang gugma kay ang kahadlok may kalabutan man sa silot.
ANG PULONG SA GINOO.
SALAMAT SA DIOS.
SALMO RESPONSORYO
Ps. 72:1-2, 10, 12-13
R. Ginoo, ang tanang nasod sa yuta magsimba kanimo.
O Dios, togahi sa imong panghukom ang Hari, ug sa imong katarong ang anak sa hari; mandoan niya sa katarungan ang imong katawhan ug sa panghukom ang imong mga nag-antos nga ginsakpan. (R)
Ang mga hari sa Tarsis ug ang mga Pulo magdala og mga gasa; ang mga hari sa Arabia ug Seba magdala og mga halad. (R)
Kay magluwas siya sa kabos kon magsangpit siya, ug sa nag-antos diha nga walay motabang kaniya. Maluoy siya sa ubos ug sa kabos; luwason niya ang mga kinabuhi sa kabos. (R)
PAGBASA SA SANTOS NGA EBANGHELYO SUMALA NI SAN MARKOS
Mk. 6:45-52
Unya gipasakay dayon ni Jesus ang iyang mga tinun-an sa sakayan ug gipauna ngadto sa Betsaida, nga didto sa tabok sa lanaw; gipapauli usab niya ang mga tawo. Tapos siya makapanamilit sa iyang mga tinun-an, mitungas siya sa usa ka bungtod aron pag-ampo. Pagkasawomsom gayod, ang sakayan didto na sa taliwala sa lanaw, ug si Jesus nag-inusara sa bungtod. Nakita niya ang iyang mga tinun-an nga naglisod sa ilang paggaod, kay sungsungon man ang hangin. Sa pagkakaadlawon na, giadto sila ni Jesus nga naglakaw sa tubig; molabay lang unta siya kanila, apan sa ilang pagkakita kaniya nga naglakaw sa tubig, naghunahuna sila nga kadto usa ka multo; busa nanyagit sila tungod sa kahadlok. Apan miingon dayon si Jesus kanila, "Ayaw kamog kahadlok! Salig kamo; ako kini!" Unya misakay siya sa sakayan uban kanila ug milurang ang hangin. Nahibulong pag-ayo ang iyang mga tinun-an ug naglibog sa nahitabo. Wala sila makasabot sa kahulugan sa milagro sa pan; ang ilang hunahuna wala makatugkad niadto.
ANG EBANGHELYO SA GINOO.
DAYGON IKAW, O KRISTO.
