⚪ Lunes human sa Epipaniya

PAGBASA GIKAN SA UNANG SULAT NI SAN JUAN

1 Jn. 3:22-4:6

Ug atong madawat gikan kaniya ang bisan unsa nga pangayuon nato, kay gituman man nato ang iyang mga sugo ug gibuhat ang makapahimuot kaniya. Ang gisugo niya mao nga motuo kita sa ngalan sa iyang Anak nga si JesuKristo ug maghigugmaay sumala sa sugo ni Kristo. Ang nagtuman sa mga sugo sa Dios anaa sa Dios, ug ang Dios anaa kaniya. Ug masayran nato nga ang Dios ania kanato pinaagi sa Espiritu nga iyang gihatag kanato. Mga igsuon, ayaw ninyo tuohi ang tanang nagpatuo nga ang Espiritu anaa kanila; kondili usisaha ninyo kon gikan ba gayod sa Dios ang Espiritu nga anaa kanila. Kay daghang dili matuod nga mga propeta nanungha sa tanang dapit. Maila ninyo kon ang maong espiritu iya ba sa Dios pinaagi niini: ang nagpahayag nga si Jesukristo nahimong tawo iya sa Dios, apan ang dili, dili iya sa Dios. Ang maong espiritu iya sa Kaaway ni Kristo; nadunggan ninyo nga moanhi kini, ug karon ania na gayod sa kalibutan. Apan kamo, mga anak, iya sa Dios ug gidaog ninyo ang dili matuod nga mga propeta; kay ang Espiritu nga anaa kaninyo mas gamhanan kay sa espiritu nga anaa sa mga tawo nga iya sa kalibutan. Naghisgot sila mahitungod sa mga butang sa kalibutan ug namati kanila ang kalibutan, kay sila iya man sa kalibutan. Apan kita iya sa Dios, ug ang nakaila sa Dios magpatalinghog kanato; ang dili iya sa Dios dili gayod magpatalinghog kanato. Ug pinaagi niini maila nato ang Espiritu nga nagtudlo sa matuod ug ang espiritu nga wala magtudlo sa matuod.

SALMO RESPONSORYO

Ps. 2:7-8, 10-12

R. Ihatag ko kanimo nga imong kabilin ang tanang mga nasod.

Ang Ginoo miingon kanako, "Ikaw ang akong Anak. Karong adlawa gianak ko ikaw. Pangayo kanako ug hatagan ko ikaw sa kanasuran aron maimong kabilin, ug sa kautlanan sa yuta aron maimong katigayonan." (R)

Ug karon, O mga hari, pamati kamo, pagmatngon kamo nga mga nagmando sa yuta. Alagari ang Ginoo uban sa kahadlok ug paglipay kamo sa iyang atubangan; uban sa pagkurog simbaha ninyo siya. (R)

PAGBASA SA SANTOS NGA EBANGHELYO SUMALA NI SAN MATEO

Mt. 4:12-17, 23-25

Sa pagkadungog ni Jesus nga gibilanggo si Juan, miadto siya sa Galilea. Mibiya siya sa Nazaret ug didto puyo sa Capernaum, usa ka lungsod nga daplin sa lanaw sa Galilea, sa kayutaan sa Zabulun ug Neftali. Sa ingon natuman ang gisulti ni propeta Isaias: "Yuta sa Zabulun ug yuta sa Neftali, agianan padulong sa dagat tabok sa Jordan, Galilea sa mga dili Judio! Ang mga tawo nga nagpuyo sa kangitngit nakakitag dakong kahayag! Kanila nga nagpuyo sa mangitngit nga yuta sa kamatayon, modan-ag ang kahayag!" Sukad niadto si Jesus nagwali nga nag-ingon, "Hinulsoli ang inyong mga sala, kay hapit na maghari ang Dios!" Si Jesus misuroy sa tibuok Galilea ug nagtudlo sulod sa ilang mga Sinagoga, ug nagwali sa Maayong Balita bahin sa paghari sa Dios, ug nag-ayo sa mga masakiton. Mikaylap sa tibuok Siria ang iyang kabantog, ug gidala ngadto sa mga tawo ngadto kaniya ang tanang nag-antos sa nagkalainlaing mga sakit ug mga balatian: mga giyawaan, mga patulon, mga paralitiko, ug glayo ni Jesus silang tanan. Daghang mga tawo misunod kaniya gikan sa Galilea, sa Decapolis, sa Jerusalem, sa Judea, ug sa tabok sa Jordan.