PAGBASA GIKAN SA UNANG SULAT NI SAN JUAN
1 Jn. 2:29-3:6
Nasayod kamo nga si Kristo matarong, busa angay ninyong hibaloan nga ang tanan nga magbuhat sa matarong anak sa Dios. Palandonga ninyo unsa kadako ang paghigugma sa Amahan kanato! Gihigugma kita niya pag-ayo nga tungod niini giisip kitang mga anak sa Dios ug kini matuod gayod. Wala makaila kanato ang kalibutan, kay wala man kini makaila sa Dios. Minahal kong mga igsuon, kita karon mga anak na sa Dios, apan wala pa nato matino kon maunsa gayod kita. Ang nasayran nato mao nga inigpadayag ni Kristo mahisama kita kaniya, kay makita man nato siya sa iyang pagkamao gayod. Ug ang tanan nga nagbaton niining paglauma diha kang Kristo nagputli sa ilang kaugalingon ingon nga putli si Kristo. Ang nakasala naglapas sa Balaod sa Dios, kay ang pagpakasala maoy paglapas sa balaod. Nasayod kamo nga mianhi si Kristo aron pagpasaylo sa atong mga sala, ug siya walay sala. Busa ang tanan nga anaa kang Kristo dili na magpakasala; apan ang magpadayon sa pagpakasala, wala pa makakita ni makaila kaniya.
ANG PULONG SA GINOO.
SALAMAT SA DIOS.
SALMO RESPONSORYO
Ps. 98:1, 3-4, 5-6
R. Ang tanang kautlanan sa yuta nakakita sa makaluluwas nga gahom sa Dios.
Awiti ang Ginoo og bag-ong awit, kay naghimo siya og katingalahang mga buhat. Ang iyang tuong kamot nakakab-ot og kadaugan alang kaniya, ang iyang balaan nga bukton. (R)
Ang tanang kautlanan sa yuta nakakita sa kaluwasan nga gihimo sa atong Dios. Awiti nga malipayon ang Ginoo, kamong tanang kayutaan; pag-awit kamog kusog, pag-awit kamog pagdayeg. (R)
Awitig pagdayeg ang Ginoo dinuyogan sa alpa, dinuyogan sa alpa ug sa mananoy nga awit. Inubanan sa mga trompeta ug sa tingog sa budyong; pag-awit nga masadya atubangan sa hari, ang Ginoo. (R)
PAGBASA SA SANTOS NGA EBANGHELYO SUMALA NI SAN JUAN
Jn. 1:29-34
Sa pagkasunod adlaw, nakita ni Juan si Jesus nga nagpadulong kaniya, ug siya miingon, "Anaa ang nating Karnero sa Dios nga nagwagtang sa sala sa kalibutan! Siya ang akong gihisgotan sa pag-ingon ko, 'May tawo nga moabot sunod kanako, apan labaw siya kanako kay diha na man siya sa wala pa ako matawo.' Kaniadto wala ako makaila kon kinsa siya, apan mianhi ako nga nagbunyag pinaagi sa tubig aron pagpaila kaniya ngadto sa Israel." Kini ang pamatuod ni Juan: "Nakita ko ang Espiritu nga mikunsad gikan sa langit sama sa salampati ug mitugdon kaniya. Wala ako makaila kaniya kaniadto, apan ang Dios nga maoy nagsugo kanako aron pagbunyag pinaagi sa tubig, miingon kanako, 'Makita mo ang Espiritu nga mokunsad ug motugdon sa usa ka tawo; siya ang magbunyag pinaagi sa Espiritu Santo.' Nakita ko kini, ug sultihan ko kamo nga siya ang Anak sa Dios.
ANG EBANGHELYO SA GINOO.
DAYGON IKAW, O KRISTO.
