PAGBASA GIKAN SA UNANG SULAT NI SAN JUAN
1 Jn. 2:12-17
Mga anak, nagsulat ako kaninyo kay tungod kang Kristo gipasaylo na ang inyong mga sala. Ug kamo, mga amahan, gisulatan ko kay nakaila man kamo kaniya nga diha nang daan sa pagbuhat sa kalibutan. Gisulatan ko usab kamong mga batan-on kay gibuntog man ninyo ang Yawa. Mga anak, gisulatan ko kamo kay nakaila man kamo sa Amahan, ug kamo, mga amahan, gisulatan ko kay nakaila man kamo kaniya nga diha nang daan sa pagbuhat sa kalibutan. Ug kamo usab, mga batan-on, gisulatan ko kay lig-on man kamo ug ang pulong sa Dios anaa man kaninyo ug gibuntog ninyo ang Yawa. Ayaw ninyo higugmaa ang kalibutan o bisag unsa nga iya sa kalibutan. Kon higugmaon ninyo ang kalibutan, wala kamo mahigugma sa Amahan. Kay ang tanang butang nga iya sa kalibutan—ang kaulag, ang tanang gikaibgan sa mga mata, ug ang tanang gipasigarbo sa tawo—walay bisan usa niini nga iya sa Amahan, kondili iya sa kalibutan. Ang kalibutan ug ang tanan nga anaa niini nga gikaibgan sa mga tawo mangahanaw, apan ang magbuhat sa kabubut-on sa Dios magpabiling buhi hangtod sa kahangturan.
ANG PULONG SA GINOO.
SALAMAT SA DIOS.
SALMO RESPONSORYO
Ps. 96.7-8, 8-9, 10
R. Pagsadya langit ug yuta.
Hatagi ang Ginoo, kamong mga banay sa kanasuran, hatagi ang Ginoo og himaya ug pagdayeg. Hatagi ang Ginoo sa himaya nga angay sa iyang ngalan. (R)
Pagdala kamog mga gasa ug sulod sa iyang kahawanan: simbaha ang Ginoo diha sa balaan nga sapot. Kurog kamo tibuok yuta. (R)
Pamulongi ang kanasuran: Ang Ginoo hari. Gilig-on niya ang kalibutan aron dili matarog; nagdumala siya sa katawhan uban sa kaangayan. (R)
PAGBASA SA SANTOS NGA EBANGHELYO SUMALA NI SAN LUCAS
Lk. 2:36-40
Didtoy usa ka babaye nga propeta nga ginganlag Ana, anak ni Panuel, sa banay ni Aser. Usa siya ka babayeng tigulang na nga minyo sulod sa pito ka tuig, ug unya nabalo sulod sa ikawaloan ug upat na ka tuig. Wala gayod siya mobiya sa Templo; adlaw ug gabii nagsimba siya sa Dios, nagpuasa ug nag-ampo. Niadto gayong taknaa miabot siya ug nagpasalamat sa Dios, ug misulti bahin sa bata ngadto sa tanan nga nagpaabot nga ang Dios motubos sa Jerusalem. Tapos matuman ni Jose ug Maria ang tanan nga gisugo sa Balaod sa Ginoo, mipauli sila sa Galilea, ngadto sa Nazaret, ang ilang lungsod nga gipuy-an. Ug mitubo ang bata ug nahimong kusgan; napuno siya sa kinaadman, ug ang panalangin sa Dios diha kaniya.
ANG EBANGHELYO SA GINOO.
DAYGON IKAW, O KRISTO.
