PAGBASA GIKAN SA UNANG SULAT NI SAN JUAN
1 Jn. 2:3-11
Kon tumanon nato ang mga sugo sa Dios, mapaniguro nato nga nakaila kita kaniya. Kon may moingon, "Nakaila ako sa Dios," apan wala magtuman sa iyang gisugo, bakakon kanang tawhana ug wala kaniya ang kamatuoran. Apan ang nagtuman sa iyang sugo maoy may hingpit nga paghigugma sa Dios. Masiguro nato nga nagkinabuhi kita sumala sa kabubut-on sa Dios pinaagi niining mosunod: ang nag-ingon nga siya anaa sa Dios kinahanglan magkinabuhi sama kang Jesukristo. Minahal kong mga igsuon, dili bag-o ang sugo nga gisulat ko kaninyo. Karaan kining sugoa ug diha na kini kaninyo sukad pa sa sinugdan, kay mao man kini ang mensahe nga inyo nang nadungog. Apan bag-o kining sugoa nga gisulat ko kaninyo ug makita ang kamatuoran niini diha kang Kristo, ug diha kaninyo usab. Kay miagi na ang kangitngit ug midan-ag na ang matuod nga kahayag. Ang nag-ingon nga anaa siya sa kahayag, apan nagdumot gihapon sa iyang isigkatawo, anaa pa sa kangitngit. Ug ang nahigugma sa iyang isigkatawo anaa sa kahayag, busa walay bisan unsa diha kaniya nga makaangin sa uban sa pagpakasala. Apan ang nagdumot sa iyang isigkatawo anaa pa sa kangitngit; naglakaw siya sa kangitngit ug wala masayod kon asa siya paingon, kay gibutaan man siya sa kangitngit.
ANG PULONG SA GINOO.
SALAMAT SA DIOS.
SALMO RESPONSORYO
Ps. 96:1-2, 2-3, 5-6
R. Pagsadya langit ug yuta.
Awiti ang Ginoo og bag-ong awit; awiti ang Ginoo, kamong tanang kayutaan. Awiti ang Ginoo, dayga ang iyang ngalan. (R)
Ipahibalo ang iyang kaluwasan sa tanang adlaw, iasoy ang iyang himaya diha sa kanasuran; diha sa tanang katawhan, ang iyang katingalahang mga buhat. (R)
Ang Ginoo nagbuhat sa kalangitan. Ang kasanag ug kaambong nagauna kaniya; ang pagdayeg ug kahalangdon anaa sa iyang santuwaryo. (R)
PAGBASA SA SANTOS NGA EBANGHELYO SUMALA NI SAN LUCAS
Lk. 2:22-35
Miabot ang panahon nga si Jose ug si Maria magtuman sa seremonyas sa paghinlo sumala sa gisugo sa Balaod ni Moises. Busa gidala nila ang bata ngadto sa Jerusalem aron ihalad nila sa Ginoo. Mao kini ang nasulat sa Balaod sa Ginoo: "Ang tanang panganay'ng lalaki kinahanglang ihalad ngadto sa Ginoo." Miadto usab sila aron paghalad sumala sa gisugo sa Balaod sa Ginoo: usa ka paris nga tukmo ug duha ka kuyabog nga salampati. Niining panahona may tawo nga nagpuyo sa Jerusalem nga ginganlag Simeon. Maayo siyang tawo ug mahadlokon sa Dios, ug nagpaabot sa kaluwasan sa Israel. Nag-uban kaniya ang Espiritu Santo, ug gipasaligan siya sa Espiritu Santo nga dili siya mamatay hangtod makita niya ang Mesiyas nga gisaad sa Ginoo. Minandoan sa Espiritu, misulod si Simeon sa Templo. Sa gidala na si Jesus sa iyang mga ginikanan ngadto sa Templo aron didto ilang himoon kaniya ang gisugo sa Balaod, gikugos ni Simeon ang Bata ug nagpasalamat siya sa Dios: "Karon, Ginoo, kay imo na mang gituman ang imong saad, itugot na ang imong sulugoon mohalin na nga malinawon. Kay sa kaugalingon kong mga mata nakita ko ang imong kaluwasan, nga imong giandam atubangan sa tanang katawhan: usa ka kahayag nga magpadayag sa imong dalan ngadto sa mga dili Judio, ug maghatag sa imong himaya ngadto sa imong katawhan, ang Israel." Nahibulong ang amahan ug ang inahan sa bata sa pagkadungog nila sa mga butang nga gisulti ni Simeon bahin kaniya. Unya nanalangin si Simeon kanila ug miingon kang Maria nga inahan sa Bata, "Kining Bataa gipili sa Dios alang sa kalaglagan ug kaluwasan sa daghang mga tawo sa Israel; mahimo siyang ilhanan gikan sa Dios nga supakon sa daghang mga tawo, ug tungod niini madayag ang ilang mga tinagoang hunahuna. Ug ang kaguol, sama sa usa ka hait nga espada, molagbas sa imong kaugalingong kasingkasing."
ANG EBANGHELYO SA GINOO.
DAYGON IKAW, O KRISTO.
