PAGBASA GIKAN SA BASAHON NI SIRAC
Sir. 3:2-6, 12-14
Kay ang Ginoo naghatag sa mga amahan sa gahom ibabaw sa ilang mga anak ug gihatagan ang mga anak sa katungdanan sa pagtahod sa ilang mga inahan. Kon tahuron ninyo ang inyong amahan, makabayad kamo sa inyong mga sala, ug kon inyong pasidunggan ang inyong inahan, nagtigom kamo og dakong bahandi. Kon tahuron ninyo ang inyong amahan, usa ka adlaw niana ang inyong kaugalingong mga anak maglipay kaninyo; ang Ginoo magpatalinghog sa inyong mga pag-ampo. Kon tahuron ninyo ang Ginoo pinaagi sa pagpasidungog sa inyong amahan ug sa paglipay sa inyong inahan, magpuyo kamo og taas nga kinabuhi. Anak, atimana ang imong amahan inigkatigulang na niya; ayaw siya hatagig kaguol samtang buhi pa siya. Kaloy-i siya bisan kon ango-angohon na siya; ayaw siya tamaya tungod lang kay ikaw malig-on ug maayo pag lawas. Ang Ginoo dili malimot sa mga kaayo nga imong gipakita ngadto sa imong amahan; magtabang kini kanimo aron hibayran ang imong mga kasal-anan.
ANG PULONG SA GINOO.
SALAMAT SA DIOS.
SALMO RESPONSORYO
Ps. 128:1-2, 3, 4-5
R. Bulahan sila nga mahadlokon sa Ginoo, ug nagalakaw sa iyang kadalanan.
Bulahan ikaw nga mahadlokon sa Ginoo, nga nagalakaw sa iyang kadalanan. Kay magakaon ka sa bunga sa imong binuhatan; mabulahan gayod ikaw ug mapanalanginan. (R)
Ang imong asawa mahisama sa usa ka mabungahon nga bagon nga anaa sa tugkaran sa imong balay; ang imong mga anak sama sa mga tanom nga olibo libot sa imong talad. (R)
Ania, ingnon niini pagpanalangin ang tawo nga mahadlokon sa Ginoo. Ang Ginoo manalangin kanimo gikan sa Sion: makakita unta ikaw sa kausbawan sa Jerusalem sa tanang mga adlaw sa imong kinabuhi. (R)
PAGBASA GIKAN SA SULAT NI SAN PABLO NGADTO SA TAGA-COLOSAS
Col. 3:12-21
Kamo ang katawhan sa Dios; gihigugma kamo niya ug gipili aron maiya. Busa kinahanglan nga magmaluluy-on kamo, magmahigugmaon, magmapaubsanon, magmaaghop ug magmapailubon. Pagtinabangay ug pagpinasayloay kamo kon duna kamoy mulo batok kang bisan kinsa kaninyo. Pagpinasayloay kamo ingon nga gipasaylo kamo sa Ginoo. Ug idugang niining tanan ang paghigugma nga maoy magbugkos sa tanan ngadto sa hingpit nga panaghiusa. Paharia sa inyong kasingkasing ang kalinaw nga gikan ni Kristo, kay alang niining kalinawa gitawag kamo sa Dios aron mahiusa kamo diha sa usa ka lawas, ug magmapasalamaton kamo. Papuy-a sa inyong kasingkasing ang mensahe ni Kristo, uban sa tanang kabahandianon niini. Pagtinudloay ug pagpahimangnoay kamo uban sa tanang kaalam. Pag-awit kamog mga salmo ug balaang mga alawiton; awiti ninyo ang Dios uban sa pasalamat diha sa inyong mga kasingkasing. Busa bisag unsa ang inyong buhaton o isulti, himoa sa ngalan sa Ginoong Jesus, uban sa pagpasalamat sa Dios nga Amahan pinaagi kaniya. Mga asawa, sunda ug tahora ang inyong bana kay mao kini ang angay ninyong buhaton ingon nga mga Kristohanon. Mga bana, higugmaa ang inyong asawa ug ayaw silag daugdaoga. Mga anak, pagmasinugtanon kamo kanunay sa inyong mga ginikanan kay mao kanay makapahimuot sa Dios. Mga ginikanan, ayaw palaguta ang inyong mga anak kay tingali unyag mawad-an silag kadasig.
ANG PULONG SA GINOO.
SALAMAT SA DIOS.
PAGBASA SA SANTOS NGA EBANGHELYO SUMALA NI SAN MATEO
Mt. 2:13-15, 19-23
Sa diha nga nanlakaw na ang mga dumuduong, usa ka anghel sa Ginoo mipakita kang Jose pinaagig damgo ug miingon, "Bangon, dad-a ang bata ug ang iyang inahan ug pangagiw kamo ngadto sa Ehipto, ug pabilin didto hangtod nga papaulion ko kamo, kay ang bata pangitaon ni Herodes aron patyon." Busa mibangon si Jose ug gidala niya ang bata ug ang inahan, ug niadtong gabhiona mikagiw sila sa Ehipto. Ug nagpabilin sila didto hangtod nga namatay si Herodes. Nahitabo kini aron matuman ang giingon sa Ginoo pinaagi sa propeta, "Gitawag ko ang akong Anak gikan sa Ehipto." Sa patay na si Herodes, usa ka anghel sa Ginoo mipakita kang Jose didto sa Ehipto pinaagig damgo, ug miingon, "Bangon, dad-a ang bata ug ang iyang inahan, ug balik ngadto sa yuta sa Israel, kay patay na ang nagtinguha pagpatay sa bata." Busa mibangon si Jose, ug gidala niya ang bata ug ang inahan, ug namauli sila sa yuta sa Israel. Apan sa pagkadungog niya nga si Arquelao mao nay naghari sa Judea puli kang Herodes nga iyang Amahan, nahadlok si Jose sa pagpuyo didto. Unya gipahimangnoan na usab siya pinaagig damgo, ug busa miadto siya sa lalawigan sa Galilea ug mipuyo sa usa ka lungsod nga ginganlag Nazaret. Nahitabo kini aron matuman ang giingon sa mga propeta, "Siya pagatawgong Nazaretnon."
ANG EBANGHELYO SA GINOO.
DAYGON IKAW, O KRISTO.
