PAGBASA GIKAN SA MGA BUHAT SA MGA APOSTOLES
Acts 6:8-10; 7:54-59
Si Esteban, usa ka tawo nga puno sa grasya ug sa gahom, nagbuhat og dagkong mga milagro ug mga butang katingalahan atubangan sa katawhan. Apan may mga tawo nga misupak ug nakiglantugi kaniya; ug ang uban kanila mga Judio nga taga-Cirene ug Alejandria nga sakop sa sinagoga nga ginganlag Mga Tawong Libre, ug ang uban taga-Cilicia ug Asia. Apan gihatagan si Esteban sa Espiritu og kaalam ug tungod niini wala sila makabuntog kaniya sa lantugi. Samtang ang mga sakop sa Labaw'ng Hukmanan namati kang Esteban, nangasuko sila pag-ayo ug nagpangagot sila sa ilang kapungot kaniya. Apan si Esteban nga puno sa Espiritu Santo, mihangad sa langit ug nakita niya ang himaya sa Dios ug si Jesus nga nagtindog sa tuo sa Dios! Miingon siya, "Tan-awa ang langit nga naabli ug ang Anak sa Tawo nga nagtindog sa tuo sa Dios!" Apan naninggit sila ug nanampong sa ilang mga dalunggan, ug nagdungan silang tanan paghasmag kaniya. Unya gitaral nila siya ngadto sa gawas sa siyudad ug gibato. Ug gipabantayan sa mga saksi ang ilang mga kupo sa usa ka batan-on nga ginganlag Saulo. Ug samtang gibato nila si Esteban, nag-ampo siya sa Ginoo, nga nag-ingon, "Ginoong Jesus, dawata ang akong espiritu."
ANG PULONG SA GINOO.
SALAMAT SA DIOS.
SALMO RESPONSORYO
Ps. 31:3-8, 17, 21
R. Sa imong mga kamot, O Ginoo, akong gitugyan ang akong espiritu.
Pagpakahimong akong bato nga dalangpanan usa ka kota nga maghatag kanakog kasiguroan. Ikaw ang akong bato ug akong salipdanan; tungod sa imong ngalan imo akong dad-on ug tultolan. (R)
Sa imong mga kamot gitugyan ko ang akong espiritu; imo akong luwason, O Ginoo, O matinud-anong Dios. Ang akong pagsalig anaa sa Ginoo. Magsadya ako ug maglipay sa imong kaayo. (R)
Padan-aga ang imong nawong ngari sa imong suluguon; luwasa ako diha sa imong kaayo. Gitagoan mo sila diha sa landong sa imong presensiya gikan sa gikasabotan sa mga tawo. (R)
PAGBASA SA SANTOS NGA EBANGHELYO SUMALA NI SAN MATEO
Mt. 10:17-22
Si Jesus miingon ngadto sa napulog-usa ka tinun-an, "Pagbantay kamo kay may mga tawo unya nga mudakop ug motaral kaninyo ngadto sa hukmanan, ug latoson kamo nila sulod sa ilang mga sinagoga. Taralon kamo atubangan sa mga punoan ug sa mga hari tungod kanako, ug makasangyaw kamo sa Maayong Balita ngadto kanila ug sa mga dili Judio. Kon taralon na kamo sa hukmanan, ayaw kamo kabalaka unsay inyong isulti o unsaon ninyo pagsulti; kay inig-abot na sa panahon, hatagan kamo sa inyong isulti. Kay ang mga pulong nga inyo unyang isulti dili inyo, kondili iya sa Espiritu sa inyong Amahan nga magsulti diha kaninyo." "Itugyan sa mga tawo ang ilang kaugalingong mga igsuon aron patyon, ug mao usab kini ang buhaton sa mga amahan ngadto sa ilang mga anak. Makigbatok usab ang mga anak sa ilang mga ginikanan ug ipapatay sila sa mga anak. Dumtan kamo sa tanan tungod kanako, apan maluwas ang magpadayon hangtod sa katapusan."
ANG EBANGHELYO SA GINOO.
DAYGON IKAW, O KRISTO.
