PAGBASA GIKAN SA BASAHON NI PROPETA ISAIAS
Is. 9:1-6
Ang katawhan nga kaniadto naglakaw sa kangitngit nakakitag dakong kahayag; ang nagpuyo sa mangiob nga dapit gisidlakan na sa kahayag. Gipadaghan mo ang molupyo sa nasod, Ginoo, nagmaya sila diha sa imong atubangan; sama sa pagmaya sa mga tawo inigkating-ani ug ingon nga maglipay ang mga tawo inigbahin-bahin nila sa ilang inilog. Kay gigupok mo sama sa nahitabo sa Midian ang yugo nga iyang gisangon ug ang karga nga iyang gipas-an ug ang garoti sa nagdaugdaog kaniya. Kay natawo alang kanato ang usa ka bata, gihatag kanato ang usa ka anak lalaki; ug siya ang magmando sa tanan, ug nganlan siyag "Maalamong Magtatambag," "Dios nga Gamhanan," "Walay Katapusang Amahan," "Prinsipe sa Pakigdait." Walay katapusan ang pag-uswag sa iyang pagmando ug molungtad usab ang kalinaw, diha sa trono ni David ug sa gingharian niini, ug lig-onon niya kini ug palungtaron uban sa hustisya ug sa katarong sukad karon hangtod sakahangturan. Himoon gayod kini sa Ginoo nga Labing Gamhanan.
ANG PULONG SA GINOO.
SALAMAT SA DIOS.
SALMO RESPONSORYO
Ps. 96:1-2, 2-3, 11-12, 13
R. Karong adlawa natawhan kita og manunubos, si Kristo ang Ginoo.
Awiti ang Ginoo og usa ka bag-ong awit; awiti ang Ginoo, kamong tanang mga yuta. Awiti ang Ginoo; dayga ang iyang ngalan. (R)
Ipahibalo ang iyang kaluwasan sa tanang adlaw. lasoy ang iyang himaya diha sa kanasuran; diha sa tanang katawhan, ang iyang katingalahang mga buhat. (R)
Paglipay mga langit ug pagsadya yuta: palanoga ang kadagatan ug ang nagpuno niini; maglipay ang kapatagan ug ang tanan nga anaa kanila! Unya manlukso sa kalipay ang tanang kahoy sa kalasangan. (R)
Unya manlukso sila sa kalipay atubangan sa Ginoo kay miabot siya. Kay niabot siya aron maghari sa kalibutan. Handoman niya ang kalibutan sa iyang katarong ug ang katawhan sa iyang kamakanunayon. (R)
PAGBASA GIKAN SA SULAT NI SAN PABLO NGADTO KANG TITO
Ti. 2:11-14
Kay nagpadayag ang Dios sa iyang grasya alang sa kaluwasan sa tanang mga tawo. Ang maong grasya nagtudlo kanato pagbiya sa kinabuhing dautan. ug sa kalibutanong kailibgon ug sa pagkinabuhi nga mapinugnganon sa kaugalingon, matarong ug diosnon, samtang nagpaabot kita sa bulahang Adlaw nga atong gilauman inigpadayag na sa himaya sa atong gamhanang Dios ug Manluluwas nga si Jesukristo. Gitugyan niya ang iyang kaugalingon aron pagluwas kanato sa tanang pagkadautan ug paghimo kanato nga putling katawhan nga iyaha ra gayod, ug masibuton pagbuhat sa maayo.
ANG PULONG SA GINOO.
SALAMAT SA DIOS.
PAGBASA SA SANTOS NGA EBANGHELYO SUMALA NI SAN LUCAS
Lk. 2:1-14
Niadtong panahona mipakanaog si Emperador Augusto og sugo nga ang tanang molupyo sa gingharian magpalista alang sa senso. Sa paghimo niining unang senso, si Cirenio maoy gobernador sa Siria. Busa ang tanan miadto sa ilang tagsa-tagsa ka lungsod aron pagpalista. Gikan sa lungsod sa Nazaret sa Galilea, miadto si Jose sa Judea, ngadto sa Betlehem, ang lungsod nga natawhan ni Hari David. Miadto si Jose didto kay kaliwat man siya ni David. Ang tuyo niya mao ang pagpalista uban kang Maria nga iyang sinayoran, nga mabdos niadtong higayona. Ug samtang didto sila sa Betlehem, miabot ang panahon nga manganak na siya. Nanganak siya sa iyang panganay nga lalaki, ug giputos niya ang bata sa panapton ug gipahiluna sa pasongan, kay wala na may luna sa balay nga abotanan. Niadtong dapita may mga magbalantay sa karnero nga nagtukaw sa kagabhion aron pag-atiman sa ilang mga hayop didto sa kaumahan. Mitungha kanila ang usa ka anghel sa Ginoo, ug nadan-agan sila sa himaya sa Ginoo; ug nalisang sila pag-ayo. Apan ang anghel miingon kanila, "Ayaw kamo kahadlok, kay ania ako nagdalag Maayong Balita alang kaninyo nga makalipay pag-ayo sa tanang katawhan. Kay karong gabhiona, natawo sa lungsod ni David ang inyong Manluluwas, ang Kristo nga Ginoo! Mao kini ang inyong ilhanan: makaplagan ninyo ang usa ka bata nga giputos og panapton ug naghigda sa pasongan." Ug sa kalit mitungha usab uban sa anghel ang usa ka dakong panon sa mga anghel sa langit nga nag-awit og mga pagdayeg sa Dios: "Dalaygon ang Dios sa kahitas-an, ug sa yuta panagdait sa mga tawo nga iyang gikahimut-an."
ANG EBANGHELYO SA GINOO.
DAYGON IKAW, O KRISTO.
