PAGBASA GIKAN SA BASAHON NI PROPETA ISALAS
Is. 62:11-12
Nga ang Ginoo miingon sa tibuok kalibutan, "Ingna ang mga molupyo sa Jerusalem, tan-awa, ania na ang inyong manluluwas; nagdala siya sa katawhan nga iyang giluwas." Nganlan na silag "Ang Balaang Katawhan sa Dios," "Ang Linuwas sa Ginoo," ug nganlan ang Jerusalem "Ang Siyudad nga Gihigugma sa Dios, Ang Siyudad Nga Wala Biyai sa Dios."
ANG PULONG SA GINOO.
SALAMAT SA DIOS.
SALMO RESPONSORYO
Ps. 97:1, 6, 11-12
R. Usa ka kahayag modan-ag kanato niining adlawa: ang Ginoo natawo alang kanato.
Ang Ginoo hari; palipaya ang yuta; nga maglipay ang daghang kapuloan. Ang kalangitan magsangyaw sa iyang katarong, ug ang tanang katawhan makakita sa iyang himaya. (R)
Usa ka kahayag mibanag-banag alang sa matarong; ug ang kalipay alang sa matarong og kasingkasing. Paglipay diha sa Ginoo, kamong mga matarong, ug pasalamati ang iyang balaang ngalan. (R)
PAGBASA GIKAN SA SULAT NI SAN PABLO NGADTO KANG TITO
Ti. 3:4-7
Apan sa dihang gipadayag na ang kaluoy ug gugma sa Dios nga atong Manluluwas, kita iyang giluwas, dili tungod sa bisan unsang maayo nga atong nabuhat, kondili tungod sa iyang kaluoy pinaagi sa paghugas nga gihimo sa Espiritu Santo aron kita makabaton og bag-ong kinabuhi. Kay madagayaong gibubo sa Dios ang Espiritu Santo dinhi kanato pinaagi kang Jesukristo nga atong Manluluwas, aron pinaagi sa iyang grasya ang Dios mag-isip kanato nga matarong ug aron makapanag-iya kita sa kinabuhing walay katapusan nga atong gipaabot.
ANG PULONG SA GINOO.
SALAMAT SA DIOS.
PAGBASA SA SANTOS NGA EBANGHELYO SUMALA NI SAN LUCAS
Lk. 2:15-20
Sa namalik na ang mga anghel ngadto sa langit, ang mga magbalantay sa karnero nag-ingnanay, "Mangadto kita sa Betlehem ug tan-awon ta kining nahitabo nga gisugilon kanato sa Ginoo." Busa midali sila pag-adto ug hikaplagan nila si Maria ug si Jose, ug nakita nila ang bata nga naghigda sa pasongan. Sa diha nga ang mga magbalantay nakakita sa bata, gisugilon nila ang gisulti sa anghel mahitungod kaniya. Ug ang tanang nakadungog niini nahibulong sa gibalita kanila sa mga magbalantay sa karnero. Nahinumdom si Maria niining tanan, ug namalandong siya pag-ayo mahitungod niining mga butanga. Ug namauli ang mga magbalantay nga nag-awit og mga pagdayeg sa Dios tungod sa tanan nga ilang nadungog ug nakita, sumala gayod sa gisugilon kanila sa anghel.
ANG EBANGHELYO SA GINOO.
DAYGON IKAW, O KRISTO.
