⚪ [S] Bihilya sa Pasko sa Pagkatawo sa Ginoo

PAGBASA GIKAN SA BASAHON NI PROPETA ISAIAS

Is. 62:1-5

Mosulti gayod ako bahin kanimo, Sion; dili gayod ako mopahulay tungod kanimo, Jerusalem, hangtod nga ang imong kadaugan mosidlak ingon sa kahayag, ug ang imong kaluwasan modan-ag ingon sa sulo. Makakita unya sa imong kadaugan ang kanasuran, ug makasaksi sa imong himaya ang tanang mga hari; bag-o na unyang ngalan ang itawag kanimo, ug kini ihatag kanimo sa Ginoo. Mahimo kang matahom nga korona diha sa kamut sa Ginoo, usa ka harianong korona diha sa kamut sa imong Dios, Dili ka na tawgog "Sinalikway", ug ang imong yuta dili na tawgog "Biniyaan"; kondili tawgon ka na nga "Akong Kalipay", ug ang imong yuta tawgog "Minyo"; kay nalipay ang Ginoo kanimo, ug mahisama siya sa usa ka bana ngadto sa imong yuta. Kay ingon nga ang batan-ong lalaki mangasawa sa usa ka ulay, pangasaw-on ka usab sa Ginoo; ug ingon nga malipay ang pamanhonon tungod sa iyang pangasaw-onon, malipay usab ang imong Dios tungod kanimo.

SALMO RESPONSORYO

Ps. 89:4-5, 16, 17, 27-29

R. Mag-awit ako sa kaayo sa Ginoo hangtod sa kahangturan.

Nakigsabot ako sa akong pinili, nanumpa ako kang David akong sulugoon: Sa kahangturan lig-onon ko ang imong kaliwat ug pabarugon ko ang imong trono alang sa tanang kaliwatan. (R)

Bulahan ang lungsod nga nahibalo sa malipayong singgit; diha sa kahayag sa imong nawong, O Ginoo, nagalakat sila. Sa imong ngalan nagmalipayon sila sa tanang adlaw, pinaagi sa imong katarong gibayaw sila. (R)

Moingon siya kanako, "Ikaw ako nga Amahan; Akong Dios, Akong Bato, Akong Manluluwas." Hangtod sa kahangturan padayonon ko ang akong kaluoy alang kaniya, ug ang akong pagpakigsabot kaniya magabarog nga malig-on. (R)

PAGBASA GIKAN SA MGA BUHAT SA MGA APOSTOLES

Acts 13:16-17, 22-25

Mitindog si Pablo, ug gisinyasan niya sila sa iyang kamut, ug giingnan, "Mga igsuong Israelita ug tanang dili Judio nga nagtuo sa Dios: pamati kamo! Ang Dios niining nasod sa Israel nagpili sa atong mga katigulangan ug naghimo kanila nga dakong nasod sa panahon sa pagpuyo nila nga mga langyaw sa yuta sa Ehipto. Pinaagi sa iyang dakong gahom, ang Dios nagpagawas kanila gikan sa Ehipto." "Sa dihang gipapahawa siya sa trono, si David gihimo sa Dios nga ilang hari. Kini ang giingon sa Dios mahitungod kaniya, 'Nakita ko nga si David, anak ni Isai, nakapahimuot kanako, ug magbuhat sa tanan nga isugo ko kaniya.' Si Jesus nga kaliwat ni David mao ang gipili sa Dios aron magluwas sa katawhan sa Israel sumala sa iyang gisaad. Sa wala pa moanhi si Jesus, nagwali si Juan ngadto sa tanang mga tawo sa Israel nga kinahanglan maghinulsol sila ug magpabunyag. Ug sa hapit na si Juan mamatay, miingon siya sa katawhan, 'Kinsa ba ako sa inyong hunahuna? Dili ako ang inyong gipaabot. Apan sunod kanako may moanhi, ug dili ako takus bisan gani paghubo sa iyang sandalyas.'"

ANG SINUGDANAN SA EBANGHELYO SUMALA NI SAN MATEO

Mt. 1:1-25 (TINAAS)

Mao kini ang talaan sa kagikan ni Jesucristo, kaliwat ni David, nga kaliwat ni Abraham. Si Abraham mao ang Amahan ni Isaac; si Isaac amahan ni Jacob; si Jacob amahan ni Juda ug sa iyang mga igsuon. Si Juda mao ang amahan ni Fares ug ni Sara (si Tamar ang ilang inahan); si Fares maoy amahan ni Esrom; si Esrom amahan ni Aram; si Aram mao ang amahan ni Aminadab; si Aminadab maoy amahan ni Naason; si Naason amahan ni Salmon; si Salmon mao ang amahan ni Boos (si Rahab ang iyang inahan); si Boos maoy amahan ni Obed (si Ruth mao ang iyang inahan); si Obed amahan ni Isai; ug si Isai mao ang amahan ni Hari David. Si David mao ang amahan ni Solomon (ang iyang inahan asawa kaniadto ni Urias); si Solomon maoy amahan ni Roboam: si Roboam amahan ni Abias; si Abias mao ang amahan ni Asa; si Asa maoy amahan ni Josafat; si Josafat mao amahan ni Joram; si Joram amahan ni Usias; si Usias maoy amahan ni Jotam; si Jotam mao ang amahan ni Acas; si Acas amahan ni Ezequias; si Ezequias maoy amahan ni Manases; si Manases mao ang amahan ni Amon; si Amon amahan ni Josias; si Josias maoy amahan ni Jeconias ug sa iyang mga igsuon. Niadtong panahona nabihag ang mga Israelita ngadto sa Babilonia. Human mabihag ang mga Israelita: si Jeconias nanganak kang Salatiel; si Salatiel mao ang amahan ni Sorobabel; si Sorobabel maoy amahan ni Abiud; si Abiud maoy amahan ni Eliaquim; si Eliaquim mao ang amahan ni Asor; si Asor maoy amahan ni Sadoc; si Sadoc maoy amahan ni Aquim; si Aquim maoy amahan ni Eliud; si Eliud mao ang amahan ni Eleasar; si Eleasar maoy amahan ni Matan: si Matan maoy amahan ni Jacob; si Jacob mao ang amahan ni Jose, ang bana ni Maria nga maoy Inahan ni Jesus nga ginganlag Mesiyas. Busa may napulog-upat ka kaliwatan gikan kang Abraham hangtod ni Hari David, ug napulog-upat ka kaliwatan gikan ni David hangtod sa panahon sa pagkabihag sa mga Israelita, ug laing napulog-upat ka kaliwatan gikan sa pagkabihag hangtod nga natawo ang Mesiyas. Mao kini ang kaagi sa pagkatawo ni Jesucristo. Ang iyang inahan nga si Maria sinayoran ni Jose, apan sa wala pa sila magtipon nakamatikod si Maria nga nagsabak siya sa lalang sa Espiritu Santo. Si Jose nga iyang pamanhonon, tawo nga matarong, apan dili siya buot nga pakaulawan niya si Maria atubangan sa mga tawo, busa naglaraw siya sa pagpakigbulag kaniya sa hilom. Samtang naghunahuna siya niini, mipakita kaniya ang usa ka anghel sa Ginoo pinaagi sa damgo ug miingon, "Jose, kaliwat ni David, ayaw kahadlok pagpangasawa kang Maria, kay ang iyang gisabak lalang sa Espiritu Santo. Manganak siyag lalaki ug nganli siyag Jesus—kay luwason niya ang iyang katawhan sa ilang mga sala." Ug kining tanan nahitabo aron matuman ang giingon sa Ginoo pinaagi sa propeta, "Ang usa ka babayeng ulay magmabdos ug moanak og lalaki, ug nganlan siyag Emmanuel" (nga sa ato pa, "Ang Dios ania uban kanato"). Busa sa pagmata ni Jose gituman niya ang gisugo sa anghel ug gipangasawa niya si Maria. Apan wala niya hilabti si Maria sa wala pa siya manganak. Ug ang bata ginganlan ni Jose og Jesus.

PAGBASA SA SANTOS NGA EBANGHELYO SUMALA NI SAN MATEO

Mt. 1:18-25 (MINUBO)

Mao kini ang kaagi sa pagkatawo ni Jesucristo. Ang iyang inahan nga si Maria sinayoran ni Jose, apan sa wala pa sila magtipon nakamatikod si Maria nga nagsabak siya sa lalang sa Espiritu Santo. Si Jose nga iyang pamanhonon, tawo nga matarong, apan dili siya buot nga pakaulawan niya si Maria atubangan sa mga tawo, busa naglaraw siya sa pagpakigbulag kaniya sa hilom. Samtang naghunahuna siya niini, mipakita kaniya ang usa ka anghel sa Ginoo pinaagi sa damgo ug miingon, "Jose, kaliwat ni David, ayaw kahadlok pagpangasawa kang Maria, kay ang iyang gisabak lalang sa Espiritu Santo. Manganak siyag lalaki ug nganli siyag Jesus—kay luwason niya ang iyang katawhan sa ilang mga sala." Ug kining tanan nahitabo aron matuman ang giingon sa Ginoo pinaagi sa propeta, "Ang usa ka babayeng ulay magmabdos ug moanak og lalaki, ug nganlan siyag Emmanuel" (nga sa ato pa, "Ang Dios ania uban kanato"). Busa sa pagmata ni Jose gituman niya ang gisugo sa anghel ug gipangasawa niya si Maria. Apan wala niya hilabti si Maria sa wala pa siya manganak. Ug ang bata ginganlan ni Jose og Jesus.