PAGBASA GIKAN SA IKADUHANG BASAHON NI SAMUEL
2 Sm. 7:1-5, 8b-12, 14a, 16
Unya sa diha nga nakasukad na si David sa iyang pagkahari ug wala na siya ipasamok sa Ginoo sa iyang mga kaaway nga naglibot kaniya, giingnan niya si Natan, ang propeta, "Nakita mo karon nga nagpuyo ako sa palasyo nga sidro, apan anaa ta ibutang ang Sudlanan sa Kasabutan sa Dios sa usa ka tolda!" Ug miingon si Natan kang David, "Lakaw, buhata ang imong gitinguha, kay mag-uban kanimo ang Ginoo." Apan niadtong gabhiona gisultihan si Natan sa Ginoo, "Ingna ang akong alagad nga si David, Kini ang gisulti sa Ginoo: Buhatan ba ako nimog balay nga akong kapuy-an?" "Busa karon sultihi ang akong sulugoon nga si David, 'Kini ang giingon sa Ginoo nga Labing Gamhanan: Gikuha ko ikaw sa pasibsibanan, gikan sa imong pagkamagbalantay sa karnero, aron paghimo kanimong hari sa akong katawhan, ang mga Israelita. Nag-uban ako kanimo sa tanang dapit nga imong giadtoan, ug gibuntog ko ang tanan mong kaaway; ug himoon kong bantogan ang imong ngalan, ingon sa mga ngalan sa mga bantogang tawo sa kalibutan. Hatagan kog luna ang akong katawhan, ang mga Israelita, ug papuy-on ko sila didto aron makabaton silag ilang kaugalingong yuta. Dili na sila samokon sa mga tawong mapintas ingon kaniadto, sukad sa panahon nga nagtudlo akog mga maghuhukom alang sa akong katawhan, ug dili ko na ikaw ipasamok sa tanan mong mga kaaway. Dugang pa niana, ako nag-ingon nga hatagan ko ikawg mga kaliwat. Ug inigkamatay mo, ilubong ka tupad sa imong mga katigulangan ug himoon kong hari ang usa sa imong mga anak ug lig-onon ko ang iyang gingharian. Ako maiyang amahan, ug siya maakong anak. Kon makasala siya, kastigohon ko siya ingon sa buhaton sa usa ka amahan ngadto sa iyang anak. Ug palungtaron ko ang imong banay ug gingharian hangtod sa hangtod.'"
ANG PULONG SA GINOO.
SALAMAT SA DIOS.
SALMO RESPONSORYO
Ps. 89:2-3, 4-5, 27, 29
R. Awitan ko kanunay ang kaayo sa Ginoo.
Ang mga kaayohan sa Ginoo akong awitan sa gihapon; latas sa tanang kaliwatan magsangyaw ang akong baba sa imong kamakanunayon. Kay nag-ingon ka, "Ang akong kaluoy nagabarog sa kahangturan"; sa langit imong gilig-on ang imong kamatinud-anon. (R)
"Naghimo akog kasabutan uban sa akong pinili, nanumpa ako kang David akong sulugoon; Hangtod sa kahangturan lig-onon ko ang imong kaliwat, ug pabarugon ko ang imong trono sa tanang kaliwatan." (R)
Miingon siya kanako, "Ikaw ang akong Amahan, akong Dios, akong bato, akong Manluluwas." Hangtod sa kahangturan patunayon ko ang akong kaluoy alang kanimo, ug ang akong kasabutan uban kanimo nagabarog nga malig-on. (R)
PAGBASA SA SANTOS NGA EBANGHELYO SUMALA NI SAN LUCAS
Lk. 1:67-79
Napuno sa Espiritu Santo ang iyang amahan nga si Zacarias ug nanagna: "Daygon nato ang Ginoo, ang Dios sa Israel! Kay mianhi siya aron pagtabang sa iyang katawhan ug paghatag kanilag kagawasan. Gipaanhi niya kanato ang usa ka Gamhanang Manluluwas nga kaliwat sa iyang sulugoon nga si David, Kini maoy iyang giingon kaniadto pinaagi sa iyang mga balaang propeta: Misaad siya sa pagluwas kanato gikan sa atong mga kaaway, Ug gikan sa gahom niadtong tanan nga nagdumot kanato. Miingon siya nga mopakita siyag kaluoy sa atong mga katigulangan, Ug mahinumdomn sa Balaang Kasabutan. Misaad siya sa atong amahan nga si Abraham, Ug nanumpa nga iya kitang luwason gikan sa atong mga kaaway, Ug mitugot kanato nga mag-alagad kaniya sa walay kahadlok, Nga mahimong balaan ug matarong sa atubangan niya. Sa tibuok natong kinabuhi." "Ug ikaw, anak ko, tawgon ka nga propeta sa Dios nga Labing Halangdon; Mag-una ka sa Ginoo Aron pag-andam sa iyang dalan, Sa pagpahibalo sa iyang katawhan nga maluwas sila, Pinaagi sa pagpasaylo sa ilang mga sala. Kay ang atong Dios maluluy-on ug malumo; Siya maoy mopadan-ag kanato sa banagbanag nga masanagon sa atong kaluwasan, Ug mobanwag gikan sa langit sa tanang nagpuyo sa mangitngit nga landong sa kamatayon, Pag-agak sa atong mga lakang ngadto sa dalan sa kalinaw."
ANG EBANGHELYO SA GINOO.
DAYGON IKAW, O KRISTO.
