PAGBASA GIKAN SA BASAHON NI PROPETA SOFONIAS
Zep. 3:14-18
Awit og kusog, O katawhan sa Sion. Singgit, O Israel! Pagmaya ug paglipay pag-ayo, O Jerusalem! Dili na kamo silotan sa Ginoo, giabog na niya ang inyong mga kaaway. Ang hari sa Israel, ang Ginoo, anaa sa inyong taliwala, busa ayaw na kamo kahadlok sa dautan. Niadtong adlawa ingnon unya ang Jerusalem: "Ayaw kahadlok, O Sion; ayaw pakawad-ig kusog ang imong mga kamot. Ang Ginoo nga inyong Dios anaa uban kaninyo, ang iyang gahom mohatag kaninyog kadaugan. Malipay kaninyo ang Ginoo, ug diha sa iyang gugma hatagan kamog bag-ong kinabuhi. Moawit siya ug magmalipayon tungod kaninyo, sama sa buhaton sa adlaw sa pangilin." Miingon ang Ginoo, "Kuhaon ko ang katalagman gikan kaninyo, aron dili na kamo bugalbugalan tungod niini."
ANG PULONG SA GINOO.
SALAMAT SA DIOS.
SALMO RESPONSORYO
Ps. 33:2-3, 11-12, 20-21
R. Singgit kamo sa kalipay diha sa Ginoo, kamo nga mga balaan; awiti ninyo siya og usa ka bag-ong awit.
Pasalamati ang Ginoo diha sa Alpa, uban sa lira nga may napulo ka koldas. Awiti ang iyang mga pagdayeg. Awiti siya ug usa ka bag-ong awit. Ayoha pagkablit ang mga koldas, uban sa mga singgit sa kalipay. (R)
Ang laraw sa Ginoo nagabarog sa kahangturan: ang hunahuna sa iyang kasingkasing, latas sa tanang kaliwatan. Bulahan ang nasod kansang Dios mao ang Ginoo, ang lungsod nga iyang gipili alang sa iyang kaugalingong kabilin. (R)
Ang atong kalag nagapaabot sa Ginoo, nga mao ang atong hinabang ug atong panalipod, kay diha kaniya nalipay ang atong mga kasingkasing; diha sa iyang balaang ngalan nagasalig kita. (R)
PAGBASA SA SANTOS NGA EBANGHELYO SUMALA NI SAN LUCAS
Lk. 1:39-45
Wala madugay, nangandam si Maria ug midali pag-adto sa kabungtoran, sa usa ka lungsod sa Judea. Miadto siya sa balay ni Zacarias ug nangumosta kang Isabel. Sa pagkabati ni Isabel sa pangumosta ni Maria, milihok ang bata sulod sa iyang tiyan. Unya napuno sa Espiritu Santo si Isabel, ug misulti sa makusog, "Bulahan ka sa tanang mga babaye! Bulahan ang bata nga imong ianak! Ngano kaha nga miduaw man kanako ang inahan sa akong Ginoo? Kay pagkadungog ko gayud sa imong pangumosta, mi-ulpot sa kalipay ang bata nga akong gisabak. Bulahan ka nga mituo nga matuman gayud ang mensahe sa Ginoo kanimo!"
ANG EBANGHELYO SA GINOO.
DAYGON IKAW, O KRISTO.
