PAGBASA GIKAN SA BASAHON SA MGA MAGHUHUKOM
Jgs. 13:2-7, 24-25
Unya dihay usa ka tawo nga ginganlag Manoa; taga lungsod siya sa Zora, ug sakop sa banay ni Dan. Wala gayod manganak ang asawa niya. Mipakita sa babaye ang angel sa Ginoo ug miingon, "Wala ka manganak, apan karon magmabdos ka ug manganak og lalaki. Ayaw gayod pag-inom ug bisan unsang bino o ilimnong makahubog, o pagkaon sa bisan unsang kalan-on nga gidili, tungod kay magmabdos ka ug manganak og lalaki. Ayaw gayod patupihi ang iyang buhok kay sukad gayod sa iyang pagkatawo ihalad siya ngadto sa Dios ingon nga Nasareo. Siya maoy moluwas sa Israel gikan sa mga Filistihanon," Unya milakaw ang babaye ug giingnan ang iyang bana, "May tawo sa Dios nga miduol kanako ug makahadlok ang iyang panagway sama sa anghel sa Dios. Wala ako mangutana kon diin siya gikan ug wala usab siya motug-an kanako sa iyang ngalan. Apan gisultihan ako niya nga magmabdos ako ug manganak og lalaki. Giingnan ako niya nga dili ako mag-inom ug bisan unsang bino o ilimnong makahubog, ni magkaon ug bisan unsang kalan-ong ginadili, tungod kay ang bata ihalad ngadto sa Dios ingon nga Nasareo sa tibuok niyang kinabuhi." Ang babaye nanganak og lalaki ug ginganlan niyag Samson. Ang bata mitubo, ug ang Ginoo nagpanalangin kaniya. Ug ang espiritu sa Ginoo misugod paggahom kaniya samtang didto siya sa Kampo sa Dan tungatunga sa Zora ug Estaol.
ANG PULONG SA GINOO.
SALAMAT SA DIOS.
SALMO RESPONSORYO
Ps. 71:3-4, 5-6, 16-17
R. Pun-a ako sa imong pagdayeg ug awitan ko ang imong himaya.
Pagpakahimong akong bato nga dalangpanan, usa ka kota nga maghatag kanako og kasiguroan. Kay ikaw man ang akong bato ug akong kota, O Dios ko, luwasa ako sa kamut sa dautan. (R)
Kay ikaw ang akong gilauman, O Ginoo; ang akong gisaligan, O Dios, sukad sa akong kabatan-on. Diha kanimo nagasalig ako sukad sa pagkatawo; gikan sa tiyan sa akong inahan ikaw ang akong kusog. (R)
Maghisgot ako sa gamhanang mga buhat sa Ginoo; O Dios, magsugilon ako sa imong ulusahong katarong. O Dios, gitudloan mo ako sukad sa akong kabatan-on ug hangtod karon nagasangyaw ako sa imong katingalahang mga buhat. (R)
PAGBASA SA SANTOS NGA EBANGHELYO SUMALA NI SAN LUCAS
Lk. 1:5-25
Sa panahon nga si Herodes maoy hari sa Judea, may usa ka pari nga ginganlag Zacarias, nga sakop sa parianong laray ni Abias. Isabel ang ngalan sa iyang asawa, nga sakop usab sa usa ka parianong banay. Silang duha nagpuyog dalaygong kinabuhi atubangan sa Dios, ug nagtuman pag-ayo sa tanang sugo ug Balaod sa Ginoo. Wala silay anak kay dili na man makapanganak si Isabel, ug siya ug si Zacarias tigulang na kaayo. Usa ka adlaw niana, nagtuman si Zacarias sa ivang katungdanan pagkapari atubangan sa Dios, diha sa bahin sa pag-alagad nga iyang angkon adlaw-adlaw. Sumala sa batasan nga gisunod sa mga pari, napili siya pinaagi sa ripa sa pagsunog sa insenso didto sa halaran. Busa misulod siya sa Templo sa Ginoo, samtang nag-ampo ang panon sa mga tawo didto sa gawas sa takna nga gisunog ang insenso. Unya usa ka anghel sa Ginoo mipakita kaniya; nagtindog ang anghel sa tuo sa halaran diin gisunog ang insenso. Sa pagkakita ni Zacarias sa anghel, nalibog ug nahadlok siya; apan giingnan siya sa anghel, "Ayaw kahadlok, Zacarias! Gidungog sa Dios ang imong pag-ampo, ug ang imong asawa nga si Isabel moanak og lalaki. Nganli siyag Juan. Inigkatawo niya, magmaya ka ug malipay ingon man ang uban, kay mahimo siyang dako atubangan sa Ginoo. Dili gayod siya moinom og bino o isog nga ilimnon. Sukad sa iyang pagkatawo, mapuno siya sa Espiritu Santo, ug daghang mga tawo sa Israel dad-on niya balik ngadto sa Ginoo nga ilang Dios. Mag-una siya sa Ginoo, ug makabaton siyag espiritu ug gahom sama sa nabatonan ni propeta Elias. Himoon niya nga ang mga amahan ug mga anak magkauli; ang mga masupilon iyang pabalikon sa matarong nga dalan; ug ang katawhan andamon niya alang sa Ginoo. Giingnan ni Zacarias ang anghel, "Unsaon ko man pag-ila nga tinuod ang imong giingon kanako? Tigulang na ako ug tigulang na usab ang akong asawa." Ang anghel mitubag, "Ako si Gabriel nga nagtindog atubangan sa Dios nga maoy nagpadala kanako aron pagsulti ug pagtaho kanimo niining Maayong Balita. Apan wala ka motuo sa akong mensahe nga matuman gayod sa hustong panahon. Ug tungod kay wala ka man motuo, maamang ka; dili ka makasulti hangtod sa adlaw nga matuman ang akong gisaad kanimo." Niining higayona, naghulat ang mga tawo kang Zacarias ug nahibulong sila nganong nadugay siya kaayo sulod sa Templo. Sa paggula niya, dili na siya makasulti kanila busa nagtuo sila nga nakakita siyag panan-awon sulod sa Templo. Ug tungod kay dili man siya makalitok bisag usa ka pulong, misenyas na lamang siya kanila. Pagkatapus sa iyang turno sa pag-alagad sulod sa Templo, mipauli si Zacarias sa ila. Wala madugay, nagmabdos ang iyang asawa nga si Isabel, ug wala mobiya sa balay sulod sa lima ka bulan. Miingon si Isabel, "Karon mitabang na gayod kanako ang Ginoo niining paagiha. Gikuha niya ang naghatag kanakog kaulawan atubangan sa mga tawo!"
ANG EBANGHELYO SA GINOO.
DAYGON IKAW, O KRISTO.
