PAGBASA GIKAN SA BASAHON NI PROPETA SOFONIAS
Zep. 3:1-2, 9-13
Alaot ang Jerusalem, ang madaugdaogon ug hugawng siyudad nga misupil sa Ginoo! Dili siya magtagad kang bisan kinsa, ni mamati kon badlongon. Wala siya mosalig sa Ginoo ni modangop sa iyang Dios. "Niadtong panahona usbon ko ang katawhan sa kanasuran. Mag-ampo sila kanako lamang ug dili na sa ubang mga dios. Motahod silang tanan kanako. Gikan sa tabok sa mga suba sa Etiopia, ang napatlaag kong katawhan mosimba kanako nga magdalag mga halad. Niadtong adlawa dili kamo pakaulawan bisan sa inyong pagsukol kanako; kay kuhaon ko ang mga garboso kaninyo, ug dili na unya kamo magmapahitas-on didto sa balaan kong bukid. Ibilin ko didto ang usa ka katawhan nga mapaubsanon. Modangop sila kanako sa pagpakitabang. Kadtong nahibilin sa Israel dili na magbuhat og dautan ni mamakak pa. Pasibsibon nila ang ilang kahayopan ug mamahulay sila nga wala nay angay kahadlokan."
ANG PULONG SA GINOO.
SALAMAT SA DIOS.
SALMO RESPONSORYO
Ps. 34:2-3, 6-7, 17-18, 19, 23
R. Ang Ginoo nagapatalinghug sa singgit sa kabus.
Daygon ko ang Ginoo sa tanang panahon; ang iyang pagdayeg maania kanunay sa akong baba. Maghimaya unta ang akong kalagsa Ginoo; ang mapaubsanon makadungog kanako ug malipay. (R)
Tan-aw kamo kaniya aron mosanag kamo sa kalipay, ug dili kamo manglipaghong sa kaulaw. Sa pagsangpit sa gisakit nga tawo, namati ang Ginoo ug giluwas siya sa tanan niyang mga kagul-anan. (R)
Ang Ginoo nagasudya sa mga nagbuhat sa dautan, aron dili na sila hinumdoman sa yuta. Sa pagtuwaw sa matarong, nagpatalinghug ang Ginoo kanila, ug sa ilang mga kagul-anan giluwas sila niya. (R)
Haduol ang Ginoo sa naguol; ug kanila nga nag-antus aron pagluwas kanila. Nagaluwas ang Ginoo sa kinabuhi sa iyang mga sulugoon; walay kasal-anan kanila nga nagadangop kaniya. (R)
PAGBASA SA SANTOS NGA EBANGHELYO SUMALA NI SAN MATEO
Mt. 21:28-32
Si Jesus miingon ngadto sa mga labawng pari ug sa kadagkoan sa katawhan, "Karon, unsa may inyong hunahuna? Dihay tawo nga may duha ka anak nga lalaki. Miadto siya sa magulang ug iyang giingnan, 'Dong, pagtrabaho karong adlawa didto sa parasan.' Siya mitubag, 'Dili ko motrabaho,' apan nausab ang iyang hunahuna ug miadto siya sa parasan. Unya ang amahan miadto sa manghod ug mao gihapon ang iyang giingon kaniya. 'Oo, moadto ako,' mitubag siya, apan wala siya moadto. Kinsa man sa duha ang mituman sa buot ipabuhat amahan?" Sila mitubag, "Ang magulang." Unya si Jesus miingon, "Sultihan ko kamo nga ang mga kobrador sa buhis ug ang mga daotang babaye mag-una pa kaninyo pagsulod sa Gingharian sa Dios. Kay mianhi kaninyo si Juan nga Magbubunyag pagtudlo sa matarong nga pagkinabuhi, ug wala kamo motuo kaniya; apan ang mga kobrador sa buhis ug ang mga daotang babaye mituo kaniya. Bisan gani kamo, sa human ninyo makita kini, wala gihapon maghinulsol ni motuo kaniya."
ANG EBANGHELYO SA GINOO.
DAYGON IKAW, O KRISTO.
