PAGBASA GIKAN SA BASAHON SA NUMEROS
Nm. 24:2-7, 15-17
Ug sa pagtan-aw ni Balaam, nakita niya ang Israel nga nagkampo, ang tagsatagsa ka banay sa ilang dapit. Gigamhan siya sa espiritu sa Ginoo, ug siya miingon, "Mao kini ang gipamulong ni Balaam, anak ni Beor, Usa ka tawo nga tataw kaayog panan-aw. Mao kini ang gipamulong sa tawo nga nagpatalinghug sa mga pulong sa Dios, ug nakakitag panan-awon sa Labing Gamhanang Dios. Natumba siya apan wala taptapi ang iyang mata. Pagkaanindot sa mga tolda mo O Israel. Sama sa mga walog nga lapad kaayo, sama sa mga tanaman daplin sa suba, sama sa mga bulak nga gitanom sa Ginoo, ug sa mga kahoyng sidro daplin sa katubigan. May tubig nga modagayday gikan sa iyang mga kabo, ug mopatubig sa iyang binhi. Mas gamhanan ang iyang hari kay kang Agag, ug mouswag ang iyang gingharian." Unya mipadayon siya pagsulti, ug miingon, "Mao kini ang gipamulong ni Balaam, ang anak ni Beor. Usa ka tawo nga tataw ug panan-aw, nga nagpatalinghug sa pulong sa Dios, nasayod sa kaalam sa Labing Halangdon ug nakakitag panan-awon sa Labing Gamhanan. Natumba siya apan wala taptapi ang iyang mata. Mitan-aw ako sa umaabot, ug nakita ko ang nasod sa Israel. May mosubang nga bituon gikan sa Israel, ug motungha gikan sa Israel ang usa ka sitro. Modugmok kini sa agtang sa Moab, ug mobuntog sa tanang anak ni Set."
ANG PULONG SA GINOO.
SALAMAT SA DIOS.
SALMO RESPONSORYO
Ps. 25:4-5, 6-7, 8, 9
R. Tudloi ako sa imong mga dalan, O Ginoo.
Ipahibalo kanako, O Ginoo, ang imong mga dalan; tudloi ako sa imong mga agianan, Tultoli ako diha sa imong kamatuoran ug tudloi ako, kay ikaw Dios man nga akong manunubos. (R)
Hinumdomi nga ang imong kaluoy, O Ginoo, ug ang imong kaayo sukad pa sa kakaraanan. Sa imong kaayo hinumdomi ako, tungod sa imong kaayo, O Ginoo. (R)
Maayo ug matarong ang Ginoo; giingon niya niini pagpakita sa dalan ang makasasala. Gitultolan niya ang mapaubsanon ngadto sa katarong, gitudloan niya ang mapaubsanon sa iyang dalan. (R)
PAGBASA SA SANTOS NGA EBANGHELYO SUMALA NI SAN MATEO
Mt. 21:23-27
Si Jesus mibalik sa Templo, ug samtang nagtudlo siya, ang kadagkoan sa mga pari ug ang mga punoan sa mga Judio miduol kaniya ug nangutana, "Unsa may imong katungod sa pagbuhat nining mga butanga? Kinsa may naghatag kanimo niining katungora?" Si Jesus mitubag kanila, "Mangutana ako kaninyo og usa lang kabutang ug kon makatubag kamo, tug-anan ko kamo sa akong katungod sa paghuhat niining mga butanga. Diin man gikan ang katungod ni Juan sa pagbunyag: gikan ba sa Dios o gikan ba sa tawo?" Gitimbangtimbang nila ang ilang itubag kaniya. Nag-ingnanaay sila, "Unsa may atong itubag? Kun motubag kita, 'Gikan sa Dios,' moingon siya kanato, 'Nganong wala man lagi kamo motuo kang Juan?' Apan kun moingon kita, 'Gikan sa tawo,' mahadlok kita sa buhaton unya sa katawhan, kay hugot silang nagtuo nga si Juan usa ka propeta." Busa giingnan nila si Jesus, "Wala kami masayod." Ug miingon siya kanila, "Dili ko usab kamo tug-anan sa akong katungod sa pagbuhat niining mga butanga."
ANG EBANGHELYO SA GINOO.
DAYGON IKAW, O KRISTO.
