PAGBASA GIKAN SA BASAHON NI PROPETA ISAIAS
Is. 35:1-6, 10
Magmaya ang kamingawan ug molambo sa disyerto ang kabulakan. Mag-awit kini sa kalipay ug mahimong matahom sama sa bukid sa Lebanon. Ingon ka tabunok sa Carmel ug sa Saron. Makita sa katawhan ang himaya sa Ginoo, ang kahalangdon ug gahom sa atong Dios. Busa lig-ona ang mga kamut nga wala nay umoy ug ang mga tuhod nga luya na. Ingna ang nakabsan nag paglaum, "Pagmaisog ug ayaw kahadlok! Moanha ang imong Dios aron sa pagpanimalos sa imong mga kaaway ug iya kamong luwason." Makakita na unya ang buta ug makadungog na ang bungol; magluksolukso na ang bakol daw lagsaw, ug mag-awit ang amang sa kalipay. Kay didto sa kamingawan modagayday ang tubig, ug may mga sapa na ang disyerto. Unya mamauli sila sa Jerusalem nga mag-awit, ug malipayon sila hangtod sa hangtod; ug ang kasubo ug ang mga panghupaw mahanaw sa dayon.
ANG PULONG SA GINOO.
SALAMAT SA DIOS.
SALMO RESPONSORYO
Ps. 146:6-7, 8-9, 9-10
R. Ginoo, dali ug luwasa kami.
Ang Ginoong Dios matinumanon hangtod sa kahangturan, giampingan niya ang katarong alang sa mga gidaugdaog, naghatag siyag pagkaon sa mga gigutom. Ang Ginoo naglingkawas sa mga dinakpan. (R)
Ang Ginoo naghatag og kahayag sa mga buta; ang Ginoo ang gapabangon sa mga nahilukapa. Ang Ginoo nahigugma sa matarong; ang Ginoo nanalipod sa mga langyaw. (R)
Gitabangan niya ang mga ilo ug balo, apan iyang gisalikway ang mga dautan. Ang Ginoo magahari hangtod sa kahangturan; ang imong Dios, O Sion, hangtod sa tanang kaliwatan. (R)
PAGBASA GIKAN SA SULAT NI SANTIAGO
Jas. 5:7-10
Busa pailob, kamo, mga igsuon, hangtod sa pag-abot sa Ginoo. Tan-awa unsa ang pagpailob sa mag-uuma samtang siya nagpaabot sa pag-ani. Mapailubon siyang nagpaabot sa una ug sa ulahing ting-ulan. Busa kinahanglan nga magpa-ilob usab kamo. Lig-ona ang inyong paglaum kay duol na ang pagbalik sa Ginoo. Mga igsuon, ayaw kamo pagbagulbolay aron dili kamo silotan sa Dios. Ang Maghuhukom anaa na sa pultahan! Mga igsuon hinumdomi ninyo ang mga propeta nga nagwali sa ngalan sa Ginoo. Himoa sila nga panig-ingnan sa mapailubong pag-antos taliwala sa mga kalisdanan.
ANG PULONG SA GINOO.
SALAMAT SA DIOS.
PAGBASA SA SANTOS NGA EBANGHELYO SUMALA NI SAN MATEO
Mt. 11:2-11
Sa pagkadungog ni Juan nga Magbubunyag didto sa prisohan bahin sa gihimo ni Cristo, gipaadto niya kang Jesus ang pipila sa iyang mga tinun-an. Ug nangutana sila kang Jesus, "Sultihi kami, ikaw ba ang giingon ni Juan nga moanhi, o magpaabot pa ba kamig lain?" Si Jesus mitubag, "Pamauli kamo ug suginli si Juan sa inyong nadungog ug nakita: ang mga buta nakakita, ang mga bakol nakalakaw, ang mga sanlahon nangaayo, ang mga bungol nakadungog, ang mga minatay nangabanhaw, ug ang Maayong Balita gisangyaw ngadto sa mga kabus. Bulahan kadtong wala magduhaduha kanako!" Samtang namauli ang mga tinun-an ni Juan, si Jesus miingon sa mga tawo mahitungod kang Juan, "Sa pag-adto ninyo kang Juan didto sa dapit nga awaaw, unsay buot ninyong makita? Bugang ba nga gipilaypilay sa hangin? Unsa ba gayod ang inyong giadto aron tan-awon? Usa ba ka tawo nga luhog pamisti? Ang mga tawo nga nagbistig sama niini atua magpuyo sa mga palasyo. Sultihi ako, unsa man gayod ang inyong gipaabot nga makita? Propeta ba? Oo, Sultihan ko kamo nakita ninyo ang labaw pa sa usa ka propeta, kay si Juan mao ang giingon sa Kasulatan: 'Ania ang akong sinugo, nag-ingon ang Dios, ipadala ko siya una kanimo aron andamon niya ang dalan alang kanimo.' Hinumdomi kini: 'Wala pay tawo nga sama ni Juan nga Magbubunyag. Apan ang labing iwit sa Gingharian sa Langit labaw pa kaniya.'"
ANG EBANGHELYO SA GINOO.
DAYGON IKAW, O KRISTO.
