PAGBASA GIKAN SA BASAHON NI PROPETA ISAIAS
Is. 40:25-31
Busa kang kinsa man ninyo itandi ang Balaang Dios? Hangad kamo sa langit, kinsay nagbuhat sa kabituonan? Gihut-ong hut-ong niya sila pagbutang ug gihatagag tagsatagsa ka ngalan; tungod sa iyang pagkagamhanan, walay usa kanila nga nawala. Nganong moingon ka man, Israel, nga ang imong pagkabutang wala hisayri sa Ginoo, ug ang imong katungod wala lamang hatagig bili sa Dios? Wala ka ba diay mahibalo ni makadungog nga ang Ginoong Dios nga walay katapusan maoy nagbuhat sa tibuok kalibutan? Dili siya maluya ni kapuyan, ug dili matukib ang iyang kahibalo. Hatagan niyag gahom ang huyang, ug ang walay umoy hatagan niyag kusog. Bisan ang mga batan-on maluya ug kapuyan, ug kabsag umoy; apan kadtong mosalig sa Ginoo makabaton og bag-ong kusog: manglupad sila daw agila, managan sila ug dili kapuyan, manlakaw ug dili maluya.
ANG PULONG SA GINOO.
SALAMAT SA DIOS.
SALMO RESPONSORYO
Ps. 103:1-2, 3-4, 8, 10
R. Dayga ang Ginoo, kalag ko.
Dayga ang Ginoo, O kalag ko; tibuok kong kaugalingon, dayga ang iyang balaan nga ngalan. Dayga ang Ginoo, O kalag ko, ug ayaw hikalimti ang iyang mga kaayohan. (R)
Gipasaylo niya ang tanan mong mga kadautan, giayo niya ang tanan mong balatian. Giluwas niya ang imong kinabuhi sa kalaglagan, gilibutan ka niya sa kaayo ug kaluoy. (R)
Maluluy-on ug mahigugmaon ang Ginoo, dugay nga masuko ug puno sa kaayo. Dili sumala sa atong mga sala nagbuhat siya kanato, ni nagbalus siya sumala sa atong mga kalapasan. (R)
PAGBASA SA SANTOS NGA EBANGHELYO SUMALA NI SAN MATEO
Mt. 11:28-30
Si Jesus miingon: "Umari kamo kanako, kamong tanan nga gikapuyan ug gibug-atan sa inyong gipas-an, ug papahulayon ko kamo. Isangon ang akong yugo ug sunda ninyo ako, kay malumo ako ug mapaubsanon sa Espiritu, ug makapahulay kamo. Sayon ang yugo nga akong ihatag kaninyo, ug gaan ang ipapas-an ko kaninyo."
ANG EBANGHELYO SA GINOO.
DAYGON IKAW, O KRISTO.
