PAGBASA GIKAN SA BASAHON NI PROPETA ISAIAS
Is. 40:1-11
Ayaw kamo kabalaka, katawhan ko, nag-ingon ang Dios. Dasiga ang Jerusalem ug ingna siya nga wala nay gubat, nga gipasaylo na ang iyang mga sala ug nga siya nakadawat nag dobling silot alang sa tanan niyang kalapasan. May usa ka tingog nga nagsinggit, "Pag-andam og dalan alang sa Ginoo didto sa kamingawan; himoa ninyo ang usa ka tul-id ug lapad nga dalan didto sa disyerto alang sa atong Dios! Abunohi ang tanang walog; pataga ang tanang bukid. Ang kabungtoran mahimong patag, ug ang dapit nga gansalgansalon mahimong hapsay. Unya ipadayag ang himaya sa Ginoo ug makakita niini ang tanang taw0, kay ang Ginoo maoy nagsulti niini." May usa ka tingog nag-ingon, "Isangyaw!" Ug miingon ako, "Unsa may akong isangyaw?" "Isangyaw nga ang tawo sama lamang sa sagbot ug sama lamang sa bulak ang iyang katahom. Malaya ang sagbot ug malarag ang bulak kon huypon na kini sa Ginoo; wala gayoy kalainan sa sagbot ang tawo. Malaya ang sagbot ug malarag usab ang bulak, apan molungtad hangtod sa hangtod ang pulong sa atong Dios." Tungas sa habog nga bukid, O Sion, ug imantala ang maayong balita: O Jerusalem, tigmantala sa mga maayong balita; hala singgit ug ayaw kahadlok. Ingna ang mga siyudad sa Juda, "Ania na ang imong Dios!" Ania na ang Ginoong Dios ug maghari na gayod siya; ania siya dala ang katawhan nga iyang giluwas. Sama sa usa ka magbalantay sa karnero, pasibsibon niya ang iyang kahayopan; ang mga nati iyang kugoson, ug agakon ang ilang inahan.
ANG PULONG SA GINOO.
SALAMAT SA DIOS.
SALMO RESPONSORYO
Ps. 96:1-2, 10, 11-12, 13
R. Ang Ginoong atong Dios moabot nga gamhanan.
Awiti ang Ginoo og bag-ong awit; awiti ang Ginoo, kamong tanang mga yuta. Awiti ang Ginoo; dayga ang iyang ngalan; isangyaw ang iyang kaluwasan, sa tanang adlaw. (R)
Isugilon ang iyang himaya diha sa kanasuran; diha sa katawhan, ang iyang katingalahang mga buhat. Isulti diha sa kanasuran: Hari ang Ginoo; nagamando siya sa katawhan diha sa kaangayan. (R)
Maglipay ang kalangitan ug magsadya ang kayutaan; ang dagat ug ang nakapuno niini palanoga; maglipay ang kapatagan ug ang tanan nga anaa kanila. Unya ang tanang mga kahoy sa kalasangan magsadya. (R)
Manglukso sila sa kalipay atubangan sa Ginoo, kay moabot na siya; kay moabot siya aron pagmando sa yuta. Magmando siya sa kalibutan diha sa katarong ug sa katawhan diha sa iyang kamakanunayon. (R)
PAGBASA SA SANTOS NGA EBANGHELYO SUMALA NI SAN MATEO
Mt. 18:12-14
Si Jesus miingon sa iyang mga tinun-an, "Sa inyong hunahuna, unsa may buhaton sa usa ka tawo kon kawad-an siyag usa sa iyang usa ka gatos ka karnero? Iya gayong biyaan ang kasiyaman ug siyam nga manibsib didto sa bungtod ug molakaw siya aron pagpangita sa nawala. Sultihan ko kamo nga inig kakaplag niya niini, mas malipay pa siya pag-ayo tungod niining karneroha kay sa kasiyamag-siyam nga wala mawala. Sa mao nga pagkaagi, ang inyong Amahan nga atua sa langit dili buot nga may mawala bisag usa niining mga gagmayng bata."
ANG EBANGHELYO SA GINOO.
DAYGON IKAW, O KRISTO.
