PAGBASA GIKAN SA BASAHON SA GENESIS
Gn. 3:9-15, 20
Apan ang lalaki gitawag sa Ginoong Dios, "Hain ka ba?" Ang lalaki mitubag, "Nadungog ko ang imong paglakaw sa tanaman ug giabot akog kahadlok ug mitago ako kay hubo man ako." "Kinsay nagsulti kanimo nga hubo ka?" nangutana ang Dios. "Mikaon ka ba sa bunga sa kahoy nga gidili ko kanimo?" Ang lalaki mitubag, "Ang babaye nga gihatag mo kanako maoy naghatag kanako sa bunga sa maong kahoy ug mikaon ako niini." Ang Ginoong Dios nangutana sa babaye, "Nganong gibuhat mo man kini?" Ang babaye mitubag, "Gilansisan ako sa bitin, busa mikaon ako niini." Ug ang Ginoong Dios miingon sa bitin, "Tungod niini silotan ka; ikaw lamang sa tanang mananap ang mahiagom niining tungloha: sukad karon magkamang ka na pinaagi sa imong tiyan, ug magkaon ka nag abog, sa tanang adlaw sa imong kinabuhi. Himoon kong magdinumtanay ikaw ug ang babaye; mahimong kaaway ang tawo ug ang bitin, ug mahimong kaaway ang imong kaliwat ug ang iyang kaliwat. Dugmokon niya ang imong ulo ug paakon mo usab ang iyang tikod." Ginganlan sa lalaki ang iyang asawa og Eva kay siya man ang inahan sa tanang tawo.
ANG PULONG SA GINOO.
SALAMAT SA DIOS.
SALMO RESPONSORYO
Ps. 98:1, 2-3, 3-4
R. Awiti ang Ginoo og bag-ong awit, kay naghimo siya og katingalahang mga buhat.
Awiti ang Ginoo og bag-ong awit kay naghimo siya og katingalahang mga buhat; Ang iyang tuong kamut nakakab-ot og kadaugan alang kaniya, ang iyang balaan nga bukton. (R)
Ang Ginoo nagpahibalo sa iyang kaluwasan; sa atubangan sa kanasuran iyang gipahayag ang iyang katarong. Nahinumdom siya sa iyang kaluoy ug sa iyang kamatinud-anon, alang sa balay sa Israel. (R)
Ang tanang kautlanan sa yuta nakakita sa kaluwasan nga gihimo sa atong Dios. Awiti nga malipayon ang Ginoo, kamong tanang kayutaan, singgit kamo sa pag-awit; pag-awit kamog pagdayeg. (R)
PAGBASA GIKAN SA SULAT NI SAN PABLO NGADTO SA TAGA-EFESO
Eph. 1:3-6, 11-12
Magpasalamat kita sa Dios ug Amahan sa atong Ginoong Jesucristo nga nagpanalangin kanato sa tanang espirituhanong gasa sa langit diha sa atong pagkahiusa kang Cristo. Sa wala pa buhata ang kalibutan gipili na kita sa Dios aron maiya diha ni Cristo, aron mabalaan kita ug mawalay sala sa iyang atubangan. Tungod sa iyang gugma, daan nang gibut-an sa Dios nga sagupon niya kita nga mga anak pinaagi ni Jesucristo鈥攎ao kini ang iyang gikahimut-an ug tuyo. Daygon nato ang Dios tungod sa iyang labihang pagtagad kanato pinaagi sa iyang hinigugmang Anak! Gibuhat ang tanang butang sumala sa laraw ug pagbuot sa Dios, ug diha kang Cristo gipili kita sa Dios aron maiya kitang katawhan sumala sa iyang tuyo sukad pa sa sinugdan. Ug maoy iyang pagbuot nga kita, nga maoy unang nagsalig kang Cristo, magdayeg sa himaya sa Dios.
ANG PULONG SA GINOO.
SALAMAT SA DIOS.
PAGBASA SA SANTOS NGA EBANGHELYO SUMALA NI SAN LUCAS
Lk. 1:26-38
Sa ikaunom ka bulan sa pagmabdos ni Isabel, gipadala sa Dios ang anghel nga si Gabriel ngadto sa usa ka lungsod sa Galilea nga ginganlag Nazaret. May mensahe siya alang sa usa ka batan-ong dalaga nga sinayuran sa usa ka lalaki nga ginganlag Jose, nga kaliwat ni Hari David. Maria ang ngalan sa babaye. Miadto ang anghel kaniya ug miingon, "Paglipay! Ang Ginoo nag-uban ug nagpanalangin kanimo pag-ayo!" Nalibog pag-ayo si Maria sa pagkabati niya sa mensahe sa anghel, ug nagpalandong siya kon unsay kahulugan sa iyang mga pulong. Miingon ang anghel kaniya, "Ayaw kahadlok, Maria, kay gikahimut-an ka sa Dios. Magmabdos ka ug manganak og lalaki, ug nganlan mo siyag Jesus. Mahimo siyang inila ug tawgon siya nga Anak sa Dios nga Labing Halangdon. Ang Ginoong Dios maghimo kaniyang hari, sama sa iyang katigulangan nga si David, ug mahimo siyang hari sa mga kaliwat ni Jacob hangtod sa kahangturan; ug dili gayod matapos ang iyang gingharian!" Si Maria miingon sa anghel, "Ulay ako, busa unsaon man pagkahimo niini?" Ang anghel mitubag, "Mokunsad kanimo ang Espiritu Santo, ug magpabilin ang gahom sa Dios diha kanimo. Tungod niini, ang balaan nga bata tawgon nga Anak sa Dios. Hinumdomi ang imong paryenti nga si Isabel. Giingon nga dili na siya moanak; apan karon ikaunom na ka bulan ang iyang pagsabak, bisag tigulang na siya kaayo; kay walay dili mahimo sa Dios." Miingon si Maria, "Sulugoon ako sa Ginoo; mahitabo unta kanako ang imong gisulti." Ug mibiya ang anghel kaniya.
ANG EBANGHELYO SA GINOO.
DAYGON IKAW, O KRISTO.
