🟣 Ikaduhang Domingo sa Adbiyento

PAGBASA GIKAN SA BASAHON NI PROPETA ISAIAS

Is. 11:1-10

Ang harianong kaliwat ni David, sama sa kahoy nga giputol; apan maingon nga bag-ong mga sanga motubo gikan sa tuod, motungha usab ang usa ka bag-ong hari gikan sa mga kaliwat ni David. Ang espiritu sa Ginoo mohatag kaniyag kaalam ug sa kahibalo ug sa katakus sa pagmando sa iyang katawhan. Mahibaw-an niya ang kabubut-on sa Ginoo ug magbaton siyag pagtahod kaniya, ug malipay sa pagsugot kaniya. Dili siya maghukom sumala sa makita niya ni pinasikad sa iyang madungog; hinonoa hukman niya sa katarong ang mga kabus, ug hatagan niya sa hustisya ang mga dinaugdaog. Pinaagi sa iyang sugo, silotan ang katawhan ug mamatay ang mga tawong dautan. Mandoan niya ang iyang katawhan sa hustisya ug katarong. Magtipon na pagpuyo ang lobo ug ang nating karnero, ug magdulog ang nating kanding ug ang liyopardo. Magsalo pagkaon ang liyon ug ang nating baka, ug gamayng bata ang maggiya kanila. Maghigala ang baka ug ang oso, ug magdulog ang ilang mga anak; ang liyon magkaon nalag dagami sama sa baka. Ang batang masuso magdula diha sa buho sa halas nga malala, ug ang batang linutas mokuot sa lungib sa hagwason. Dili na sila magpinatyanay didto sa balaang bukid sa Dios, kay ang kahibalo sa Ginoo maglukop man sa tibuok kalibutan sama sa tubig sa kadagatan. Niadtong panahona ang harianong kaliwat ni David mahimong ilhanan alang sa tanang katawhan; modangop ang kanasuran kaniya ug mapuno sa himaya ang iyang puloy-anan.

SALMO RESPONSORYO

Ps. 72:1-2, 7-8, 12-13, 17

R. Ang katarong molambo sa iyang panahon, ug ang hingpit nga kalinaw hangtod sa kahangturan.

O Dios, togahi sa imong panghukom ang Hari, ug sa imong katarong ang Anak sa Hari; Mandoan niya sa katarungan ang imong katawhan ug sa panghukom ang imong mga nag-antos nga ginsakupan. (R)

Ang katarong molambo sa iyang panahon, ug ang halawom nga kalinaw, hangtod nga mawala nay buwan. Maghari unta siya gikan sa dagat ngadto sa kadagatan, ug gikan sa Suba ngadto sa kinatumyan sa kayutaan. (R)

Luwason niya ang kabus sa iyang pagsangpit, ug ang gisakit diha nga wala gayoy motabang kaniya. Kaloy-an niya ang ubos ug ang kabus; luwason niya ang kinabuhi sa mga kabus. (R)

Daygon sa gihapon ang iyang ngalan; magpabilin ang iyang ngalan ingon sa adlaw. Diha kaniya mapanalanginan ang tanang kaliwat sa yuta; ang tanang mga nasod nagsangyaw sa iyang kabulahan. (R)

PAGBASA GIKAN SA SULAT NI SAN PABLO NGADTO SA TAGA-ROMA

Rom. 15:4-9

Kay ang tanang nahisulat sa Kasulatan gisulat aron pagtudlo kanato ug sa ingon makabaton kitag paglaum pinaagi sa pailob ug sa kadasig nga gihatag kanato sa Kasulatan. Ug hinaut unta nga ang Dios nga tinubdan sa pailob ug kadasig maghiusa sa inyong mga hunahuna pinaagi sa pagsunod sa panig-ingnan ni Cristo Jesus, aron maghiusa kamong tanan sa pagdayeg sa Dios ug Amahan sa atong Ginoong Jesucristo. Busa alang sa himaya sa Dios, dawata ang inyong isigka-magtutuo ingon nga gidawat kamo ni Cristo. Kay si Cristo nahimong sulugoon sa mga Judio aron pagpakita nga kasaligan ang Dios sa pagtuman sa iyang mga saad ngadto sa mga patriyarka ug aron daygon sa mga dili Judio ang Dios tungod sa iyang kaluoy. Sumala sa giingon sa Kasulatan, "Busa pasalamatan ko ikaw taliwala sa mga dili Judio. Awiton ko ang mga pagdayeg alang sa imong ngalan."

PAGBASA SA SANTOS NGA EBANGHELYO SUMALA NI SAN MATEO

Mt. 3:1-12

Niadtong panahona mitungha si Juan nga Magbubunyag ug nagwali didto sa kamingawan sa Judea. Siya miingon, "Hinulsoli ug biyai ninyo ang inyong mga sala kay hapit na maghari ang Dios." Si Juan mao ang gihisgotan ni propeta Isaias sa iyang pag-ingon, "May nagsinggit didto sa kamingawan: 'Andama ninyo ang dalan alang sa Ginoo, Hawani ninyo ang iyang agian!'" Ang saput ni Juan hinimo gikan sa balhibo sa kamelyo; nagbakus siyag panit, ug ang iyang kalan-on dulon ug dugos. Nangadto kaniya ang mga ta gikan sa Jerusalem ug sa tibuok lalawigan sa Judea, ug gikan sa kayutaan nga kasikbit sa Suba sa Jordan. Gisugid nila ang ilang mga sala ug sila gibunyagan niya didto sa Suba sa Jordan. Sa pagkakita ni Juan nga may daghang Pariseo ug Saduseo nga nanuol kaniya aron magpabunyag, miingon siya kanila, "Kamong mga bitin—kinsay nagsulti kaninyo nga makalikay kamo sa hapit na moabot nga kasuko sa Dios? Ipakita ninyo nga naghinulsol na kamo sa inyong mga sala pinaagi sa inyong mga buhat. Ayaw kamo panghambug sa inyong pagkaanak ni Abraham; sultihan ko kamo nga ang Dios makahimo pagkuha niining mga bato aron himoong mga kaliwat ni Abraham! Ang wasay andam na aron iputol sa mga kahoy diha sa mga gamot; ang tanang kahoy nga dili mamungag maayong bunga putlon ug isugnod sa kalayo. Ako nagbunyag kaninyo pinaagi sa tubig aron pagpakita nga naghinulsol kamo sa inyong mga sala; apan ang moanhi sunod kanako magbunyag kaninyo pinaagi sa Espiritu Santo ug sa kalayo. Siya mas gamhanan pa kay kanako, ug dili ako angay bisan gani sa pagbitbit sa iyang sandalyas. Nagkupot siyag nigo nga igpapalid aron lainon ang tahop gikan sa mga lugas: tigumon niya ang trigo didto sa kamalig, apan ang tahop iyang sunugon sa kalayo nga dili mapalong."