PAGBASA GIKAN SA BASAHON NI PROPETA ISAIAS
Is. 30:19-21, 23-26
Nag-ingon ang Ginoo, ang Balaang Dios sa Israel: Matuod gayod kini, O, mga tawo nga nagpuyo sa Jerusalem; dili na gayod kamo maghilak. Ayaw duhaduhai nga kaloy-an kamo sa Ginoo inigsangpit ninyo kaniya; inigkabati niya kaninyo, tubagon kamo niya. Bisag ang Ginoo naghatag kaninyo sa pan sa kaguol ug sa tubig sa kasakit, apan dili na magtago pag-usab ang inyong mag-tutudlo, kondili inyo hinoon siyang hikit-an, kon motipas ka sa tuo o sa wala, hibatian mo ang iyang tingog diha sa imong luyo nga moingon, "Dia ra ang dalan; subaya kini." Ug paulanan niya ang binhi nga inyong ipugas, ug hatagan kamo niyag daghang abot ug daghang kasibsiban sa inyong kahayopan. Ug ang mga baka ug mga asno nga gigamit ninyo pagdaro mangaon sa labing maayong kumpay. Ug sa kabukiran ug kabungtoran modagayday ang mga sapa inig-abot sa adlaw sa pagpamatay, inigkapukan sa mga tore sa inyong kaaway. Ang bulan mahisama kahayag sa adlaw, ug makapito unya piloa ang kahayag sa adlaw, kon tambalan na sa Ginoo ang samad sa iyang katawhan, nga nahimo sa iyang kastigo.
ANG PULONG SA GINOO.
SALAMAT SA DIOS.
SALMO RESPONSORYO
Ps. 147:1-2, 3-4, 5-6
R. Bulahan ang tanan nga nangandoy sa pag-abot sa Ginoo.
Dayga ang Ginoo kay siya maayo, awitig pagdayeg ang atong Dios, kay siya mahigugmaon; angay gayod ang pagdayeg kaniya. Ang Ginoo nagabag-o pagtukod sa Jerusalem; iyang gipundok ang nagakatibulaag sa Israel. (R)
Iyang giayo ang masulob-on iyang gibulong ang ilang mga samad. Siya ang nagaihap sa kabitoonan. Iyang gitawag ang tagsatagsa sa ilang ngalan. (R)
Dako gayod ang atong Ginoo ug makusganon diha sa gahom; sa iyang kinaadman walay kinutuban. Ang Ginoo nagapabangon sa mapaubsanon; ang mga dautan iyang gisalikway aron mapukan. (R)
PAGBASA SA SANTOS NGA EBANGHELYO SUMALA NI SAN MATEO
Mt. 9:35; 10:1, 6-8
Unya giduaw ni Jesus ang tanang kalungsoran ug kabaryohan. Nanudlo siya didto sa ilang mga sinagoga, ug giwali niya ang Maayong Balita bahin sa paghari sa Dios ug giayo niya ang mga tawo sa tanan nilang balatian ug sakit. Gitigom ni Jesus ang iyang napulog-duha ka tinun-an ug gihatagan silag gahom sa paghingilin sa mga daotang espiritu ug sa pag-ayo sa tanang sakit ug balatian. "Adtoa hinoon ninyo ang nangawala nga mga karnero sa nasod sa Israel. Lakaw kamo ug isangyaw nga hapit na maghari ang Dios. Ayoha ninyo ang mga masakiton, banhawa ang mga minatay, hinloi ang mga sanlahon, ug abuga ang mga yawa. Nakadawat kamo nga walay bayad, busa panghatag kamo sa walay pagpangayog bayad."
ANG EBANGHELYO SA GINOO.
DAYGON IKAW, O KRISTO.
