PAGBASA GIKAN SA BASAHON NI PROPETA ISAIAS
Is. 26:1-6
Moabot ang adlaw diin ang katawhan moawit niining awita didto sa nasod sa Juda: Lig-on ang atong siyudad! Ang Dios mismo maoy manalipod sa mga kuta niini. Ablihi ninyo ang mga ganghaan aron makasulod ang matarong nga nasod, nasod nga matinud-anon sa Ginoo. Hatagan mog hingpit nga kalinaw kadtong naglaum nimo kay misalig man sila kanimo. Saligi kanunay ang Ginoo, kay ang Ginoong Dios mao ang batong dalangpanan nga magpabilin hangtod sa hangtod. Gipakaulawan niya ang mga mapahitas-on ug iyang gilumpag ug gipulpog ang ilang siyudad. Giyatakyatakan kini sa mga kabus ug sa mga dinaugdaog.
ANG PULONG SA GINOO.
SALAMAT SA DIOS.
SALMO RESPONSORYO
Ps. 118:1, 8-9, 19-21, 25-27
R. Bulahan ang nagaanhi sa ngalan sa Ginoo.
Pasalamati ninyo ang Ginoo, kay siya maayo, kay ang iyang kaluoy nagalungtad hangtod sa kahangturan. Labing maayo ang pagdangop sa Ginoo kay sa pagsalig sa tawo, Labing maayo ang pagdangop sa Ginoo kay sa pagsalig sa mga prinsipe. (R)
Ablihi kanako ang mga ganghaan sa katarong; mosulod ako kanila ug magpasalamat sa Ginoo. Sa Ginoo kining ganghaana; ang matarong maoy mosulod niini, Magpasalamat ako kanimo kay imo akong gipatalinghugan ug imo akong giluwas. (R)
O Ginoo, ihatag ang kaluwasan! O Ginoo, ihatag ang kauswagan! Bulahan ang nagaanhi sa ngalan sa Ginoo; Daygon ikaw kanamo gikan sa balay sa Ginoo. Ang Ginoo Dios, ug gihatagan kita ug kahayag. (R)
PAGBASA SA SANTOS NGA EBANGHELYO SUMALA NI SAN MATEO
Mt. 7:21, 24-27
Si Jesus miingon sa iyang mga tinun-an, "Dili ang tanan nga magtawag kanako 'Ginoo, Ginoo,' makasulod sa Gingharian sa Langit, kon dili kadto lamang nagtuman sa kabubut-on sa akong Amahan nga atua sa Langit." "Busa ang tanan nga nakadungog sa akong gisulti ug nagtuman niini mahisama sa usa ka tawo nga maalamon nga nagtukod sa iyang balay diha sa bato. Sa dihang mibundak ang ulan, ug mibaha ang mga suba, ug ang hangin mihapak ug mikusokuso niadtong balaya, wala kini matumba kay natukod man diha sa bato." "Apan ang tanan nga nakadungog sa akong gisulti ug dili magtuman niini, mahisama sa usa ka tawong buangbuang nga nagtukod sa iyang balay diha sa balas. Sa dihang mibundak ang ulan, ug mibaha ang suba, ug ang hangin mihapak ug mikusokuso niadtong balaya, natumba kini ug nagun-ob!"
ANG EBANGHELYO SA GINOO.
DAYGON IKAW, O KRISTO.
