PAGBASA GIKAN SA BASAHON NI PROPETA ISAIAS
Is. 11:1-10
Ang harianong kaliwat ni David sama sa kahoy nga giputol; apan maingon nga bag-ong mga sanga motubo gikan sa tuod, motungha usab ang usa ka bag-ong hari gikan sa mga kaliwat ni David. Ang Espiritu sa Ginoo mohatag kaniyag kaalam ug sa kahibalo ug katakus sa pagmando sa iyang katawhan. Mahibaw-an niya ang kabubut-on sa Ginoo ug magbaton siyag pagtahod kaniya, ug malipay sa pagsugot kaniya. Dili siya maghukom sumala sa makita niya ni pinasikad sa iyang madungog; hinonoa hukman niya sa katarong ang mga kabus, ug hatagan niya sa hustisya ang mga dinaugdaog. Pinaagi sa iyang sugo, silotan ang katawhan ug mamatay ang mga tawong dautan. Mandoan niya ang iyang katawhan sa hustisya ug katarong. Magtipon na pagpuyo ang lobo ug ang nating karnero, ug magdulog ang nating kanding ug ang liyopardo. Magsalo pagkaon ang liyon ang nating baka, ug gamayng bata ang maggiya kanila. Maghigala ang baka ug ang oso, ug magdulog ang ilang mga anak; ang liyon magkaon na lag dagami sama sa baka. Ang batang masuso magdula diha sa buho sa halas nga malala, ug ang batang linutas mokuot sa lungib sa hagwason. Dili na sila magpinatyanay didto sa balaang bukid sa Dios, kay ang kahibalo sa Ginoo maglukop man sa tibuok kalibutan sama sa tubig sa kadagatan. Niadtong panahona ang harianong kaliwat ni David mahimong ilhanan alang sa tanang katawhan; modangop ang kanasuran kaniya ug mapuno sa himaya ang iyang puloy-anan.
ANG PULONG SA GINOO.
SALAMAT SA DIOS.
SALMO RESPONSORYO
Ps. 72:1, 7-8, 12-13, 17
R. Ang katarong molambo sa iyang panahon, ug ang kapuno sa kalinaw hangtod sa hangtod.
O Dios, togahi ang hari sa imong panghukom, ug sa imong katarong, ang anak sa hari; Magmando siya nga matarong sa imong lungsod ug hukman niya ang mga nag-antus. (R)
Ang katarong molambo sa iyang nga adlaw, ug ang halawom nga kalinaw hangtod mawala nay buwan. Magmando unta siya gikan sa dagat ngadto sa kinatumyan sa yuta. (R)
Luwason niya ang kabus kon magsangpit siya, ug ang gisakit diha nga walay motabang kaniya. Maluoy siya sa ubos ug kabus; ang kinabuhi sa mga kabus iyang luwason. (R)
Daygon sa gihapon ang iyang ngalan; magpabilin ang iyang ngalan ingon sa adlaw. Diha kaniya mapanalanginan ang tanang kaliwat sa yuta; ang tanang mga nasod nagsangyaw sa iyang kabulahan. (R)
PAGBASA SA SANTOS NGA EBANGHELYO SUMALA NI SAN LUCAS
Lk. 10:21-24
Niadtong higayona gilipay si Jesus sa Espiritu Santo ug miingon siya, "Amahan, Ginoo sa langit ug sa yuta, nagpasalamat ako kanimo tungod kay gipadayag mo man ngadto sa mga walay kahibalo ang imong gililong sa mga makinaadmanon ug sa mga may kahibalo. Oo, Amahan, natuman kini kay mao may imong gusto ug pagbuot." "Ang akong Amahan mitugyan kanako sa tanang butang: walay nakaila sa Anak gawas sa Amahan, ug walay nakaila sa Amahan gawas sa Anak ug kanila nga buot pailhon sa Anak kinsa ang Amahan." Unya miatubang si Jesus sa mga tinun-an ug miingon kanila lamang, "Bulahan kamo nga nakakita sa mga butang nga inyong nakita! Kay sultihan ko kamo nga daghang mnga propeta ug mga hari nga buot motan-aw sa inyong nakita apan wala makakita, ug buot mamati sa inyong nadungog apan wala makabati."
ANG EBANGHELYO SA GINOO.
DAYGON IKAW, O KRISTO.
