PAGBASA GIKAN SA BASAHON NI PROPETA ISAIAS
Is. 4:2-6
Niadtong adlawa ang sanga nga gipatubo sa Ginoo mahimong matahom ug mahimayaon, ug ang abot sa yuta maoy mahimong garbo ug dungog sa mga nasalin nga katawhan sa Israel. Ug ang mahibilin sa Jerusalem tawgon nga balaan sa dihang mahugasan na sa Ginoo ang kahugaw sa Jerusalem ug mahinlo na ang mansa sa dugo nga naula didto pinaagi sa pagsilot niini. Unya ang Ginoo magpadalag panganod panahon sa adlaw ibabaw sa Bukid sa Sion ug ibabaw sa tigomanan sa iyang katawhan; sa gabii maghimo siyag aso ug nagdilaab nga kalayo; kay ibabaw sa tanan, ang iyang himaya mahimong panalipod sa siyudad. Mahimo kining pandong panahon sa adlaw, ug tagoanan ug salipadanan kon magbagyo ug mag-ulan.
ANG PULONG SA GINOO.
SALAMAT SA DIOS.
SALMO RESPONSORYO
Ps. 122:1-2, 3-4, (4, 5, 6-7) 8-9
R. Nalipay ako nga giingnan ako nila; mangadto na kita sa balay sa Ginoo.
Nalipay ako kay giingnan ako nila: "Mangadto na kita sa balay sa Ginoo." Ug karon nagabarog na kami sa tugkaran sa imong mga ganghaan, O Jerusalem. (R)
Jerusalem, nga gitukod ingog usa ka Siyudad nga gipundok sa kahiusa. Ngadto kaniya nanungas ang mga tribo, ang mga tribo sa Ginoo. (R)
Sumala sa kasugoan alang sa Israel, aron pagpasalamat sa ngalan sa Ginoo. Diha kaniya gipabarog ang mga lingkuranan sa hukmanan, ang mga lingkuranan alang sa balay ni David. (R)
Pag-ampo kamo alang sa kalinaw sa Jerusalem! Molampus unta sila nga nahigugma kanimo! Maghari unta ang kalinaw sulod sa imong mga paril, ang kauswagan diha sa imong kabalayan. (R)
Tungod sa akong mga kadugo ug mga higala, moingon ako "Ang kalinaw maanaa kaninyo." Tungod sa balay sa Ginoo, atong Dios, mag-ampo ako alang sa imong kaayohan. (R)
PAGBASA SA SANTOS NGA EBANGHELYO SUMALA NI SAN MATEO
Mt. 8:5-11
Sa pagsulod ni Jesus sa Capernaum, usa ka opisyal nga Romanhon mitagbo kaniya ug nagpakitabang. Siya miingon, "Sir, nasakit ang akong sulugoon ug atua sa akong balay naghigda; dili siya makalihok ug nag-antos pag-ayo." Si Jesus miingon, "Moadto ako ug ayohon ko siya." Ang opisyal mitubag, "Ayaw lang pag-adto, Sir, kay dili ako angay nga mopadayon kanimo sa akong balay. Isulti lamang ug mamaayo ang akong sulugoon. Ako mismo ubos sa pagbuot sa labawng mga opisyal, ug aduna akoy mga sundalo nga ubos sa akong pagmando; kon sugoon ko kining tawhana sa paglakaw, molakaw siya; ug kon moari siya; ug kon sugoon ko ang akong ulipon sa pagbuhat og bisan unsa, mobuhat siya." Natingala si Jesus sa iyang pagkabati niini, ug miingon siya sa mga tawo nga mikuyog kaniya, "Sultihan ko kamo nga wala ako makakitag pagtuo dinhi sa Israel nga sama kadako niini. Hinumdomi kini: daghan ang mangabot gikan sa sidlakan ug sa kasadpan ug makigsalo kang Abraham, kang Isaac, ug kang Jacob didto sa Gingharian sa Langit."
ANG EBANGHELYO SA GINOO.
DAYGON IKAW, O KRISTO.
