KINUTLO GIKAN SA BASAHON NI PROPETA DANIEL
Dn. 7:2-14
Miingon si Daniel: Nakita ko sa akong damgo kagabii nga gikusokuso ang dagat sa upat ka hangin. Nakita ko usab nga may mitunga sa dagat nga upat ka nagkalainlaing mananap. Ang una morag liyon ug may pako sa agila. Unya nakita ko nga nakuha ug ilangkat ang iyang mga pako, ug naalsa kini ug gipatindog daw tawo; ug gihatagan kinig pangisip nga sama sa tawo. Ang ikaduhang mananap samag hitsurag oso. Mihana kini pagtindog nga nagtakilid; nagtangag kinig tulo ka gusok; ug giingnan kini, "Tindog, ug kaog daghang karne!" Unya nakita ko ang daw usa ka liyopardo, may upat kini ka pako ug upat ka ulo. May panagway ug awtoridad libot niini. Tapos niini nakita ko ang ikaupat ka mananap: bangis ug makalilisang ug kusgan kaayo, puthaw ang iyang ngipon; may giusap siya ug napinopino ang lyang giusap, ug gitamaktamakan niya ang nahibilin. Lahi kini kaayo sa tanang mananap nga una kong nakita, kay may napulo man kini ka sungay. Gisud-ong ko ang mga sungay, ug unya diha sa ilang taliwala miturok ang usa ka gamayng sungay ug nangaibot ang unang tulo ka sungay; ug niining sungaya may mga mata nga sama sa mga mata sa tawo; ug may ba-ba nga nangandak. Ug sa pagyahat ko, May gibutang nga trono ug milingkod niini ang walay katapusan: ingon sa niebe ang kaputi sa iyang bisti, ug sama ang iyang buhok kaputi sa delana nga puti kaayo, ang iyang trono kalayo nga nagdilaab; may ligid kini nga kalayo. May suba nga kalayo nga nagbaha gikan sa iyang atubangan; libo ka ibo nag-alagad kaniya, ug nagbarog sa atubangan niya, andam ang hukmanan sa paghukom, ug giablihan ang mga basahon. Unya miyahat ako sa pagkadungog ko sa mga pangandak nga gisulti sa sungay. Ug sa paglantaw ko, gipatay ang mananap, ug gitambog sa kalayo ang iyang lawas. Nakuhaan sa gahom ang ubang mananap, ug nangahanaw, apan gilugwayan ang ilang kinabuhi sa mubong panahon. May mga butang pa gayod nga nakita ko sa akong panan-awon. Ug nakita ko uban sa mga panganod sa langit ang daw usa ka tawo, ug miduol siya sa Walay Katapusan, ug gipaila siya kaniya. Ug kaniya gihatag ang gahom ug ang himaya ug ang gingharian, aron alagaran siya sa tanang katawhan, walay pagkatapos ang iyang gahom, kay dili man malaglag ang iyang gingharian.
ANG PULONG SA GINOO.
SALAMAT SA DIOS.
SALMO RESPONSORYO
Dn. 3:75, 76, 77, 78, 80, 81
R. Hatagi siyag himaya ug pagdayeg nga walay katapusan.
Kabukiran ug kabungtoran, dayga ninyo ang Ginoo; dayga ug bayawa siya labaw sa tanan hangtod sa kahangturan. (R)
Tanan nga nagaturok ibabaw sa yuta, dayga ninyo ang Ginoo; dayga ug bayawa siya labaw sa tanan hangtod sa kahangturan. (R)
Kamong mga tuboran, dayga ang Ginoo; dayga ug bayawa siya labaw sa tanan hangtod sa kahangturan. (R)
Mga dagat ug kasapaan, dayga ang Ginoo; dayga ug bayawa siya labaw sa tanan hangtod sa kahangturan. (R)
Kamong mga balyena ug tanang mga mananap sa katubigan, dayga ninyo ang Ginoo; dayga ug bayawa siya labaw sa tanan hangtod sa kahangturan. (R)
Kamong tanang mga mananap, pintas ug tanod. dayga ninyo ang Ginoo; dayga ug bayawa siya labaw tanan hangtod sa kahangturan. (R)
PAGBASA SA SANTOS NGA EBANGHELYO SUMALA NI SAN LUKAS
Lk. 21:29-33
Unya gisuginlan sila ni Jesus niining sambingaya: "Hinumdomi ninyo ang kahoyng igera ug ang tanang mga kahoy. Kon makita ninyo nga manahon na sila, mahibalo kamo nga duol na ang ting-init. Sa ingon usab, inigkakita ninyo nga mahitabo kining mga butanga, mahibaloan ninyo nga hapit na maghari ang Dios." "Timan-i kini: mahitabo kining tanan sa dili pa mangamatay ang mga tawo nga karon buhi pa. Ang langit ug ang yuta mangahanaw, apan dili gayod mapakyas ang akong gisulti."
ANG EBANGHELYO SA GINOO.
DAYGON IKAW, O KRISTO.
