KINUTLO GIKAN SA BASAHON NI PROPETA DANIEL
Dn. 6:11-27
Ang iyang mga kaaway nga daan nang nagsabot, miadto sa balay ni Daniel ug ilang nakaplagan siya nga nag-ampo ug nangaliyupo sa iyang Dios. Unya ilang giadto ang hari ug giingan, "Kamahalan! Dili ba nagsugo ka man nga kinsa kadtong modangop sa laing dios o tawo, inay kanimo lamang sulod sa katloan ka adlaw, kinahanglang itambog ngadto sa puy-anan sa mga liyon?" Mitubag ang hari, "Magpabilin ang maong sugo sumala sa balaod sa Media ug sa Persia, ug dili mahimong usbon." Ug ilang giingan ang hari, "Si Daniel nga usa sa mga binihag gikan sa Juda wala magtahod kanimo, Kamahalan, kondili nag-ampo hinoon sa iyang dios makatulo sa usa ka adlaw." Sa pagkadungog sa hari niini, nasubo siya pag-ayo ug buot niyang luwason si Daniel, ug naningkamot siya sa paghimo niini hangtod sa pagsalop sa adlaw. Apan ang mga kaaway ni Daniel nag-usab pag-adto sa hari, "Kamahalan, nasayod ka baya nga ang balaod sa Media ug sa Persia dili mahimong usbon human kini ikapakanaog sa hari." Busa gipakuha sa hari si Daniel ug gitambog sa puy-anan sa mga liyon. Giingnan niya si Daniel, "Hinaot unta nga luwason ka sa imong Dios nga imong gialagaran sa kanunay! Unya gitabonag bato ang ganghaan sa puy-anan sa mga liyon ug gitimrihan sa singsing sa hari ug sa singisng sa mga kadagkoan, aron walay makaluwas kang Daniel. Unya mipauli ang hari sa palasyo ug nagpuasa siya niadtong gabhiona; wala siya moapil ug bisan unsang kalingawan, ug wala siya mahikatulog sa tibuok gabii. Sa pagkakaadlawon na, midali ang hari pag-adto sa puy-anan sa mga liyon, ug sa paghiduol niya, misinggit siya sa tingog nga masub-anon, "Daniel, alagad sa buhing Dios, giluwas ka ba sa Dios nga imong gialagaran sa kanunay?" Ug mitubag si Daniel, "Kamahalan, hatagan ka untag taas nga kinabuhi! Ang akong Dios nagpadala ug anghel, aron pagtak-om sa ba-ba sa mga liyon, busa wala ako nila tukba kay wala man akoy dautan nga nahimo kanimo ug sa iyang atubangan." Labihang lipaya sa hari ug mimando siya nga kuhaon si Daniel gikan sa puy-anan sa mga liyon. Busa gikuha nila si Daniel nga wala gayod maunsa, kay misalig man siya sa iyang Dios. Unya gipatawag sa hari ang mga tawong nagsumbong kang Daniel, lakip ang ilang mga anak ug asawa, ug gitambog sila sa puy-anan sa liyon; ug sa wala pa gani sila motugkad sa yuta gipanukob na sila ug giwataswatas sa mga liyon ang ilang kabukogan. Human niini, gisulatan ni Hari Dario ang tanang katawhan sa kalibutan. Matod niya, "Gipanghinaot ko nga makabaton kamog malungtarong kalinaw. Gipakanaog ko kining sugo nga kinahanglan ang tanang sakop sa akong gingharian moyukbo ug mosimba sa Dios ni Daniel, "Kay siya buhi nga Dios ug walay katapusan; dili malupig ang iyang gingharian, maghari siya hangtod sa kahangturan. Moluwas gayod siya ug nagbuhat ug mga kahibulongang butang dinhi sa yuta ug sa langit; siya ang nagluwas kang Daniel gikan sa kapintas sa mga liyon."
ANG PULONG SA GINOO.
SALAMAT SA DIOS.
SALMO RESPONSORYO
Dn. 3:68, 69, 70, 72, 72, 73, 74
R. Hatagi siyag himaya ug pagdayeg nga walay katapusan.
Yamog ug ulan, dayga ninyo ang Ginoo: dayga ug bayawa siya labaw sa tanan hangtod sa kahangturan. (R)
Kabugnaw ug kamig, dayga ang Ginoo; dayga ug bayawa siya labaw sa tanan hangtod sa kahangturan. (R)
Yelo ug niyebe, dayga ang Ginoo; dayga ug bayawa siya labaw sa tanan hangtod sa kahangturan. (R)
Mga gabii ug mga: adlaw, dayga ang Ginoo; dayga ug bayawa siya labaw sa tanan hangtod sa kahangturan. (R)
Kahayag ug kanigitngit, dayga ang Ginoo. dayga ug bayawa siya labaw sa tanan hangtod sa kahangturan. (R)
Mga kilat ug panganod, dayga ninyo ang Ginoo; dayga ug bayawa siya labaw sa tanan hangtod sa kahangturan. (R)
Ang yuta padayga sa Ginoo, dayga ug bayawa siya labaw sa tanan hangtod sa kahangturan. (R)
PAGBASA SA SANTOS NGA EBANGHELYO SUMALA NI SAN LUKAS
Lk. 21:20-28
Si Jesus miingon sa iyang mga tinun-an: "Kon makita ninyo nga ang Jerusalem likosan na sa mga kasundalohan, masayran ninyo nga laglagon na kini sa dili madugay. Unya ang nagpuyo sa Judea kinahanglang managan ngadto sa kabungtoran, ug kadtong atua sa mga siyudad kinahaglang mamahawa usab, ug ang nagpuyo sa banika kinahanglang dili moadto sa siyudad. Kay mao kini 'Ang mga Adlaw sa Pagsilot,' aron pagtuman sa tanan nga giingon sa Kasulatan. Pagkaalaut gayod sa mga mabdos ug sa mga inahan nga may mga masuso niadtong mga adlawa! Moabot ang makalilisang nga kalisdanan niining yutaa, ug hiagoman niining maong katawhan ang kapungot sa Dios. Pamatyon sila pinaagi sa espada ug bihagon ngadto sa tanang kanasuran. Unya mailog ang Jersusalem sa mga tawo nga wala motuo sa Dios hangtod matapos ang gitagal nga panahon sa ilang pagmando." "Aduna unyay mga ilhanan diha sa adlaw ug sa bulan ug sa kabitoonan. Kawad-an sa paglaum ang mga nasod, ug mangalisang sila sa dinaguok sa dagat ug sa nagpungasi nga mga balod. Panguyapan ang mga tawo tungod sa kalisang samtang magpaabot sila sa mahitabo sa tibuok kalibutan; kay ang mga planeta sa kawanangan motipas sa ilang naandang agianan. Unya motungha ang Anak sa Tawo—moabot siya nga may gahom ug himaya diha sa panganod. Inigsugod pagkahitabo niining mga butanga, tindog ug hangad kamo kay duol na ang inyong kaluwasan."
ANG EBANGHELYO SA GINOO.
DAYGON IKAW, O KRISTO.
