KINUTLO GIKAN SA BASAHON NI PROPETA DANIEL
Dn. 5:1-6, 13-14, 16-17, 23-28
Unya nagbangkite si Hari Belsazar alang sa usa ka libo ka mga kadagkoan, ug nakig-inom siya uban kanila. Sa dihang nakainom na si Belsazar sa bino, gipakuha niya ang mga bulawan ug mga platang galamiton nga kinuha sa iyang amahan nga si Nabucodonosor sa Templo sa Jerusalem; iya kining gipakuha aron maoy iyang paimnan sa mga kadagkoan, sa iyang mga asawa ug mga puyopuyo. Busa gikuha ang maong mga galamiton nga gikan sa Templo sa Dios, ug gigamit kini sa hari, sa mga kadagkoan, sa iyang mga asawa ug mga puyopuyo sa ilang pag-inom. Nag-inom sila ug gidayeg nila ang mga diosdios nga bulawan, plata, tumbaga, puthaw, kahoy ug bato. Kalit may kamut sa usa ka tawo nga misulat didto sa bungbong atbang sa suga, ug nakita kini sa hari. Nangluspad ang panagway sa hari ug gibati siyag kalisang; nawad-an siyag umoy ug nangurog ang iyang mga tuhod. Busa si Daniel gipakuha sa hari, ug giingnan, "Ikaw ba si Daniel nga usa sa mga binihag sa akong amahan gikan sa Juda? May nagtaho kanako nga gitugahan ka sa espiritu sa balaang Dios, ug nga may talagsaon kang kahibalo, panabot ug kaalam. Apan nakabalita ako nga makahubad ka kuno sa mga tanghaga, ug mga gumonhap nga sama niini. Kon makabasa ka gani niini ug tug-anan mo ako sa kahulogan, pasul-oban ko ikaw sa bisting harianon ug pakuwentasan ko ikawg bulawan, ug himoon kong ikatulong labing taas nga opisyal sa akong gingharian." Unya mitubag si Daniel, "Dili kinahanglan nga gantihan mo ako. Ihatag na lamang kana sa uban, apan basahon ko ang nahisulat niining bungbong, ug tug-anan ko ikaw sa kahulogan niini." "Nagpasigarbo ka hinoon batok sa Ginoo sa langit, ug gipakuha mo ang mga galamiton sa iyang Templo, aron tagayan nimo sa bino sa imong pagpakig-inom uban sa mga kadagkon, mga asawa ug mga puyopuyo. Gidayeg mo ang mga diosdios nga plata, bulawan, puthaw, kahoy ug bato nga dili makadungog ni makakita ni mahibalo, apan wala mo hinoon pasidunggi ang Dios nga maoy naghatag kanimog kinabuhi ug sa imong kadato." "Ang kamut nga imong nakita nga misulat niining mga pulong gikan kaniya. Ang mga pulong mao kini: Mene, Tekel, ug Parsin. Mao kini ang ilang kahulogan: Mene, giihap sa dios ang gidaghanon sa mga adlaw nga magpabilin ka ingon nga hari ug natapos na kini; Tekel, gitimbang ka ug nakaplagan nga kulang sa gibug-aton; Parsing, gibahinbahin ang imong gingharian, ug gihatag ngadto sa taga-Media ug taga-Persia."
ANG PULONG SA GINOO.
SALAMAT SA DIOS.
SALMO RESPONSORYO
Dn. 3:62, 63, 64, 65, 66, 67
R. Himayaa siya ug dayga sa walay katapusan.
Adlaw ug buwan, dayga ang Ginoo; dayga ug bayawa siya labaw sa tanan hangtod sa kahangturan. (R)
Mga bituon sa kalangitan, dayga ninyo ang Ginoo; dayga ug bayawa siya labaw sa tanan hangtod sa kahangturan. (R)
Tanang talisik ug yamog, dayga ang Ginoo; dayga ug bayawa siya labaw sa tanan hangtod sa kahangturan. (R)
Kamong tanang kahanginan, dayga ninyo ang Ginoo; dayga ug bayawa siya labaw sa tanan hangtod sa kahangturan. (R)
Kalayo ug kainit, dayga ang Ginoo; dayga ug bayawa siya labaw sa tanan hangtod sa kahangturan. (R)
(Kabugnaw ug kamig, dayga ang Ginoo; dayga ug bayawa siya labaw sa tanan hangtod sa kahangturan.) (R)
PAGBASA SA SANTOS NGA EBANGHELYO SUMALA NI SAN LUKAS
Lk. 21:12-19
Si Jesus miingon sa iyang mga tinun-an: "Sa dili pa mahitabo kining mga butanga, dakpon kamo ug lutoson; taralon kamo ngadto sa mga sinagoga ug bilangguon, ug dad-on kamo atubangan sa mga hari ug sa mga punoan tungod kanako. Mao unya kini ang higayon nga makasangyaw kamo sa Maayong Balita. Sa dili pa kini mahitabo, usaha ang inyong hunahuna nga dili kamo mabalaka kon unsaon ninyo pagpanalipod sa inyong kaugalingon; kay hatagan kamog igsusulti ug kaalam nga walay usa sa inyong mga kaaway nga makatubag o makapanghimakak. Budhian kamo bisan gani sa inyong mga ginikanan ug mga igsuon, ingon man sa inyong mga paryenti ug mga higala; ug patyon nila ang pipila kaninyo. Magdumot kaninyo ang tanan tungod kanako, apan walay bisan usa ka buhok sa inyong ulo nga mawala. Pabilin kamo nga malig-on kay niining paagiha maluwas kamo."
ANG EBANGHELYO SA GINOO.
DAYGON IKAW, O KRISTO.
