KINUTLO GIKAN SA BASAHON NI PROPETA DANIEL
Dn. 2:31-45
Si David miingon kang Nabocodonosor, "Ang nakita mo, Kamahalan, usa ka dakong larawan. Nagbarog kini sa imong atubangan nga sulaw kaayo ug makalilisang tan-awon ang iyang panagway. Hinimo gikan sa lunsayng bulawan ang iyang ulo, plata ang iyang dughan ug mga bukton, tumbaga ang iyang tiyan ug paa, puthaw ang iyang mga bitiis, ang iyang mga tiil may puthaw ug may bika usab. Samtang nagtan-aw ka, may usa ka bato nga giluka dili sa kamut sa tawo, nga mihapak sa tiil sa larawan ug nadugmok ang tiil niini. Unya ang puthaw, ang bika, ang tumbaga, ang plata, ug ang bulawan nangadugmok, ingon kapino sa mga tahop diha sa giukanan; gipadpad kini sa hangin ug wala gayoy nahibilin. Apan nahimong dakong bukid ang bato nga nakaigo sa larawan ug milukop kini sa tibuok kalibutan. "Mao kadto ang damgo, ug kini ang kahulogan. Ikaw Kamahalan, ang labing gamhanang hari, gihatagan sa Dios nga anaa sa langit ug gingharian, gahom, kusog ug kadungganan.Gitugyan usab kanimo ang mga tawo, ang mga mananap, ang mnga kalanggaman, aron ikaw ang maghari kanilang tanan—ikaw ang ulo nga bulawan. Sunod kanimo motungha ang laing hari nga minos kanimog gahom ug may ikatulo pa gayod nga gisimbolohan sa tumbaga, ug mohari siya sa tibuok kalibutan. Ug may ikaupat na gayod ka hari, lig-on sama sa puthaw, kay ang puthaw makadugmok man sa tanang butang; ug sama sa puthaw, kining haria modugmok niining tanang nahiunang gingharian. Ug ingon nga nakita mo nga ang iyang tiil hinimo gikan sa bika ug sa puthaw, kining gingharian mabahin; apan anaa kaniya ang kalig-on sa puthaw, ingon nga nakita mo nga ang puthaw gisagol sa yuta nga kulonon. Ug ingon nga ang mga tudlo sa tiil may bahin nga puthaw ug may bahin usab nga bika, kining ginghariana may pagkalig-on ug may pagkahuyang usab, ingon nga nakita mo nga ang puthaw nasagol sa bika. Maghiusa usa sila pinaagi sa kaminyoon, apan dili magdugay ang ilang panaghiusa, ingon nga ang puthaw dili gayod masagol sa bika. Sa panahon niining mga haria, ang Dios magtukod ug usa ka gingharian nga dili gayod malumpag ni ang iyang gahom maagaw sa laing katawhan. Dugmokon niya kining mga ginghariana ug kini maoy ilang katapusan, ug kining maong ginharian mobarog hangtod sa kahangturan—ingon sa imong nakita nga ang bato giluka gikan sa bukid dili pinaagi sa kamut sa tawo ug gidugmok niini ang puthaw, ang tumbaga, ang bika, ang plata, ug ang bulawan. Ang gamhaang Dios nagpadayag sa hari sa mga butang nga mahitabo ugma damlag. Matuod ang damgo, ug husto gayod ang hubad niini."
ANG PULONG SA GINOO.
SALAMAT SA DIOS.
SALMO RESPONSORYO
Dn. 3:57, 58, 59, 60, 61
R. Hatagi siyag himaya ug pagdayeg nga walay katapusan.
Dayga ang Ginoo, kamong tanang mga buhat sa Ginoo, dayga ug bayawa siya labaw sa tanan hangtod sa kahangturan. (R)
Mga anghel sa Ginoo, dayga ang Ginoo, dayga ug bayawa siya labaw sa tanan sa kahangturan. (R)
Kamong kalangitan, dayga ninyo ang Ginoo, dayga ug bayawa siya labaw sa tanan hangtod sa kahangturan. (R)
Kamong tanang katubigan sa ibabaw sa kalangitan, dayga ninyo ang Ginoo, dayga ug bayawa siya labaw sa tanan hangtod sa kahangturan. (R)
Kamong tanang kagahuman sa Ginoo, dayga ninyo ang Ginoo; dayga ug bayawa siya labaw sa tanan hangtod sa kahangturan. (R)
PAGBASA SA SANTOS NGA EBANGHELYO SUMALA NI SAN LUKAS
Lk. 21:5-11
Dihay pipila kanila nga naghisgot bahin sa Templo kon unsa kini katahom tan-awon nga gidayandayanan sa maanindot nga mga bato, ug sa mga gasa nga gihalad ngadto sa Dios. Unya miingon si Jesus, "Kining tanan nakita ninyo apan moabot ang panahon nga walay bisan usa ka bato nga magpabilin sa nahimutangan niini; ang tanan tumpagon gayod." "Magtutudlo," nangutana sila, "kanus-a ba kini mahitabo? Ug unsa man ang ilhanan nga magpaila nga moabot na ang panahon nga kini matuman?" Si Jesus miingon, "Pagbantay kamo ug ayaw kamo palimbong; kay daghan ang moanhi sa akong ngalan nga mag-ingon, 'Ako mao ang Cristo!' ug moingon usab, 'Miabot na ang panahon!' Apan ayaw sila tuohi. Ayaw kamo kahadlok kon makadungog kamog mga gubat ug mga kagubot; kay kining mga butanga kinahanglan nga mahitabo gayod pag-una, apan wala kini magpasabut nga duol na ang katapusan." Mipadayon siya pag-ingon, "Ang usa ka nasod makiggubat sa laing nasod, ug ang usa ka gingharian mosulong sa laing gingharian. Mahitabo unya ang makalilisang nga mga linog, gutom, ug kamatay sa tanang dapit, ingon man ang makahahadlok nga mga butang ug mga dagkong ilhanan gikan sa langit."
ANG EBANGHELYO SA GINOO.
DAYGON IKAW, O KRISTO.
